Read lulogooli Marko 14 Bible Online

Marko 14 - lulogooli bible

Marko 14

¹Inyima ya madiku gaviri lipasaka nobukima bu ta li namamera bwa duka. Avasalisi vanene navang'odi venya inzira yokumugumira nobugeeri, va mwiite:

²kigira va vola, Ku ta kola inyinga yelilia, gase avandu va la kola kivihiri.

³Lwa ya li mu Betani mu inyumba ya Simoni mugere, lwa yikala kulia, mukali mulala yadza na a leta kimuga kyamaguta genardi inzere, getsishilling tsinyingi; na yatannya kimuga ni yitulula ku mutwe gwigwe.

⁴Navutswa avalala va kenleka mu myoyo, ni va vola, Amaguta yaga ga sundulirwa ki?

⁵Kioira maguta yaga nkano ga nyala kugamannywa tsyo kuvita tsishilling tsimia tsivaka, tsi hebwe avadaka. Ni va mu monya.

⁶Navutswa Yesu ya vola, Mu mu leke; kigira ki mu mu kupidza kivi? U nkoleye miyinzi milahi.

⁷Mu vedza navadaka halala kazozo, tsinyinga tsyosi tsya mu yanza mu nyala kuvakolera bulahi: navutswa si mu vedza na inze halala madiku gosi.

⁸U koli aga a nyala; u tangi kuduka kumbakira umubiri gwange gu tebwe.

⁹Ligali, mmu volera, Mu vivala vyosi ha ivangeli yiyi i lilwadzwa, ga la kilwadzirwa kandi aga mukali uyu a koli ga ve kyokumwidzulitsa.

¹⁰Yuda Iskarioti, mulala ku va li likumi navaviri, ya tsia ku vasalisi vanene a duke kumuzama va mu gumire.

¹¹Na yava lwa va hulira va yanza, ni va mu laga kumuha ifetha. Kunangwa yenya ubwiyangu bwo kumuzama.

¹²Ku lidiku li kola lilala lyobukima bu ta li namamera, inyinga yelipasaka liitwa, avegidzwi veve va mu volera, Wenya ku tsie ha li ki kukulombera u lie lipasaka?

¹³Ya tuma vaviri ku vegidzwi veve, na a va volera, Mu tsie mu lidala, mu la vugana nomundu na a gingi isiongo yamadzi: mu mu londe;

¹⁴kandi ha na yingira, mu la volera mwene inyumba, Mwegidzi a vola, I li ha inyumba yange yokugeniha ha ndira lipasaka navegidzwi vange?

¹⁵Mwene a la mu mannya inyumba inene i veye higulu, i lombeywi kandi i tegekeywi: mu la ku lombera mu.

¹⁶Avegidzwi va twula ni va duka mu lidala ni va nyola kuli wa ya va volera: ni va lomba lipasaka.

¹⁷Lwa gwa duka mgolova, yadza halala na va li likumi na vaviri.

¹⁸Lwa vikala ni va litsa, Yesu ya vola, Ligali, mmu volera, Mulala ku mwinye a la nzama, niye u litsanga ninze halala.

¹⁹Ku, va tanga ku henda mwoyo nokumuvolera, Ni inze?

²⁰Na a va volera, Ni mulala ku va li likumi na vaviri, uyu wa ku dongera naye mu ludavo.

²¹Mwana wa Adamu a tsitsanga kuli wa ya ng'odirwa: navutswa bayaye bu la va ku mundu u mu zama mundu uyu a vula kwivulwa nkano nu bulahi kuye.

²²Ku, lwa va li ni va lagira, ya vugula ubukima, kandi lwa ya mala kusantidza ya megannya na a va ha na a vola. Mu vugule: yibu nu mubiri gwange.

²³Kandi ya vugula kikombe, lwa ya mala kusantidza, ya va ha: kandi va nwa ku vosi.

²⁴Na a va volera, Yiki na masahi gange gelilagana, aga sunduleywi vanyi ngi.

²⁵Ligali mmu volera, Si nda nyala kandi kunwa ku makuyu gemizabibu, nduhe nduke lidiku lyokunwa amahya mu bwami bwa Nyasaye.

²⁶Lwa va mala kwimba lwimbu va twula ni va tsia mu kigulu kye Mizeituni.

²⁷Yesu ya va volera, Mwinye vosi mu likigitalidzwa: kigira ga ng'odwa Nda duya mwayi, na magondi ga la tazuka.

²⁸Navu tswa lwa ndi simugukidzwa nda mwimirira kutsia Galilaya.

²⁹Navutswa Petro ya mu volera, Kaliva vosi vikigitalidzwa, inze si nda nyala mba.

³⁰Yesu ya mu volera, Ligali nku volera, Lero ndi, mu budiku yibu, idaywa ni i kikiri kulagula hali kaviri, ive u la nyambakana hali kavaka.

³¹Navutswa ya vola nobudinyu munonono, Ni ga ndukira kukudza nive halala, si nda nyala kukwambakana mba. Kandi vosi va vola ndiyo.

³²Ma va duka mu mulimi gwa langwa Getsemane: na a volera avegidzwi veve, Mwikale hano, ntsie kusaala.

³³Ya hila Petro na Yakobo na Yohana, na a tanga kugenya munonono, nokuhenda mwoyo ligali.

³⁴Na a va volera, Mberera ligali kali kuduka ku likudza: mu tigala hano, mu linde.

³⁵Yisunda hambiri hakekeke, na a gwa hasi ku marova, na a saala, Ni ga nyalika, inyinga yiyi i mbite.

³⁶Kandi ya vola, Abba, Dada, ive u nyala vindu vyosi; u twulidze kikombe yiki ku inze: navutswa ga ta va kuli wa inze ndalira, navutswa ga ve kuli wa ive u lalira.

³⁷Yadza na a va nyola va gona tsindolo, na a volera Petro, Simoni, u gonanga? Si u nyala kulinda isaa indala?

³⁸Lindi, mu saale, mu tingira mu ligeridzwa: ligali mwoyo gu bugirira, navutswa mubiri gu dekerana.

³⁹Kandi ya tsia na a saala, na a vola kandi amakuva ga li gembiri.

⁴⁰Kandi yirana, na a va nyola va gona tsindolo, kigira tsimoni tsyavo tsya li tsi li duhi ligali; kandi si va manya gokumutivulira.

⁴¹Yadza kuvo hali kavaka, na a va volera, Mu gone kalunu, mu sose: ga duki; isaa i duki; henza Mwana wa Adamu a zamwa mu makono gavoni.

⁴²Singiri, ku tsie: henzi, u nzami a veye himbi.

⁴³Nonoho, na a ki vola, Yuda mulala ku va li likumi na vaviri, ya duka, kandi halala naye kiduma, va ginga vivavi netsimpimbo, va twula wa vasalisi vanene navang'odi navakulundu.

⁴⁴Mzami ya li na a mali kuvaha kyokuvamannyira, na a vola, Wa na mbuse, uyu niye; mgumire, mu mu hile bulahi.

⁴⁵Lwa ya duka, nonoho yadza kuye na a vola, Mwegidzi; na a kira kumubusa.

⁴⁶Va mu gumira, ni va mu hila.

⁴⁷Navutswa mulala ku yava ava li ni va singira himbi ya somola kivavi kikye, na a tema mutumekiri womu salisi munene, na a mu kalaga gutu gwigwe.

⁴⁸Yesu ya tivula, na a va volera, Mu ntwulira nevivavi netsi mpimbo kungumira kuli mu tsia kugumira mwiguliri?

⁴⁹Madiku gosi nda li namwinye halala mu litempeli nzegidzanga, si mwa ngumira mba: navutswa ga koleywi ndi mang'oda ga dukidzwe.

⁵⁰Ma va mu leka vosi, ni viruka.

⁵¹Muyai mulala ya mu londa, yivika ingubo yekatani inziyuhira yeng'ine: ni va mu gumira;

⁵²navutswa ya leka ingubo yekatani ni yiruka kyahonyo.

⁵³Va hila Yesu ku musalisi munene: kandi va vugana halala naye avasalisi vanene vosi navakulundu navang'odi.

⁵⁴Kandi Petro ya li na a mu londa ihale, kali kuduka mu hamgidzi ha musalisi munene; ni yikala halala na vanyampara, ni yota muliru.

⁵⁵Avasalisi vanene nekyina kyosi venya amakuva ku Yesu va duke kumwiita; navutswa va vula kuganyola.

⁵⁶Kigira vanyingi va mu gina, navutswa amakuva gavo si ga hambana.

⁵⁷Avalala va si ngira, ni va mu gina, ni va vola,

⁵⁸Kwa mu hulira na a vola, Nda sambula litempeli yili lyombakwa namakono, ma na nyombaka lindi mu madiku gavaka li tombakwa namakono.

⁵⁹Kaliva ni va vola ndiyo ubugini bwavo si bwa hambana mba.

⁶⁰Ku, musalisi munene ya singira hagati, na a teva Yesu, na a vola, Ive si u tivula kindu mba? Ni kindu ki kya yava va vola ku ive?

⁶¹Navutswa ya kiring'ana, si ya tivula kindu mba. Kandi musalisi munene ya mu teva, na a mu volera, Ive ni Kristo, Mwana wo Mugasu?

⁶²Yesu ya vola, Inze niye: kandi mu la lola Mwana wa Adamu ni yikaye ha mukono mulungi gwo Wetsingulu, ni yidza mu malesi gegulu.

⁶³Musalisi munene ya tandula tsingubo tsitsye, na a vola, Kwenyera ki avaloli avandi?

⁶⁴Mu huliye manyego: mu vola ki? Vosi va mu kalagira, no bulahi a kudze.

⁶⁵Valala va tanga kumutudzira amate, nokumukunika tsimoni, nokumuduya, nokumuvolera, Profeta: kandi avasikari va mu vugula ni va mwala ne tsimpya tsyavo.

⁶⁶Petro lwa ya li hasi hamgidzi, mukana mulala mtugwa womusalisi munene yadza;

⁶⁷na a lola Petro ni yota muliru, ya henza, na a vola Ive kandi wa li halala na Munazareti Yesu.

⁶⁸Navutswa yambakana, na a vola, Si mmanya kandi si mbuli ranga ga u vola. Ma ya twula na a tsia ku lusimbu; nedaywa ya lagula.

⁶⁹Mkana ya mu lola, na a tanga kandi kuvolera avasingira himbi, Uyu nu mulala kuvo.

⁷⁰Navutswa yambakana kandi. Inyima hakekeke ava singira himbi va volera Petro, Ligali ive nu mulala kuvo; kigira ive u veye Mugalilaya.

⁷¹Navutswa ya tanga kusasama nokunyega, Si mmanya mundu uyu wa mu tala.

⁷²Nonoho idaywa ya lagula kaviri. Kandi Petro yidzulitsa likuva lya Yesu ya mu volera, Idaywa ni i kikiri kulagula hali kaviri, ive u la nyambakana hali kavaka. Lwa ya ganagana amakuva yago, ya lira.