Read lulogooli Luka 21 Bible Online

Luka 21 - lulogooli bible

Luka 21

¹Kandi ya henza na a lola avatugi ava vika tsisadaka tsyavo mu inyumba yetsishilling mu litempeli.

²Kandi ya lola mukali mulala mukunzakali mudaka na a vika mu tsisenti tsiviri.

³Naye ya vola Ligali mmu volera, Mukunzakali uyu mudaka u viki kuvita yava vosi:

⁴kigira yava vosi va viki mu tsisadaka ku bunyingi bwavo; navutswa ku budaka bwibwe u viki vyosi vya a honera navyo.

⁵Kandi avalala lwa va vola amakuva gelitempeli, kuli li lombwa namagina malahi nevyahaanwa, ya vola,

⁶Ku vya mu lolanga, amadiku ga la duka, mu yago ligina lilala si li li tigala ku lindi hano, li ta tsomwa hasi.

⁷Kandi va mu teva, ni va vola, Mwegidzi, vindu yivi vi la va inyinga ki? Kandi kilolekidzu ki la va ndi lwa vyenya kuduka?

⁸Ya vola, Mu gelihe, mu ta gadwa: kigira vanyingi va ladza mu lieta lyange, ni va vola, Inze niye; kandi inyinga i veye himbi: mu ta va londa.

⁹Kandi lwa mu li hulira amakuva gamahe nekivihiri, mu ta tia mba; kigira vindu yivi vi la tanga kukolwa; navutswa kiheri si ki duka nonoho.

¹⁰Hene yaho ya va volera, Ihiri nehiri va la vukerana, ubwami nobwami bu la vukerana;

¹¹kandi li la va lidegera linene lyelirova, kandi tsitodzo netsinkudzo ihale ne hale; kandi ubutihidzi nevilolekidzu vi la twula migulu.

¹²Navutswa imbiri wevindu yivi va la mu gumira, kandi va la mu kupidza kivi, va mu zama ku avamasomero kandi mu tsinyumba tsyavahambe, kandi mu la hilwa imbiri wavami navanya mpara kigira lieta lyange.

¹³Vi la mu girunkanira kugwa kilolekidzu.

¹⁴Kigira yaga mu saavire mu myoyo gyenyu, mu ta ganagana imbiri aga mu li tivula:

¹⁵kigira nda mu ha munwa nobugeeri, bwavasigu venyu va li vula kunyala kuhangala nokutivula.

¹⁶Navutswa kali avivuli venyu navamwavo venyu, naviko venyu navalina venyu va la mu zama, na valala ku mwinye va la mwiite.

¹⁷Kandi avandu vosi va la mu dunyira kigira lieta lyange.

¹⁸Kandi lisu lyoku mitwe gyenyu si li li gota kali lilala.

¹⁹Ku bwikudzihidzi bwenyu mu la nyola myoyo gvenyu.

²⁰Navutswa lwa mu li lola Yerusalemi ni li kumbiridzwa namahe, mu manye lyoneka lyalyo li veye himbi.

²¹Hene yaho ava veye mu Buyuda virukire mu vigulu; navo ava veye hagati he lidala virukire kyova, kandi ava veye mu bulimu va tingira mu.

²²Kigira yaga na madiku gokumala kisalya, vyosi vi ng'odeywi vi nyole kuduka.

²³O bayaye bu veye kuvo ava li va inda, navo ava li nyunnya mu madiku yago kigira kivi kinene ki la va ku lirova, kandi ubutima ku vandu yava.

²⁴Kandi va la gwa ku bwogi bwekivavi, kandi va la hilwa avahambe mu tsihiri tsyosi: Tsihiri tsi la duvaga Yerusalemi, kuduka tsinyinga tsye Tsihiri tsi hera.

²⁵Kandi vi la va vilolekidzu ku liuva, noku mweli, noku tsing'ereng'ani; kandi ku lirova lihenda myoyo lyetsihiri, neligenya kigira muhumu gwenyanza neviguvuli vyayo,

²⁶avandu va kudza mu myoyo kigira ubutii nokulinda vindu vidzanga mu lirova: kigira tsingulu tsyomigulu tsi la sung'uswa.

²⁷Hene yaho va la lola Mwana wa Adamu yadzira mu lilesi netsingulu nobukumi bunene.

²⁸Navutswa lwevindu yivi vi li tanga kuduka, mu luvirire, mu digulule mitwe gyenyu: kigira libohololwa lisunda himbi.

²⁹Kandi ya va kupira lugano: Mu henze mukuyu, kandi imisala gyosi:

³⁰inyinga gyi sibuka, mu gyi lola, kandi mwinye avene mu manya inyinga yeligesa i veye himbi.

³¹Kandi ndiyo mwinye lwa mu li lola vindu yivi vi kolangwa, mu manye ubwami bwa Nyasaye bu veye himbi.

³²Ligali, mmu volera, Likula yili si li nyala kuvita vindu vyosi vi luhe vi duke kukolwa.

³³Ligulu nelirova li la vita: navutswa amakuva gange si ga li vita mba.

³⁴Navutswa mwinye mu gelihe gase myoyo gyenyu gyi la minika nobuhuvali nobuhambiki nobunyankani bwelivamwoyo yili, kandi lidiku yilyo li la mu nyola bwangu kuli mutego:

³⁵kigira li la duka ndiyo ku vosi ava menya ku lirova lyosi.

³⁶Navutswa mwinye mu linde kazozo, mu saale, mu duke kunyola tsingulu kuhona mu vindu yivi vyosi vi li duka, nokusingira imbiri wo Mwana wa Adamu.

³⁷Madiku gosi mbasu ya li ni yegidza mu litempeli; namadiku gosi ubudiku ya twula na a tsia kugona mu kigulu kya langwa Mizeituni.

³⁸Kandi avandu vosi vadza mugamba tsuri mu litempeli kumuhulira.