Read lulogooli Luka 20 Bible Online

Luka 20 - lulogooli bible

Luka 20

¹Ku lilala ku madiku zana, lwa yegidza avandu mu litempeli, ni yilwadza ivangeli, vadza kuye avasalisi vanene navang'odi halala navakulundu;

²ni va vola, ni va mu volera, U ku volere: U kola vindu yivi netsingulu ki? Kinga ibwaha wa ku ha tsingulu yitsi?

³Naye ya tivula na a va volera, Inze kandi nda mu teva likuva lilala; na mwinye mu mbolere:

⁴Libatidza lya Yohana, lya twula migulu naho ku vandu?

⁵Navo va volerana avene, ni va vola, Ni ku vola, Migulu; a la vola, Kigira ki mwinye mwa vula kumu suuvira?

⁶Navutswa ni ku vola, Ku vandu; avandu vosi va la ku lasa magina: kigira va bugirira Yohana ya li muprofeti.

⁷Kunangwa va tivula, Si ku nyala kuvola ha ya twula.

⁸Yesu ya va volera, Kandi inze si mmu volera tsingulu tsya nkolera vindu yivi.

⁹Kandi ya tanga kuvolera avandu, na a kupa lugano yilu: Mundu ya simika kizabibu, na a ha ava mu limira, na a tsia mu kivala kindi tsinyinga tsinyingi.

¹⁰Kandi ku muhiga, ya tuma mutugwa va mu he ku makuyu gekizabibu: navutswa avalimi va mu kuya, ni va mu kunga vutswa.

¹¹Kandi ya tuma wundi mutugwa: uyu kandi va kuya ni va mu kupidza kivi ligali, ni va mu kunga vutswa.

¹²Kandi ya tuma wa kola vavaka: uyu kandi va mwata tsing'oma, ni va mu ta kyova.

¹³Mwami wekizabibu ya vola, Nda kola ndi? Nda tuma mwana wange wa nyanza; mbula va la mu tia.

¹⁴Navutswa avalimi lwa va mu lola, va volerana avene, ni va vola Uyu a la lia miyandu; ku mwiite, miyandu gyi duke kuva gyetu.

¹⁵Va mu twulidza mu kizabibu ni va mwiita. Kigira yaga mwami wekizabibu a la va kola ndi?

¹⁶A ladza kwiita avalimi yava, kandi a la ha avandi mulimi. Navo lwa va ga hulira, va vola, Yaga ga ta va.

¹⁷Navutswa ya va henza na a vola, Ni kindu ki yaga ga ng'odeywi: Ligina lyavombaki vambakana, Yili lya lombwa kuva mutwe gwolwiga?

¹⁸Ku vosi u li gwa ku ligina yilyo a la vunika; navutswa wa li la gwira, li la mu duvulannya kuli lugukyi.

¹⁹Kandi avang'odi navasalisi vanene venya kumugumira isaa zana; navutswa va tia avandu: kigira va manya ya kupa lugano yilu kuvo.

²⁰Ma va mu linda, ni va tuma avaluti, avekola kuva avalungi, va duke kuvugula amakuva gege, va duke kumuzama ku serikale noku tsingulu tsyogovuna.

²¹Ni va mu teva ni va vola, Mwegidzi, ku manya ive u vola nokwegidza bulungi, kandi si u bugirira ligondo lyomundu, navutswa ligali wegidza inzira ya Nyasaye.

²²Nu bulahi kwinye ku he Kaisari ubushutu naho mba?

²³Navutswa ya lola ubugadi bwavo, na a va volera,

²⁴Mu mmannye ishilling. I veye nekiiwananyi namang'oda vya bwaha? Navo va mu volera, Vya Kaisari.

²⁵Kandi ya vola, Mu he Kaisari vindu vya Kaisari, kandi mu he Nyasaye vindu vya Nyasaye.

²⁶Navo si va nyala kugumira livola yili imbiri wavandu: ni va genya litivula lilye, ni va kiring'ana.

²⁷Avalala ku Vasadukayo ava vola si ha veye nelisimuguka; vadza kuye;

²⁸ni va mu teva, ni va vola, Mwegidzi, Musa ya ku ng'odira, amwavo womundu na a kudza na a veye nomukali, na a kikiri kwivula, amwavo wewe yirannye mukali, yivu lire amwavo wewe avana.

²⁹Ha li avamwavo vatanu na vaviri vomu ndu mulala: wambiri ya leta mukali, ma na a kudza na a kikiri kwivula;

³⁰kandi wa kaviri ya mu hila:

³¹kandi wa kavaka ya mu hila; ga li ndiyo ku vosi vatanu na vaviri, va kudza bugira avana.

³²Lwanyima kandi mukali mwene ya kudza.

³³Kunangwa mu lisimuguka, a la va mukali wa u li ha? Kigira ya li mukali wa vatanu na vaviri.

³⁴Yesu ya va volera, Avana venyinga yiyi va kwedza ni va sererwa:

³⁵navutswa yavo ava volangwa kudukana kunyola inyinga yeyo nelisimuguka mu vakudzi si va kwedza, kandi si va sererwa:

³⁶kigira si va nyala kukudza kandi: kigira va leng'ana netsingelosi: kandi va veye avana va Nyasaye, va veye avana velisimuguka.

³⁷Navutswa avakudzi va simugukidzwa kali Musa ya vuula mu makuva gakasala, lwa ya langa Mwami, Nyasaye wa Abrahamu, Nyasaye wa Isaka, Nyasaye wa Yakobo.

³⁸Navutswa si a li Nyasaye wavakudzi, navutswa wava veye mwoyo: kigira vosi va veye mwoyo kuye.

³⁹Avalala ku vang'odi va tivula ni va vola, Mwegidzi, u voye bulahi.

⁴⁰Kigira si va lema mwoyo kandi kumuteva kali hakuzu.

⁴¹Kandi ya va volera, Va vola ndi Kristo a veye mwana wa Daudi?

⁴²Kigira Daudi mwene a vola mu kitabu kya Zaburi, Mwami ya volera Mwami wange, Wikale ku mukono gwange mulungi,

⁴³Nduhe nduke kukola avasigu vovo va ve kisako kyevirenge vivyo.

⁴⁴Ku yaga Daudi a mu langa Mwami, kunangwa a veye ndi mwana wewe?

⁴⁵Kandi ha vandu vosi va hulira, ya volera ho avegidzwi veve,

⁴⁶Mu gelihe ku vang'odi, ava yanza kugendera tsingubo tsintambi, kandi ava yanza kuchelidzwa mu vitu, nevisako vinene mu masomero, na ha bunene mu lilia;

⁴⁷ava lia tsinyumba tsyavakunzakali, kandi va saala namakuva manyingi ku bugadi. Yava va la nyola likalagirwa linene.