Read lulogooli Marko 9 Bible Online

Marko 9 - lulogooli bible

Marko 9

¹Vatakatifu. Kandi ya va volera, Ligali, mmu volera, avalala ku va singiye hano si va la tsatsama ku likudza, ni va ta lola ubwami bwa Nyasaye buudza netsingulu.

²Inyima ya madiku gatanu neli lala Yesu ya vugula Petro na Yakobo na Yohana, na a va hila mu kigulu kitambi, va li veng'ine; ya girunka nywa na a loleka imbiri wavo nilindi ligondo;

³tsingubo tsitsye tsya gwa tsindavu munonono, mundu welirova wokulavidza si a nyala kutsilavidza ndi.

⁴Elija na Musa va loleka kuvo: kandi va volerana na Yesu.

⁵Petro ya tivula na a volera Yesu, Mwegidzi, nu bulahi ku ve hano: kandi ku lombe vidioli vivaka; kilala ki ve kikyo, nekindi ki ve kya Musa, nekindi ki ve kya Elija.

⁶Kigira si ya manya ama kuva gokutivula mba; kigira va duka kutia munonono.

⁷Malesi gadza i ga va kinga: kandi amakuva ga twula mu malesi ni ga vola, Uyu nu Mwana wange wa nyanza: mu mu hulire.

⁸Nonoho vekevuka, si va lola mundu kali mulala, Yesu yeng'ine navene.

⁹Lwa va li ni va twula mu kigulu, ya veganehidza va ta volera mundu vindu vya va loli, kuduka lwo Mwana wa Adamu a li simuguka kutwula mu vakudzi.

¹⁰Ku va visa amakuva ni va tevana, ni kindu ki lisi muguka mu vakudzi.

¹¹Va mu teva ni va vola, Kigira ki avang'odi va vola, Elija a la tanga kuudza?

¹²Na a va volera, Ligali, Elija a tanga kuudza a lombe vindu vyosi: kandi ga ng'odeywi ndi ku Mwana wa Adamu, a la kupidzwi kivi vindu vinyingi nokulegwa?

¹³Navutswa inze mmu volera, Elija u duki, kandi va koli kuye vyosi vya va yanza, kuli amakuva ga ng'odwa kuye.

¹⁴Lwa va duka ku vegidzwi, va lola kiduma kinene va va kumbiridza, navang'odi va tevana navo.

¹⁵Nonoho kiduma, lwa kya mu lola, kya genya munonono, va nyagula ni va tsia kuye ni va mu chelidza.

¹⁶Na a va teva, Mu tevana ki navo?

¹⁷Mulala ku kiduma ya mu tivulira, Mwegidzi, nda ku letera muyai wange, u veye nomwoyo gu ta vola;

¹⁸lwa gu mu gumira gu mu tandula; na a twula lifwulu na a dyedyeidza amino, na a kinda: nda volera avegidzwi vovo va gu twulidze; navutswa si va nyala mba.

¹⁹Ya va tivulira na a vola, Likula li vula kusuuvira, nda va halala nemwinye kuduka inyinga ki? Ndekudzihidzira ku mwinye kuduka inyinga ki? Mu mu lete ku inze.

²⁰Va mu hila kuye: lwa ya mu lola, nonoho mwoyo gwa mu tandula munonono; na a gwa hasi na a gomagoma yiyi na yiyi na a twula lifwulu.

²¹Na a teva ise wewe, Ya jagwa inyinga ki ndi? Na a mu volera Ya jagwa inyinga ya ya li na a kikiri mwana.

²²Kanyingi gu mu luguta mu muliru nomu madzi, kumwononnya: navutswa ive nu u va nu u nyala kukola kindu, u ku vere tsimbabasi, u ku konye.

²³Yesu ya mu volera, Nu u va nu u nyala Vindu vyosi vi nyalika kuye u suuviranga.

²⁴Nonoho ise womwana va gamba na a vola, Mwami, nsuuvira; u konye livula kusuuvira lyange.

²⁵Yesu lwa ya lola avandu va nyagula ni va vunga, ya gaya mwoyo mudamano na a gu volera, Mwoyo gu ta vola no gwa hana amatu, nku ha munwa, twula kuye u tingira kandi.

²⁶Gwa hanzuka ni gu mu tandula munonono, gu twula mu muyai na a gwa na a fwana mukudzu; avanyingi kuvo va luha va vola, U kudzi.

²⁷Navutswa Yesu ya mu gumira mkono, na a mu singiridza na a singira.

²⁸Lwa yingira mu inyumba avegidzwi veve va mu teva makiriri, Kigira ki kwinye si kwa nyala kugutwulidza?

²⁹Ya va volera, Ku yigu si gu nyala kutwula, navutswa ni lisaala lyeng'ine, ne lihonga lilia.

³⁰Va twula yo ni va londa inzira i vita Galilaya; naye si yenya mundu a manye mba.

³¹Kigira yegidza avegidzwi veve na a va volera, Mwana wa Adamu a la zamwa avandu, va mu gumire na va mwiite; lwa yiitwa inyima ya madiku gavaka a la simu guka kandi.

³²Navutswa si va hulira bulahi amakuva yaga mba, kandi va tia kumuteva.

³³Ku, va duka Kapernaume: kandi lwa ya li mu inyumba ya va teva, Mwa li ni va hangalidzani ki ku inzira?

³⁴Navutswavakiring'ana: kigira va li kuhangalidzana ku inzira ibwaha u veye munene.

³⁵Yikala hasi na a langa ava li likumi na vaviri; na a va volera, Mundu ni yenya kuva mwimiri, a la va wenyima ku vosi, nomutumekiri ku vosi.

³⁶Na a vugula mwana mukekeke, na a mwikalidza hagati havo: kandi ya mu vugula mu makono, na a va volera,

³⁷Ku vosi u li bugirira mulala ku vana va li ndi kigira lieta lyange, a bugirira inze: u bugirira inze, si a mbugirira, navutswa a bugirira wa ntuma.

³⁸Yohana ya mu volera, Mwegidzi, kwa lola mulala na a twulidza amademone ku lieta lilyo: ni ku mwambakannya, kigira ya vula kulonda kwinye.

³⁹Navutswa Yesu ya vola, Mu ta mwambakannya mba: kigira si ha li nomundu u li kola miyinzi minene ku lieta lyange wa nyala nonoho kunnyega.

⁴⁰Kigira u ta ku hing'ana a singira halala nekwinye.

⁴¹Ku vosi u mu letera kisandn kyamadzi kunwa kigira mu veye avandu va Kristo, ligali inze mmu volera, madanyi gege si ga li nyala kugota mba.

⁴²Navutswa ku vosi u likigitalidza mulala ku yava vakekeke va suuvira inze, bulahi kuye lu sungwe lugina lunene mwigoti mwimwe a tebwe mu inyanza.

⁴³Mkono gugwo ni gu kwikigitalidza, u gu kalage: ubulahi bwokwingira mu liva mwoyo no mukono mulala, bu vita kuva nemikono gyiviri, na u tsie mu gehena, mu muliru gu ta simika.

⁴⁴Ha ing'ende yavo i vula kukudza, kali muliru gu vula kusiminywa ho.

⁴⁵Kirenge kikyo ni ki kwikigitalidza, u ki kalage: ubulahi bwokwingira mu liva mwoyo nobuleema, bu vita kuva nevirenge viviri na u sikiswe mu gehena.

⁴⁶Ha ing'ende yavo i vula kukudza, kali muliru gu vula ku siminywa ho.

⁴⁷Imoni yoyo ni kwikigitalidza, u gi twulidze: ubulahi bwokwingira mu bwami bwa Nyasaye nemoni indala bu vita kuva netsimoni tsiviri, na u sikiswe mu gehena;

⁴⁸ha ing'ende yavo i vula kukudza, nomuliru gu vula kusiminywa.

⁴⁹Vosi va la lungwa nomunyu gwomuliru.

⁵⁰Munyu nu mulahi: navutswa munyu ni gwoneka, mu la gu hambiridza naki? Mu ve nomunyu mu mwinye, mu menye mu mirembe avene na avene.