Read lulogooli Luka 22 Bible Online

Luka 22 - lulogooli bible

Luka 22

¹Lilia lyobukima li ta li namamera lya langwa Lipasaka, lya li himbi.

²Kandi avasalisi vanene navang'odi venya inzira yokumwiita; kigira va tia avandu.

³Kandi Setani yingira Yuda wa langwa Iskarioti, mulala ku va li likumi na vaviri.

⁴Kandi ya twula na a tsia kuvolerana navasalisi vanene navanyampara, kuli wa a nyala kumuzama kuvo.

⁵Navo va yanza, ni va lagana naye kumuha ifetha.

⁶Kandi ya bugirira, ni yenya ubwiyangu bwokumuzama kuvo bugira kiduma ho.

⁷Lidiku lyobukima bu ta li namamera lya duka, kulyo bwa li bulahi kwiita ligondi lyelipasaka.

⁸Ya tuma Petro na Yohana, na a vola, Mu tsie, mu ku lombere lipasaka, ku lie.

⁹Kandi va mu volera Wenya ku ku lombere ha li ha?

¹⁰Naye ya va volera, Henza, lwa na mwingire mu lidala mu la vugana nomundu na a gingi isiongo yamadzi; mu mu londe mu inyumba ya na yingire mu.

¹¹Kandi mu la volera mwene inyumba, Mwegidzi a ku volera, Inyumba yavageni i veye ha li ha, ya ndi liira mu lipasaka navegidzwi vange?

¹²Naye a la mu mannya inyumba inene yigulu i lombeywi: mu lombe yimu.

¹³Kandi va tsia, ni va nyola kuli wa ya va volera: ni va lombera mu lipasaka.

¹⁴Isaa lwa ya duka, yikala, navatumwa halala naye.

¹⁵Kandi ya va volera, Likayirwa nkayirwa kulia lipasaka yili halala nemwinye ni nkikiri kusaliridzwa:

¹⁶kigira mmu volera, Si nda li lia kandi, li luhe li duke kukolwa mu bwami bwa Nyasaye.

¹⁷Kandi ya vugula kikombe, na lwa ya mala kusantidza, ya vola, Mu vugule yiki, mu gavulane:

¹⁸kigira mmu volera, Inze si nda nwa kandi amakuyu gemizabibu, bu luhe budze ubwami bwa Nyasaye.

¹⁹Kandi ya vugula ubukima, na lwa ya mala kusantidza, ya megannya na a va ha, na a vola, Yibu nu mubiri gwange gu haanwa kigira mwinye: mu kole yiki kunzidzulitsa.

²⁰Kandi ndiyo kikombe inyima yokumala lilia, na a vola, Kikombe yiki ki veye amalagano amahya agoku masahi gange, aga sundulwa kigira mwinye.

²¹Navutswa henza, mukono gwoyu u nzama gu veye ninze halala ku imeza.

²²Kigira Mwana wa Adamu a tsia ligali kuli u saaveywi: navutswa bayaye bu veye ku mundu uyu u li mu zama

²³Ni va tanga kutevana avene, ni bwaha kuvo u li kola kindu yiki.

²⁴Ga duka amahangali kuvo, u li ha kuvo u langwa munerle.

²⁵Naye ya va volera, Avami ve Tsihiri vamiha kuvo: kandi ava veye netsingulu kuvo va langwa Avavakolerabulahi.

²⁶Navutswa mwinye mu ta va ndiyo: navutswa uyu u veye munene ku mwinye, a gwe kuli mukekeke; noyu wamiha a ve kuli u tumika.

²⁷Kigira u veye munene nu u li ha, wikaye ku vyokulia, naho u tumika? Si a li uyu wikaye ku vyokulia? Navutswa inze mbeye hagati henyu kuli u tumika.

²⁸Navutswa mwinye nivo ava hongera ninze nuligeridzwalyange;

²⁹kandi inze mmu vikira ubwami kuli Dada ya mbikira ubwami,

³⁰mu duke kulia nokunwa ku imeza yange mu bwami bwange; kandi mu likala ku visako vyobwami mu kalagira tsihiri likumi na tsiviri tsya Israeli.

³¹Simoni, Simoni, henza, Setani ya mwenya, a duke kumusesa kuli ingano:

³²navutswa inze mmali kukusaalira, lisuuvira lilyo li ta geha; kandi ive lwa u li mala kwirana, u luviridze avamwavo vovo.

³³Naye ya mu volera Mwami, nzetegeki kutsia halala nive mu libofwa kandi mu likudza.

³⁴Naye ya vola, Nku volera, Petro, lero idaywa si i la lagula ive u luhe u duke kunyambakana hali kavaka, si u mmanya.

³⁵Kandi ya va volera, Lwa nda mu tuma kutsia bugira isyaho nemuya, nevilatu, mwa daka kindu? Navo va mu volera, Auwa.

³⁶Kandi ya va volera, Navutswa kalunu u veye nemuya a vugule, kandi isyaho ndiyo; no u ta veye nakyo, a gamannye ingubo yeye a gule kivavi.

³⁷Kigira mmu volera, Yago aga ng'odwa, ga niga ga dukidzwe ku inze, Naye ya validzwa halala navoni: kigira aga veye ku inze ga veye neliduka.

³⁸Navo va mu volera, Mwami, henza, hano vivavi viviri. Naye ya va volera, Vi duki.

³⁹Kandi ya twula na a tsia mu kigulu kya Mizeituni, kuli miima gyigye; navegidzwi veve va mu londa.

⁴⁰Lwa ya duka ha zana, ya va volera, Mu saale mu tingira mu ligeridzwa.

⁴¹Mwene yavukana navo kuli ha u nyala kulasa ligina; na a sigama na a aala,

⁴²na a vola, Dada, Ive nu u lalira, u ntwulidzire kikombe yiki: navutswa ga ta va kuli ubulaliri bwange, navutswa ga ve kuli ubulaliri bubwo.

⁴³Kandi ya loleka kuye ingelosi ya twula migulu, ya mu ha tsingulu.

⁴⁴Naye ya li mu busa liri, na a kira kusaala ligali; kandi ulugeri lwilwe lwa gwa kuli lito nyatonya linene lyamasahi li tonya hasi.

⁴⁵Kandi lwa ya singira kutwula ku lisaala lilye, yadza ku vegidzwi veve, na a va nyola va gona tsindolo kigira ubuvereri,

⁴⁶na a va volera, Kigira ki mu gona tsindolo? Vuki mu saale mu tingira mu ligeridzwa.

⁴⁷Na a ki vola, henza, kiduma, kandi uyu wa langwa Yuda, mulala ku va li likumi na vaviri, ya vimirira; kandi yisunda himbi ku Yesu kumubusa.

⁴⁸Navutswa Yesu ya mu volera, Yuda, U zama Mwana wa Adamu nelibusa?

⁴⁹Navo ava li halala naye, lwa va lola agandi genya kulonda va vola, Mwami ku teme nekivavi?

⁵⁰Kandi muiala kuvo ya tema mutugwa womusalisi munene na a mu kala gutu gu veye ku luvega lwomukono mulungi.

⁵¹Navutswa Yesu ya tivula na a vola, Mu va leke va duke ndi. Kandi ya mu dira gutu gwigwe, na a mu honnya.

⁵²Kandi Yesu ya volera avasalisi vanene, navanyampara velitempeli, navakulundu, ava mu twulira, Mu twula nevivavi netsimpimbo kuli mu twulira mwivi?

⁵³Lwa nda li halala nemwinye kazozo mu litempeli, si mwa nyira amakono genyu kungumira: navutswa yiyi ni isaa yenyu, neyetsingulu tsyekisundi.

⁵⁴Navo va mu gumira, ni va mwimirira, ni va mu leta mu inyumba yomusalisi munene. Navutswa Petro ya londerera ihale.

⁵⁵Lwa va mala kufwana muliru hamgidzi hagati, ni vikala halala, Petro yikala hagati havo.

⁵⁶Mukana mulala mutu gwa, ya mu lola ni yikaye ha bulavu bwomuliru na a mwumika, na a vola Mundu uyu kandi ya li halala naye.

⁵⁷Navutswa yambakana, na a vola, Mukali, si mmu manya mba.

⁵⁸Inyima hakekeke, wundi ya mu lola, na a vola, Ive kandi u veye mulala kuvo. Navutswa Petro ya vola, Mundu ive, si mbeye ku mba.

⁵⁹Kandi inyima yesaa indala wundi ya vola nobuluviriri, na a vola, Ligali mundu uyu ya li halala naye; kigira a veye Mugalilaya.

⁶⁰Navutswa Petro ya vola, Mundu ive, Si mmanya ga u vola. Nonoho na a ki vola, idaywa ya lagula.

⁶¹Kandi Mwa mi yekevuka, na a henza Petro. Na Petro yidzulitsa likuva lyo Mwami kuli wa ya mu volera, Lero idaywa ni i kikiri kulagula u la nyambakana hali kavaka.

⁶²Ya twula na a lira nobuvereri bunene.

⁶³Kandi avandu ava gumira Yesu va mu kolera kihenyahenye, ni va mu duya.

⁶⁴Kandi va mu fuma tsimoni tsitsye ni va mu teva, ni va vola, Profeta: ibwaha u ku duya?

⁶⁵Kandi va vola kuye amakuva gandi manyingi gokumunyega.

⁶⁶Lwa bwa kya nonoho kiduma kyavakulundu vavandu kya vugana, avasalisi vanene navang'odi vombi; ni va mu hila kutsia mu kiyalo kyavo, ni va vola,

⁶⁷Ive nu u va nu u veye Kristo, u ku volere. Navutswa ya va volera, Kali ni mmu volera, si mu li suuvira:

⁶⁸kandi ni mmu teva, si mu li tivula.

⁶⁹Navutswa kutwula kalunu Mwana wa Adamu a likalidzwa ku mukono mulungi gwetsingulu tsya Nyasaye.

⁷⁰Kandi vosi va vola, Ive niye Mwana wa Nyasaye? Ya va volera, Mwinye mu vola inze niye.

⁷¹Navo va vola, Ku daka ki kandi kyokulolekidza? Kigira kwinye avene ku mali kuhulira ku munwa gwigwe.