Read lulogooli Marko 16 Bible Online

Marko 16 - lulogooli bible

Marko 16

¹Lisabato lwa lya vita, Maria Magdalene na Maria mama wa Yakobo, na Salome, va gula vindu vya funya mwayu, va tsie kumuvaka.

²Mugamba mabwebwe ligali ku lidiku li kola lilala ku lisidza, va duka ha kilindwa liuva li mali kutonga.

³Ni va volerana, Ibwaha na a ku gomagominyire ligina, li twule ha kiliango kyekilindwa?

⁴Lwa va henza va lola ligina li gomagominyeywi: kigira lya li linene munonono.

⁵Lwa vingira mu kilindwa, va lola musolele ni yikaye haluvega lwomkono mulungi, na a veye nengubo indavu; ni va genya.

⁶Ya va volera, Mu ta genya mba: mwenya Yesu Munazareti, wa bambwa. U simuguki; si a veye hano mba: henzi ha va mu vika.

⁷Navutswa mu tsie, mu volere avegidzwi veve na a Petro, A tsitsa imbiri wenyu kutsia Galilaya: mu la mu lola yo kuli wa ya mu volera.

⁸Va twula mu kilindwa ni viruka; kigira ubudegeri nobugenyi bwa va gumira: si va volera mundu kindu mba; kigira va tia.

⁹Lwa ya vuka mabwebwe ku lidiku lya kola lilala ku lisidza, ya tanga kuloleka ku Maria Magdalene wa ya twulidza kuye amademone gatanu na gaviri.

¹⁰Ya tsia na a volera ava vedza halala naye, lwa va li ni va kikiri mu maliga ni va liranga.

¹¹Navo lwa va hulira a veye mwoyo na u mu loli, si va suuvira mba.

¹²Inyima ya vindu yivi ya loleka kandi ne ligondo lindi ku vaviri kuvo, va li ni va genda ni va tsia mu kivala.

¹³Kandi va tsia ni va volera avandi: navutswa si va va suuvira mba.

¹⁴Lwenyima ya loleka ku va li likumi na mulala avene lwa va li ni vikaye ku vyokulia; na a va gondokera ku livula kusuuvira lyavo nobudinyu bwemyoyo, kigira va vula kusuuvira yavo ava mu lola lwa ya mala kusimuguka.

¹⁵Ya va volera Gendi mu tsie mu lirova lyosi mwilwadze ivangeli ku vandu vosi.

¹⁶U suuvira na a batidzwe a la honnywa; u vula kusuuvira a la kyaywa.

¹⁷Vilolekidzu yivi vi la loleka halala na va suuvira: va la twulidza amademone ne lyeta lyange; va la vola netsinimi tsimpya;

¹⁸va la ginga tsinzoka, kandi ni va nwa kindu kyokwiita si ki nyala ligali kuvononnya mba; va la vika makono ku valwaye, na va la hona.

¹⁹Ni ndiyo Mwami Yesu, lwa ya mala kuvolerana navo, yingiridzwa migulu ni yikala ha mukono mulungi gwa Nyasaye.

²⁰Kandi va twula ni vilwadza mu vivala vyosi, Mwami yinzira navo, na a nenehidza amakuva ne vilolekidzu vya va hereka. Ameni.