Read lulogooli Marko 7 Bible Online

Marko 7 - lulogooli bible

Marko 7

¹Va vugana kuye Vafarisayo, navalala ku vang'odi, ava twula Yerusalemi,

²ni va lola avalala ku vegidzwi veve va lagira namakono mamisu, ga veye aga tisaveywi.

³(Kigira Vafarisayo, na Vayuda vosi, ni va tisava ligali makono si va lagira mba, va gumira miima gyavakulundu;

⁴kandi lwa va twula mu kitu, ni va tisinga si va lagira mba. Kandi vi veho vindu vindi vinyingi vya va bugirira kugumira, kwogidza visanda, netsinyingu, nevifuria.)

⁵Vafarisayo navang'odi va mu teva, Kigira ki avegidzwi vovo va sula kugumira miima gyavakulundu, navutswa va lagira ubukima namakono mamisu?

⁶Ya tivula na a va volera, Isaya ya profeta bulahi ku mwinye avagadi, kuli aga ng'odwa Avandu yava va nzidzominya neminwa gyavo, Navutswa myoyo gyavo gyi veye hale ninze.

⁷Navutswa lisigama lyavo li veye lya vutswa, Vegidza miima gyavandu kuva megidzo gavo.

⁸Mu leka malago ga Nyasaye ni mu gumira miima gyavandu.

⁹Kandi ya va volera, Ligali mu sula malago ga Nyasaye, mu duke kugumira miima gyenyu.

¹⁰Kigira Musa ya vola, Widzominye dada wowo na mama wowo; kandi, U nyega ise kinga mama, likudza, a kudze:

¹¹navutswa mwinye mu vola, Mundu u li volera ise kinga mama, Vyosi vya mbeye navyo kukonya ive ni Korbani, livola lyago ni vya gimwa Nyasaye;

¹²mwinye si mu mleka kandi kuko lera ise kinga mama kindu;

¹³miima gyenyu gya mwegidza gyi kola amakuva ga Nyasaye ga ve vutswa: kandi vindu vindi vinyingi ku yivi mu kolanga.

¹⁴Ya langa kiduma kandi, na a va volera, Mu mbulire vosi, mu manye:

¹⁵si ki li kindu ki veye kyova ku mundu ki ingira mu mundu ki nyala kumukola mudamano; navutswa vindu vi twula mumwoyo, yivi nivyo vi nyala kumukola mudamano.

¹⁶Mundu na a va nogutu gokuhulira, a hulire.

¹⁷Lwa ya mala kwingira munyumba kutwula mu vandu, avegidzwi veve va mu teva lugano yilu.

¹⁸Na a va volera, Mwinye kandi mu vula kuhulira ndi? Si mu manya mba vindu vyosi vi veye kyova ni vingira mu mundu si vi nyala mba kumukola mudamano;

¹⁹kigira si vingira mu mwoyo mba, navutswa vi tsitsa mmunda, kandi vi la twula? Ya vola yaga, a kole vyokulia vyosi vi ve vilahi.

²⁰Kandi ya vola. Vi twula mu mundu vi nyala kumukola mudamano.

²¹Kigira vi twula mugati, mu mwoyo gwavandu, tsiganagani tsindamano, nokutsia mbakana, nokwiba, nokuluminda, nokuheya,

²²nokukayirwa vyavene, nekirage, nobugadi, nobuhuuvali, nemoni indamano, nokunyega, nokwigingira, nokusiruhala.

²³Vindu yivi vyosi vidamano vi twula mugati ni vi kola mundu a ve mudamano.

²⁴Kandi ya twula ho na a tsia mu kivala kya Turo ne Sidone. Lwa yingira mu inyumba ni yenya avandu vosi va vule kumanya; navutswa si ya nyala kuviswa mba.

²⁵Nonoho mukali mulala, mkana wewe ya li nomwoyo mudamano, ya hulira a veye mu, ni yadza na a gwa ha virenge vivye.

²⁶Mukali zana ya li Mugreki, Siriafoinike ihiri yeye, ya mu saala a twulidze lidemone mu mkana wewe.

²⁷Navutswa ya mu volera, Avana va tange kwiguta: kigira si bu li bulahi kuvugula ubukima bwavana bu sikisirwe tsimbwa.

²⁸Ya tivula na a mu volera, Yee, Mwami; navutswa tsimbwa tsi litsa amadonye isi mwemeza.

²⁹Ya mu volera, Kigira livola yili, u tsie yengo; lidemone li mali kutwula ku mkana wowo.

³⁰Na ya tsia inyumba yeye, na a nyola mkana na a goni ku kitali, nelidemone li mali kutwula.

³¹Kandi ya twula mu kivala kya Turo, na a vita Sidone, na a duka ku inyanza ya Galilaya, na a vita hagati hekivala kya Dekapoli.

³²Va mu letera mundu wa hana amatu wa yovoya vutswa; va mu saala a vike mkono kuye.

³³Ya mu twulidza mu vandu na a mu hila ha luvega galaha, na a vika videte vivye mu matu gege na a tudza amate na a dira ku luiimi lulwe;

³⁴ya henza igulu na a twula imiyika, na a mu volera, Efata, livola lyago li veye, Igulika.

³⁵Nonoho amatu gege gigulika na mugoye gwolulimi gwa bohololwa, na a vola bulahi.

³⁶Ya veganehidza va ta volera mundu: navutswa kuli wa ya veganehidza va kira kulandidza amakuva.

³⁷Va genya munonono kuvita ni va vola, U koli vindu vyosi bulahi; u koli kali ava hana amatu va hulire, nava yovoya va vole.