Read lulogooli Luka 19 Bible Online

Luka 19 - lulogooli bible

Luka 19

¹Yingira na a vita mu Yeriko.

²Henza, mundu wa langwa lieta, Zakayo; naye ya li munene ku vasololi vobushutu, kandi ya li mutugi.

³Naye yenya kulola Yesu, a veye ibwaha; navutswa si ya nyala kigira kiduma, kigira ya li mwimbi.

⁴Ya nyagula na a tsia imbiri na a nina ku mukuyu a duke kumulola: kigira a la duka kuvita ku inzira yeyo.

⁵Yesu lwa ya duka ha zana, ya henza igulu na a mu volera Zakayo, kola bwangu, wike; kigira lero nu bulahi ngunze hoho.

⁶Naye ya kola bwangu ni yika, na a mwingiridza nobuyanzi.

⁷Lwa va lola va monya vosi, ni va vola, U tsiye kugona homundu mwoni.

⁸Zakayo ya singira na a volera Mwami, Henza, Mwami, mbedza avadaka inusu vye vindu vyange ni mba ni nyaga mundu kali mulala, kindu, mmwi ranyira hali kane.

⁹Naye Yesu ya mu volera, Lero ubuhonnyi bu duki mu inyumba yiyi, kigira uyu kandi a veye mwana wa Abrahamu.

¹⁰Kigira Mwana wa Adamu yadza kwenya nokuhonnya kya gota.

¹¹Ni va ki hulira vindu yivi, ya meda amakuva na a kupa lugano, kigira ya li himbi Yerusalemi, kandi kigira va ganagana ubwami bwa Nyasaye bu la loleka nonoho.

¹²Kunangwa ya vola, Mundu munene mulala ya tsia mu kivala ihale kwenyolera ubwami nokwirana.

¹³Naye ya langa avatugwa veve likumi na a va ha tsiratili tsyefetha likumi, na a va volera, Mu gulannye nduhe nzidze.

¹⁴Navutswa ava ndu veve va mu dunyira ni va tuma avandu kumulonda, nokuvola, Si kwenya mundu uyu a kwamihire.

¹⁵Lwa ya mala kwirana, na a mali kunyola ubwami, ya haana munwa avatugwa ava ya ha if etha, va langwe, a duke kumanya ya va nyola mu bugulannyi bwavo.

¹⁶Wambiri yadza imbiri wewe, na a vola, Mwami, iratili yoyo i nyoye tsiratili likumi tsindi.

¹⁷Ya mu volera, U koli bulahi, ive mutugwa mulahi: kigira wa li nelisuuvirwa ku kakuzuzu ligali, u ve netsingulu ku madala likumi.

¹⁸Wakaviri yadza, na a vola, Mwami, iratili yoyo i nyoye tsiratili tsitanu.

¹⁹Kandi ya mu volera, Ive u ve ku madala gatanu.

²⁰Kandi wundi yadza na a vola, Mwami, henza iratili yoyo, ya nda gi vika mu kitambaya:

²¹kigira nda ku tia, kigira ive u veye mundu mudinyu: u vugula kya u ta vika, kandi u gesa ha u ta midza.

²²Ya mu volera, Ku munwa gugwo mwene nda ku kalagira, ive mutugwa mudamano. Ive wa manya inze mbeye mundu mudinyu, mbugula kya nta vika, ngesa ha nta midza;

²³kigira ki si wa vika if etha yange mu ibanki, na inze ku liduka lyange nkano nda ka gi nyola halala nevyambeti vyayo?

²⁴Ya volera avasingira naye, Mmu nyage iratili yeyo mmu he wetsiratili likumi.

²⁵Navo va mu volera Mwami, a veye netsiratili likumi.

²⁶Mmu volera, ku vosi u veye nakyo a la hebwa; navutswa u ta li nakyo a la nyagwa kali kya a veye nakyo.

²⁷Navutswa avasigu vange yava ava ta yanza inze nzamihe kuvo, mu va lete hano, mu viitire imbiri wange.

²⁸Lwa ya mala kuvola ndi, yimira kutsia kwanegira Yerusalemi.

²⁹Lwa ya duka himbi Bethfage na Betani, mu kigulu kya langwa Mizeituni, ya tuma avegidzwi vaviri,

³⁰na a vola, Mu tsie mu kadala ka engereka; lwa mu duka kwingira mu la nyola kimoli kvesukiri kiboheywi, kyomundu a kikiri kunina ku: mu ki boholole, mu ki lete.

³¹Mulala na a mu teva, Kigira ki mu ki boholola? Mu vole ndi, Mwami a kyenya.

³²Navo avatumwa va tsia ni va nyola kuli wa ya va volera.

³³Kandi lwa va boholola kimoli, avene va va volera, Kigira ki mu boholola kimoli?

³⁴Ni va vola, Mwami a kyenya.

³⁵Va ki leta ku Yesu: ni va vika tsingubo tsyavo ku kimoli, ni va nyinnya Yesu ku.

³⁶Na lwa a veye mu ligenda, va mwalira tsi ngubo tsyavo ku inzira.

³⁷Lwa ya duka himbi ha kisulungutu kyekigulu kye Mizeituni, kiduma kyosi kyavegidzwi kya tanga kusangala nokwidzominya Nyasaye nomwoyo munene kigira miyinzi minene gyosi gya va lola;

³⁸ni va vola, A veye nobugasu, Mugali yadza ku lieta lyo Mwami: mirembe migulu, nobukumi igulu ligali.

³⁹Avalala ku Vafarisayo ava li mu kiduma va mu volera Mwegidzi, u gaye avegidzwi vovo.

⁴⁰Naye ya tivula na a vola, Mmu volera, yava ni va kiring'ana, amagina ga la hanzuka.

⁴¹Kandi lwa ya duka himbi, ya lola lidala, na a li lirira,

⁴²na a vola, Ive nkano u manya, ive mwene, ku lidiku lya lero, ivindu vi veye vyemirembe gyigyo navutswa kalunu vi viseywi tsimoni tsitsyo, tsi vula kulola.

⁴³Kigira madiku ga li duka ku ive, gavasigu vovo va li ku kumbiridza nolugaga, kandi va li vodonkana, kandi va li kwigalira ha tsimbega tsyosi,

⁴⁴kandi va li ku tsoma hasi halala navana vovo mu ive; kandi si va li leka mu ive ligina lilala ku lindi; kigira ive si wa manya inyinga yelihenzwa lilyo.

⁴⁵Kandi yingira mu litempeli, na a tanga kutwulidza ava gulannya,

⁴⁶na a va volera, Ga ng'odwa, Kandi inyumba yange i la va inyumba yokusaala: navutswa mwinye mu gi koli luhangaywa lwavivi.

⁴⁷Kandi ya li ni yegidza kazozo mu litempeli. Navutswa avasalisi vanene navang'odi navanene vavandu venya kumwiita:

⁴⁸navutswa si va nyala kulola ga va nyala kukola; kigira avandu vosi va dinya kuye ni vihuliridza.