Read lulogooli Marko 15 Bible Online

Marko 15 - lulogooli bible

Marko 15

¹Mugamba mabwebwe nonoho avasalisi vanene navakulundu navang'odi nekyina kyosi, va tevana amakuva gokukola, ma va boha Yesu ni va twula naye kumuhila wa Pilatu.

²Pilatu ya mu teva, Ive nu Mwami wa Vayuda? Ya tivula na a mu volera, Ive u vola.

³Kandi avasaIisi vanene va vola vindu vinyingi kuye.

⁴Pilatu ya mu teva kandi, na a vola, Si u tivula kindu mba? Henza vindu vinyingi ndi vya va vola ku ive.

⁵Navutswa Yesu si ya tivula kindu kandi; Pilatu ya luha ya genya.

⁶Inyinga yelilia ya nala kuvabohololira muhambe mulala wa va tovola.

⁷Ya li ho mulala wa langwa Baraba, wa bofwa halala na vandi ava kola bwebaali, na aviita avandu mu bwebaali bwavo.

⁸Kiduma kyanegira ni va tanga kumuteva a kole kuli wa a va kolera kazozo.

⁹Pilatu ya va teva, na a vola, Mwenya mmu bohololire Mwami wa Vayuda?

¹⁰Kigira ya lola avasalisi vanene va mu leti nembodoka bwavo.

¹¹Navutswa avasalisi vanene va vukidza kiduma va mu volera, No bulahi a va bohololire Baraba.

¹²Kandi Pilatu ya tivula na a va volera, Nda mu kolera ki uyu wa mu langa Mwami wa Vayuda?

¹³Kandi va hanzuka ni va vola, Mbambe.

¹⁴Pilatu ya va volera Kigira ki, a koli ubwoni ki? Navutswa va hanzuka munonono, Mbambe.

¹⁵Pilatu kigira yenya kuyanzidza kiduma, ya va bohololira Baraba, na a va ha Yesu. Lwa ya mala kumukuya nolukova a bambwe.

¹⁶Avasikari va mu hila mu inyumba ya langwa Pretorio; ni va vungidza mugaanda gwosi gwa vasikari.

¹⁷Ni va mu vika ingubo yekiforosadi, ni va nava itaji ya mafwa ni va mu vika ku mutwe.

¹⁸Ni va tanga kumuchelidza nokuvola, Mirembe, Mwami wa Vayuda

¹⁹Ni va mu nweka ku mutwe nolusi, ni va mu tudzira amate, ni va mu sigamira kumwidzominya.

²⁰Lwa va mala kumukolera kihenyahenye va twulidza ingubo yekiforosadi, ni va mu vika tsingubo tsitsye. Ni va mu hila kumubamba.

²¹Mulala wa langwa Simoni Mkurene, ise Aleksandro na Rufusu na a vita ku inzira, na a twula mu mulimi, va mu niga kutsia navo, a mu gingire musalaba gwigwe.

²²Va mu dukidza ha langwa Golgota, li veye kuvola, Ha kihanga.

²³Ni va mu letera iwaini i sanyeywi nomuri: navutswa ya gi sula.

²⁴Va mu bamba, ni vavukanya tsingubo tsitsye hagati havo, ni va kola tsikura kutsyo, va lole weyeye.

²⁵Ya li isaa i kola tsivaka, ni va mu bamba.

²⁶Ibaruwa yeliyalwa lya li kuye ya ng'odwa higulu, MWAMI WA VAYUDA.

²⁷Va bamba halala naye avivi vaviri; mulala ha mkono mu lungi, nowundi ha mkono mmosi.

²⁸Kandi ling'oda lya dukidzwa, li vola, Ya validzwa halala na avoni.

²⁹Kandi ava vita va mu seka, ni va sung'usa mitwe ni va vola, Oho ive u sambula litempeli, u lyombaka kandi madiku gavaka,

³⁰wehonnye, wike ku musalaba.

³¹Kandi ndiyo avasalisi vanene va mu sekerera avene halala navang'odi, va vola, Ya honnya avandi; mwene si a nyala kwehonnya.

³²Kristo, Mwami wa Israeli, yike ku musalaba kalunu, ku lole kandi ku duke kusuuvira. Kandi ava bambwa naye halala va mu nyega.

³³Lwa ya duka isaa i kola tsitanu nendala, kisundi kya gwa mu kivala lyosi, ya luha ya duka isaa i kola tsitanu na tsine.

³⁴Ku isaa i kola tsitanu na tsine Yesu ya hanzuka nomwoyo munene, Eloi, Eloi, lama sabakatani? Iigirunkanywa lyago li veye kuvola, Nyasaye wange, Nyasaye wange, kigira ki u ndeki?

³⁵Avalala kuvo ava singira himbi, lwa va ga hulira, va vola, Henza, a langa Elija.

³⁶Mulala ya nyagula ni yizulitsa isiki kikaminyo, na a vika ku lusi na a mu ha a nwe, na a vola, Leka; ku lole Elija na a va ni yadza kumwikidza.

³⁷Yesu ya hanzuka, na a kudza.

³⁸Ingubo ya kinga mu litempeli ya tandulwa hagati kutwula higulu kuduka hasi.

³⁹Munyampara, wa singira himbi naye, lwa ya lola na a kudza ndiyo, ya vola, Ligali mundu uyu ya li Mwana wa Nyasaye.

⁴⁰Kandi avakali va singira ihale ni va henza: avalala kuvo va li Maria Magdalene, na Maria mama wa Yakobo mke na Yose, na Salome;

⁴¹ava mu londa lwa ya li mu Galilaya, ni va mu tumekira; navakali avandi vanyingi avanegira naye kutsia Yerusalemi.

⁴²Isi lwa ya mwama, kigira lya li lidiku lyokwetegeke, nalyo ni lidiku li veye imbiri welisabato,

⁴³Yosefa wa Arimathia, mukulundu mugoosi, kandi mwene wa henzerera ubwami bwa Nyasaye, yadza, ni yingira nobuluviriri wa Pilatu, na a saava umubiri gwa Yesu.

⁴⁴Pilatu ya genya kuhulira u mali kukudza: na a langa munyampara, na a mu teva, a kudzi kale naho.

⁴⁵Lwa ya hulira amakuva gomunyampara, ya ha Yosefa mukudzu.

⁴⁶Ya gula ingubo yekatani, na a mwikidza, na a mu nadza nengubo, na a mu vika mu kilindwa kya kalagwa mu ligina; na a gomagominya ligina na a ku nika kiliango kyekilindwa.

⁴⁷Maria Magdalene na Maria mama wa Yose va lola ha ya vikwa.