Read lulogooli Luka 14 Bible Online

Luka 14 - lulogooli bible

Luka 14

¹Lwa yingira mu inyumba yo mulala munene ku Vafarisayo ku lisabato kulagira ubukima, va mu henzeridza.

²Kandi henza, ya li ho imbiri wewe mundu mulala wa lwala mavimba lyokumubiri.

³Yesu ya tivula na a volera avegidzi velilaga na Vafarisayo, Nu bulahi kuhonnya ku lisabato naho mba?

⁴Navutswa va kiring'ana. Kandi ya mu gumira na a mu honnya, na a mu leka a tsie.

⁵Kandi ya va volera, U li ha ku mwinye, isukiri yeye kinga ing'ombe yeye ni i gwiye mu kidaho, si a li gi twulidza bwangu ku lidiku lyeliiabato?

⁶Navo si va nyala kutivula kandi ku vindu yivi.

⁷Ya kupa avalangwa lugano, lwa ya lola kuli va tovola visako vyavanene; na a va volera,

⁸Mundu na a ku langa mu kiserero, u tikala ku kisako kyomunene; gase mundu wa langwa u viti ive

⁹naye wa mu langa ive nuyu a iadza na a ku volere, Isundira mundu uyu; hene yaho u la tanga kwirana netsisoni ku kyomukekeke.

¹⁰Navutswa lwa u langwa, u tsie kwikala ku kyomukekeke; lwa yadza u ku langi a duke kukuvolera, Mulina, wisunde hambiri; kunangwa u la nyola ubwi dzominywi imbiri wa vosi vikaye kulia nive.

¹¹Kigira ku vosi weginga a la gehidzwa; nowegehidza mwene a la nenehidzwa.

¹²Kandi ya volera wa mu langa, Lwa u lomba vyokulia vyombasu kinga vyomgolova, u ta langa avalina vovo, kinga avamwavo vovo, kinga avandu venyu, kinga avatende vovo ava veye avatugi; gase va la ku langa kandi, nive u nyole ubutungwi.

¹³Navutswa lwa wenya kwihula u la langa avadaka, navadekere navaleema, navaboku:

¹⁴na ive u la va nobugasu; kigira si va veye nekya va ku tunga: kigira ive u la tungwa mu lisimuguka lyavalungi.

¹⁵Mulala kuvo avikala naye ku vyokulia, lwa ya hulira yaga, ya mu volera, A veye nobugasu u li lagira ubukima mu bwami bwa Nyasaye.

¹⁶Navutswa ya mu volera, Mundu mulala ya lomba vyokulia vinyingi vyomgolova na a langa avandu vanyingi.

¹⁷Naye inyinga yevyokulia vyomgolova, ya tuma mutugwa wewe kutsia kuvolera avalangwa, Hambi; kigira vindu vyosi vi lombeywi.

¹⁸Vosi va tanga halala kumugoonya u ku leke ku ve. Wambiri ya mu volera, Nguli mulimi, nyenya kutsia kugulola; nku goonya, mwadza, u mu volere a ndeke.

¹⁹Kandi wundi ya vola, Nguli tsing'ombe likumi tsi kola miyinzi, na inze ntsitsa kutsigeridza; nku goonya, mwadza, u mu volere a ndeke.

²⁰Wundi ya vola, Nkweye mukali, kigira yiki si nyala kuudza.

²¹Mutugwa yadza na a volera mwami wewe vindu yivi. Hene yaho mwene inyumba ya vihirirwa na a volera mutugwa wewe. Twula bwangu u tsie ku mihanda netsinzira tsyelidala, u vugule avadaka, navadekerana, navaboku, navaleema, u va lete hano.

²²Mutugwa ya vola, Mwami, aga u laga ga kole ywi, kandi ubwiyangu bu veyo.

²³Mwami ya volera mutugwa, Twula u tsie ku tsinzira tsyemilimi nomu tsinzebo, u va nige vingire, inyumba yange i duke kwizula.

²⁴Kigira mmu volera, Kuvo avalangwa si ha veye nomulala u li tsatsama ku vyokulia vyange.

²⁵Viduma vinene vya mu londa: naye ya girunkana na a va volera,

²⁶Mundu ni yadza ku inze na a ta dunyira dada wewe, na mama wewe, nomukali, navana, navamwavo, navabotso, yee neliva mwoyo lilye kandi, si a nyala kuva mwegidzwi wange mba.

²⁷Ku vosi u ta ginga musalaba gwigwe mwene a nonde, si a nyala kuva mwegidzwi wange mba.

²⁸U li ha ku mwinye, ni yenya kwombaka munara, na a ta tanga kwikala a validze hesabu, a lole vya a veye navyo ni vi va ni vi duka kugumala?

²⁹Gase a la vula kunyala kumala inyinga a mala kuvika musingi, navo vosi ava lola va tanga kumukolera kihenyahenye,

³⁰ni va vola, Mundu uyu ya tanga kwombaka, sia nyala kumala.

³¹Kinga ha veyenomwami ki, wa tsia kulwana nomwami wundi, na a ta tanga kwikala a lombe amakuva na a va na a nyala netsielfu likumi kuvugana na uyu wadza netsielfu amakumi gaviri?

³²Na a lola si a nyala, a la tuma mundu ku wundi na a kiri ihale, na a mwisayasayire mirembe.

³³Kunangwa ku mwinye vosi u ta leka vyosi vya a veye navyo si a nyala kuva mwegidzwi wange mba.

³⁴Munyu gu veye mulahi: navutswa kali munyu ni gwoneki, gu la kolwa ndi mulahi?

³⁵Si gu dukana kukonya mulimi kinga kitumi kyamavululi: avandu va gu sundula. U veye namatu gokuhulira, a hulire.