Read lulogooli Luka 12 Bible Online

Luka 12 - lulogooli bible

Luka 12

¹Mu inyinga yeyo, viduma lwa vya duka tsielfu tsinyingi va duvagana, ya tanga kuvolera avegidzwi veve, Kyembiri mu gelieh ku mamera ga Vafarisayo aga veye ubugadi.

²Si ha li nekindu ki kunikwa ki li vula kukunulwa; kandi ki viswa ki li vula kumanyekana.

³Kigira yaga ku gosi aga mwa vola mu kisundi ga la hulirwa ha bulavu; naga mwa monyana ha gutu mu bwasi ga lilwadzirwa ku visegese.

⁴Kandi inze mmu volera, mwinye avalina vange, Mu ta tia aviita mubiri, navutswa lwanyima si va veye nagandi ga va nyala kukola.

⁵Navutswa nda mu gelihidza ku uyu wa mu li tia: Mu tie uyu, na a mala kwiita, a veye netsingulu kuta mu igehena; yee, mmu volera, Mu tie uyu.

⁶Amatonderidzi gatanu si ga gulwa tsitsenti tsiviri? Kandi si givirirwa imbiri wa Nyasaye kali lilala.

⁷Navutswa kali lisu lyene lyoku mitwe gyenyu li mali kuvalidzwa lyosi. Mu ta tia: mwinye mu veye avalahi kuvita amatonderidzi manyingi.

⁸Kandi inze mmu volera, Vosi va mbugirira imbiri wavandu, yava Mwana wa Adamu a la va bugirira imbiri wetsingelosi va Nyasaye:

⁹navutswa u nyambakana imbiri wavandu a lambaka nwa imbiri wetsingelosi va Nyasaye.

¹⁰Ku vosi u li vola likuva ku Mwana wa Adamu a la samefwa: navutswa u nyega Roho Mutakatifu si a li samefwa mba.

¹¹Kandi lwa va li mu hila imbiri wavamavugana navanene navetsingulu, mu ta henda mwoyo kuganagana litivula kandi kuli wa mu li tivula kandi aga mu li vola:

¹²kigira Roho Mutakatifu a la mwegidza mu isaa zana aga li mu dukira kuvola.

¹³Mundu mulala ku kiduma ya mu volera, Mwegidzi, u he amwavo wange munwa a ngavulire ku miyandu gyetu.

¹⁴Navutswa ya mu volera, Mundu ive, ibwaha ya mbika kuva mukalagi kinga mugavuli ku mwinye?

¹⁵Kandi ya va volera, Mwelinde ku likayirwa lyosi: kigira liva mwoyo lyomundu si li veye ku vindu vinyingi vya a veye navyo.

¹⁶Kandi ya va kupa lugano, na a vola, Mulimi gwomundu mulala mutugi gwama ligali:

¹⁷naye ya ganagana mu mwoyo gwigwe, na a vola, Nda kola ndi, kigira si mbeye na ha mbika liama lyange?

¹⁸Kandi ya vola, Nda kola ndi: nda sambula amagungi gange, nzombake agandi amanene; kandi nda vungidza mu ubuswage bwange bwosi nevindu vyange vyosi.

¹⁹Kandi nda volera mwoyo gwange, Mwoyo, u veye nevindu vinyingi vikeywi vyemihiga minyingi; u lie, u nwe, u sangale.

²⁰Navutswa Nyasaye ya mu volera, Ive wobusiru, ubudiku yibu nu bwoku twulidza liva mwoyo lilyo; kandi vindu vya wa lomba vi la va vya bwaha?

²¹A veye ndiyo wivikira vindu, navutswa ku Nyasaye si a veye nobutugi.

²²Kandi ya volera avegidzwi veve, Kigira yaga mmu volera, Mu ta henda mwoyo ku liva mwoyo lyenyu, ku vya mu li lia, kinga ku mubiri, vya mu li vika.

²³Kigira liva mwoyo li vita vyokulia, nomubiri gu vita tsingubo.

²⁴Mu henze amajikolo, si ga midza, kandi si ga gesa; kandi ga ta li nekideera, kinga ligungi; navutswa Nyasaye a ga hedza vyokulia: na si ndi mwinye mu vita amanyonyi

²⁵U li ha ku mwinye u nyala kumeda ubuhindiri bwibwe kali inyinga inkekeke nelihenda mwoyo?

²⁶Ni mu ta nyala kukola ni vikekeke ligali, kigira ki mu nyankana ku vindi?

²⁷Mu henze amadanya, kuli ga viruka: si ga yinzira, kandi si ga sita; navutswa mmu volera, Kali Solomoni mu bukumi bwibwe bwosi, si ya li yavalwa kuli lilala kugo.

²⁸Navutswa Nyasaye na a va ni yavala ubulimu bwomulimi bu veye ho lero, na mugamba bu tebwa mu kisambiru; na si ndi mwinye, mwinye avelisuuvira likekeke?

²⁹Kandi mu tenya vya mu li lia, kinga vya mu li nwa, kandi mu ta hayahayidza.

³⁰Kigira vindu yivi vyosi, tsihiri tsyomu lirova tsyenyanga: navutswa Dada wenyu a manya mu daka vindu yivi.

³¹Navutswa mwenye ubwami bwi bwe, nevindu yivi vyosi mu la medwa.

³²Mu ta tia, mwinye kyayo kikekeke; kigira Dada wenyu a yanza kumuha ubwami.

³³Mu gulidze vya mu veye navyo, mu tunge tsisadaka; mwelombere avene tsimuya tsi ta kunguha, akiba yomigulu i ta hendeka, homwivi a tisunda himbi, kandi hetsisere tsi tononnya.

³⁴Kigira ha akiba yenyu i veye, mwoyo gwenyu gu ve ho kandi.

³⁵Vikenge vyenyu vi bofwe, kandi tsitaya tsyenyu tsyaake;

³⁶kandi mwinye avene mu ve kuli avandu va linda mwami wavo, lwa a lirana kutwula mu kiserero; lwa a duka ni yigulihidza, va mwigulire nonoho.

³⁷Va veye nobugasu avatugwa avomwami a li nyola va linda lwa a duka: ligali mmu volera, a leboha a la vikalidza ku vyokulia, a ladza na a vihula.

³⁸Ni yadza mu bulindi bwa kaviri, kinga mu bwa kavaka, na a va nyola ndi, yava va veye nobugasu.

³⁹Navutswa mu manye yaga, mwene inyumba a va u manya inyinga mwivi a lidza, nkano ya linda, kandi nkano si a leka inyumba yeye i fulwe.

⁴⁰Mwinye kandi mwetegeke: kigira Mwana wa Adamu a lidza inyinga ya mu ta ganagana.

⁴¹Petro ya vola, Mwami, lugano yilu u kupi kwinye kweng'ine, naho vosi?

⁴²Naye Mwami ya vola, Ibwaha ni mulindi mulahi nomugeeri, womwami wewe a li vika ku avenyu mba yeye kuvaha vyokulia vyavo vya kase?

⁴³A veye nobugasu mutugwa uyu womwami a li nyola na a kola ndi lwa a lidza.

⁴⁴Ligali mmu volera, a la mu vika ku vindu vyosi vya a veye navyo.

⁴⁵Navutswa mutugwa uyu na a va na a vola mu mwoyo gwigwe, Mwami wange u lindagiye; na a tanga kukuya avatugwa avayai navatugwa avakana, na a lia na a nwa, na a hambika;

⁴⁶mwami womutugwa zana a ladza ku lidiku lya a ta ganagana, kandi ku isaa ya a ta manya, a la mu kalannya ligali, na a mu ha kidieli kikye halala na vatasuuvira.

⁴⁷Mutugwa uyu wa manya ubulaliri bwomwami wewe na a tetegeka, kandi na a ta kola kuli ubulaliri bwomwami wewe a la kuywa ligali.

⁴⁸Navutswa uyu wa vula kumanya na a kola vindu vi dukani nobukinduki, a la kuywa hakekeke. Ku vosi u hebwa vinyingi a la tevwa vinyingi: naye u hebwa vinyingi, va la mu teva vinyingi kuvita.

⁴⁹Ndadza kutsuka muliru ku lirova; nyenya ki ni gu mali kwaaka?

⁵⁰Navutswa mbeye nelibatidza lya ndi batidzwa nalyo; nigeywi ndi ku duka ku li nyole

⁵¹Mu ganagana ntsitsi kuha lirova mirembe? Mmu volera, Auwa: navutswa lyavukannya:

⁵²kigira kutwula kalunu va la va avandu vatanu mu inyumba indala, va lavukana vavaka na vaviri, kandi vaviri na vavaka.

⁵³Va lavukana ise nomuyai, kandi muyai na ise; kandi mama nomukana, kandi mukana na mama wewe; navizala na navizala, kandi navizala na navizala.

⁵⁴Kandi ya volera viduma, Lwa mu lola lilesi li singiye madioli, nonoho mu vola, Imbula i ladza; ma ga va ndiyo.

⁵⁵Lwa mu lola imbuudza yekusini ni i huudza, mu vola, Gu la va mbasu mululu; ma ga va ndiyo.

⁵⁶Mwinye avagadi, mu manya kugera mmoni mwelirova neligulu; navutswa kigira ki si mu manya kugera inyinga yiyi?

⁵⁷Kandi kigira ki mwinye avene si mu duka kuganagana ga li bulungi?

⁵⁸Kigira inyinga u veye ku inzira halala nomuhangalidzi wowo kutsia wa mukalagi, widinyiridze u duke ku bohololwa kuye ku inzira; gase a la ku hila wa mukalagi, kandi mukalagi a la ku hila ku musikari, kandi musikari a la ku vika mu inyumba yavahambe.

⁵⁹Nku volera, Si u twula mu ligali, u luhe u duke kutunga u malilidze isenti impelelidzi.