Read lulogooli Marko 4 Bible Online

Marko 4 - lulogooli bible

Marko 4

¹Kandi ya tanga kwegidza ku luginga lwenyanza. Ni ki vunga ha ya li kiduma kinene ndi, ni yingira mu liato ni yikala munyanza; nekiduma kyosi kya li ho ku luginga lwenyanza.

²Na a vegidza vindu vinyingi mutsing'ano, na a va volera mu lyegidza lilye:

³Mu hulire Henza, mumidzi ya twula na a tsia kumidza.

⁴Ku, lwa ya li na a midza, bulala bwa gwa ku inzira, na manyonyi ni gadza, ni ga bu vodza.

⁵Nobundi bu gwa ku magina ha bwa nyola marova makekeke, nonoho bwa mera, kigira marova ga li makekeke;

⁶navutswa liuva lwa lya mala kutwula bwa niala; kigira ii bwa li nemiri, ni bwuma.

⁷Nobundi bu gwa mmafwa, namafwa ga viruka, ni ga bu kunika nibu vula kwama.

⁸Nobundi bu gwa mmarova malahi ni bwama, ni bu viruka ni bu dasa lyama; bulala bwa leta makumi gavaka, nobundi makumi gatanu nelilala, nobundi mia.

⁹Na a va volera, u veye namatu gokuhulira, n hulire.

¹⁰Lwa ya li na a va yeng'ine, yavo va li naye na va li likumi na vaviri va mu teva lugano yilwo.

¹¹Na a va volera, Mwinye mu hebeywi kumanya amakuva ga viswa gobwami bwa Nyasaye: navutswa vosi va veye kyova va volerangwa mutsing'ano:

¹²lihenza va henza va vula kulola; lihulira va hulira va vula kumanya; gase va leganira va samefwe ubwoni bwavo.

¹³Na a va volera, Si mu manya lugano yilu? Mu la manya ndi tsing'ano tsyosi?

¹⁴Mumidzi a midza likuva.

¹⁵Yava avoku inzira haluvega heli kuva li midzwa nava, lwa va mali kuhulira, hene yaho Setani yadza na a twulidza likuva li midzeywi muvo.

¹⁶Kandi yava ava midzwa mmagina nava, lwa va mali kuhulira likuva, nonoho va li gumira nobuyanzi,

¹⁷avene si va veye nemiri, ma vidinyiridza hakekeke; ma lwa va lola kivi nobudambidzwi kigira likuva, nonoho vikigitala.

¹⁸Avandi ava midzwa mmafwa; nava, va hulira likuva,

¹⁹na madidikano gekivala, nobugadi bwobutugi, nelikayerwa lyevindu vindi, ma vingira ni vi kunika likuva li luhe li duke kuvula kwama.

²⁰Navo va midzwa mmarova malahi nava, ava hulira likuva ni va li gumira ni vama, avalala amakumi gavaka, avandi makumi gatanu nelilala, avandi mia.

²¹Na a va volera, I letwa itaya i kunikwa nekihinda, kinga i vikwe isi wekitali, si i letwa i vikwe higula hemeza?

²²Si ha veye nekindu kya viswa ki li vula kuvuulika; si ha veye nekindu kya vikwa hamwamu ki li vula kulangaminywa.

²³Mu ndu na a va namatu gokuhulira, a hulire.

²⁴Na a va volera, Mu henze bulahi aga mu huliranga inengo ya mu geranga mu, kandi mwinye mu la gererwa mu: namwinye mu la medwa.

²⁵Mundu u veye nevindu a la hebwa: nu u ta li navyo, a la nyagwa kali vya a ve navyo.

²⁶Na a vola, ubwami bwa Nyasaye bu veye ndiyo, kuli mundu a midza bugutsa a tage mmarova

²⁷na a gona na a vuka ubudiku nombasu, nibwo bugutsa bu mera bu viruka, a vula kumanya kuli wa bu viruka.

²⁸Lirova lyene lyeng'ine li leta vyokulia; litu li tanga kutwula, kandi butsitsi, ku, kandi ingano inkomelu mulidete.

²⁹Navutswa lwa ingano ilava, nonoho a leta mbano, kigira bugesi bu duki.

³⁰Na a vola. Ku fwananya na ki ubwami bwa Nyasaye? Nolugano ki lwa ku fwananya nalwo?

³¹Bu fwanana nolugutsa lwelisatsi, inyinga ya lu tagangwa mmarova, yilu lu veye lukekeke ku bugutsa bwosi bu vedza mulirova;

³²navutswa lwa bu tagangwa bu mera bu vita tsingutsa tsyosi, bu twulidza tsisya tsinene manyonyl gegulu ga luha ga duka kugunza hasi mkiriri kyagwo.

³³Ya kupa tsing'ano tsinyingi kuli yitsi na a va volera likuva lilye kuli va nyala kulihulira;

³⁴navutswa bugira lugano si a va volera mbakandi lwa va li veng'ine ya vuulira avegidzwi veve tsyosi.

³⁵Ku lidiku yilyo lwa gwa li mgolova, ya va volera, Kwambuke ku tsie ku lwangereka lundi.

³⁶Ni va leka kiduma, ni va mu hila kuli wa ya li muliato. Kandi amato gandi ga li halala naye.

³⁷Kihudzutsi kyembuudza kya vuka, viguvuli ni vi duya liato, ni li duka kwizula madzi.

³⁸Mwene ya li na a ve mu liato hanyima, na a gona tsindolo ku muto: ni va mbukidza, ni va mbolera, Mwegidzi, si ki veye kindu ku ive, kwinye ku divanga?

³⁹Na a vuka na a gaya imbuudza, na a volera inyanza, Kiring'ana, u leng'ere. Nembuudza ya hera, ni gu va muleng'era munene.

⁴⁰Na a va volera, Kigira ki mu tidza ndi? Mu kikiri kuva nelisuuvira?

⁴¹Ma va tia munonono, ni va volerana, Ibwaha uyu, kali imbuu dza nenyanza i mu hulira?