Read lulogooli Luka 23 Bible Online

Luka 23 - lulogooli bible

Luka 23

¹Kiduma kyosi kuvo kya singira ni va mu hila imbiri wa Pilatu.

²Va tanga kumuyala, ni va vola, Kwa nyola mundu uyu na a girunkannya ihiri yetu, na a vambaka nnya kutunga Kaisari ubushutu, na a vola, mwene a veye Kristo, mwami.

³Pilatu ya mu teva na a vola, Ive niye Mwami wa Vayuda? Na ya mu tivulira na a vola, Ive u vola.

⁴Kandi Pilatu ya volera avasalisi vanene neviduma, Si ndola kindu ku mundu uyu.

⁵Navutswa va kira ligali, ni va vola, A gemehidza avandu, ni yegidza mu Buyuda mwosi kandi kutanga Galilaya nokuduka hano.

⁶Navutswa Pilatu lwa ya hulira, ya teva nkani mundu uyu no Mugalilaya.

⁷Kandi lwa ya manya a veye mu makono ga Herodi, ya mu hila ku Herodi, wa li na a veye mu Yerusalemi mu madiku yago.

⁸Herodi lwa ya lola Yesu ya yanza ligali: kigira ya li na a kayirwa kumulola kutwula kale, kandi kigira ya hulira amakuva kuye; kandi ya suuvira kulola kilolekidzu kya a li kola.

⁹Kandi ya mwizodza ama kuva manyingi; navutswa si ya tivula kindu.

¹⁰Kandi avasalisi navang'odi va singira, ni va mu yala budinyu.

¹¹Herodi navasikari veve va mu lega ni va mu kolera kihenyahenye ni va mu vika t singubo tsindahi ni va mwirannya wa Pilatu.

¹²Herodi na Pilatu va hambana ubulina lidiku zana yilyo: kigira lwambiri va li ni va henzana ubusigu.

¹³Kandi Pilatu ya vugannya avasalisi vanene navanene navandu,

¹⁴na a va volera, Mu ndeteye mundu uyu kuli u girunkannya avandu: kandi henza, inze mmali kumwizodza imbiri wenyu, si ndola kindu ku mundu uyu kali kilala ku ga mu mu yalira:

¹⁵kandi Herodi ndiyo: kigira u mwirannyiye ku kwinye. Kandi henza, si a veye nekindu kuye ki dukana nelikudza.

¹⁶Kigira yaga nda mu kuya ma mmu boholole.

¹⁷Ga mu niga kuvabohololera mulala inyinga ye lilia yili.

¹⁸Navutswa va hanzuka nomwoyo mulala, ni va vola, U twulidze mundu uyu, u ku bohololire Baraba:

¹⁹naye nu mulala wa vikwa mu inyumba yava hambe kigira ligemehidza, neliita lya kolwa mu lidala.

²⁰Na Pilatu ya va volera kandi ni yenya kuboholola Yesu.

²¹Navutswa va hanzuka ni va vola, Mbambe, Mbambe.

²²Naye ya va volera hali kavaka, Kigira ki? Mundu uyu a kola ubudamano ki? Si ndola kindu kuye ki dukana nelikudza: kigira yaga nda mu kuya ma mmu boholole.

²³Navutswa va kira ligali kuginga myoyo gyavo, ni va saava, a bambwe. Kandi myoyo gyavo gya guuta.

²⁴Pilatu ya haana munwa ga ve kuli wa venya.

²⁵Kandi ya boholola uyu wa vikwa mu inyumba yavahambe kigira ligemehidza neliita, uyu wa va saava; navutswa ya haana Yesu a kolwe kuli wa va yanza.

²⁶Navo lwa va mu hila, va gumira mulala Simoni wa Kurene, na a twula mu mulimi, ni va mu dwika musalaba a gu ginge, a londe Yesu.

²⁷Kandi kiduma kinene kyavandu kya mu londa, kandi kyavakali ave duya ni va mu syomera.

²⁸Navutswa Yesu ya girunkana, na a va volera, Avakana ve Yerusalemi, mu ta ndirira, navutswa mwelirire avene navana venyu.

²⁹Kigira, henza, madiku gadza aga va li vola, Va veye nobugasu avagumba, netsinda tsi vula kwivula, netsimbeere tsi vula kunyunnya.

³⁰Hene yaho va la tanga kuvolera vigulu, Mu ku gwire; no tugulu, Mu ku kunike.

³¹Kigira vindu yivi ni vi kolwa mu musala muvisi, mu mwumu vi la va ndi?

³²Kandi va hilwa halala naye avandi vaviri, ava kola ubudamano, va tsie kwiitwa.

³³Lwa va duka ha langwa Kihanga, va mu bamba yaho, kandi avakola ubudamano, mulala ku mukono mulungi nowundi ku mukono mmosi.

³⁴Kandi Yesu ya vola Dada u va samehe, kigira si va manya ga va kola. Va gavana tsingubo tsitsye ni va kola ikura.

³⁵Na vandu va singira, ni va henza. Kandi avanene va mu kolera kihe nyahenye ni va vola, Ya honnya avandi; yehonnye mwene, uyu na a va na a veye Kristo wa Nyasaye, mutovole wewe.

³⁶Na vasikari kandi va mu kolera kihenyahenye, ni vadza kuye ni va mu letera siki,

³⁷ni va vola, Ive nu u va Mwami wa Vayuda, wehonnye mwene.

³⁸Kandi amang'oda ga li kuye higulu, UYU NU MWAMI WAVAYUDA.

³⁹Mulala ku va kola budamano ava sungwa, ya mu nyega, na a vola, Ive si u veye Kristo? Wehonnye mwene nekwinye.

⁴⁰Navutswa wundi ya tivula na a mu gaya, na a vola, Ive si u tia kali Nyasaye, kigira u veye mu likalagirwa yili?

⁴¹Na ligali ga ku dukira kwinye; kigira kwinye ku koleywi ki dukana nemi yinzi gyetu: navutswa mundu uyu si ya kola kindu kidamano mba.

⁴²Kandi ya vola, Yesu, u nzidzu litse lwa u li duka mu bwami bubwo.

⁴³Naye ya mu volera, Ligali nku v olera, Lero u ia va ninze mu Paradisi.

⁴⁴Inyinga yeyo ya li kuli isaa yenya kuduka tsitanu na indala, kandi kisundi kya duka mu kivala kyosi kuduka isaa i kola tsitanu na tsine,

⁴⁵ubulavu bweliuva bwa gota: kandi ingubo yelitempeli ya tandulwa hagati.

⁴⁶Kandi Yesu ya hanzuka nomwoyo munene, na a vola, Dada, mbika mwoyo gwange mu makono gogo. Lwa ya mala kuvola yaga ya lakula mwoyo gwigwe.

⁴⁷Munyampara, lwa a lola aga kolwa, yidzominya Nyasaye, na a vola, Ligali uyu ya li mundu mulungi.

⁴⁸Kandi viduma vyosi vya vugana kulola vindu yivi, lwa vya lola vya kolwa, virana ni viduya ku viritu.

⁴⁹Kandi vosi ava ma nyana naye, kandi avakali ava mu londa kutwula Galilaya, va singira ihale ni va lola vindu vivi.

⁵⁰Kandi henza, mundu wa langwa Yosefa wa li munene wekyina, mundu mulahi nomulungi

⁵¹(si ya bugirira amakuva gavo nemivinzi gyavo), mundu wa Arimatia, lidala lya Vayuda, wa lindirira ubwami bwa Nyasaye.

⁵²Mundu uyu ya tsia wa Pilatu, na a saava mubiri gwa Yesu.

⁵³Kandi ya gwikidza na a gu naza nengubo yekatani, na a mu vika mu kilindwa kya kalagwa mu ligina, kyomundu a kikiri kuvikwa mu.

⁵⁴Kandi lya li lidiku Lyokulomba, kandi lisabato lya tanga kuduka.

⁵⁵Kandi avakali ava mu londa kutwula Galilaya, va londa ni va lola kilindwa, kandi kuli wa mubiri gwigwe gwa vikwa.

⁵⁶Kandi virana ni va lomba vyafunya mwayu namaguta.