Read lulogooli Luka 6 Bible Online

Luka 6 - lulogooli bible

Luka 6

¹Ku lidiku lilala lyelisabato ya li na a vita mu milimi gyengano; navegidzwi veve va tavula vyangala, va vivunga mu makono gavo ni va lia.

²Navutswa avalala ku Vafarisayo va vola, Kigira ki mu kola agomugyiru mu lidiku lyelisabato?

³Yesu ya va tivulira na a vola, Si mwa soma kali yaga aga Daudi ya kola lwa ya li nenzala, navo ava ya li naye,

⁴kuli wa yingira mu inyumba ya Nyasaye, na a vugula milango gyokumannyira na a lia, kandi na a ha ku ava ya li navo; nagyo nu mugyiru kulia, navutswa avasalisi veng'ine?

⁵Kandi ya va volera, Mwana wa Adamu a veye mwami welisabato.

⁶Kandi ku lisabato lindi, yingira mu lisomero ni yegidza: ya li mu mundu wa ng'era mukono mulungi.

⁷Avang'odi na Vafarisayo va mu henza kulola na a va na a mu honnya ku lisabato, va nyole inzira yokumuyala.

⁸Navutswa ya manya tsiganagani tsyavo; na a volera mundu wa ng era mukono, Singira, udze hagati. Yadza na a singira.

⁹Yesu ya va volera, Mmu teva, Nu bulahi ku lisabato kukola bulahi, naho kukola budamano? Kuhonnya mwoyo naho kugudividza.

¹⁰Ya va henza vosi, na a mu volera, Nyira mukono gugwo. Na a kola: na mukono gwigwe gwa lungikidzwa.

¹¹Navutswa vizula ubutima; ni va volerana avene aga va nyala kukola ku Yesu.

¹²Mu madiku yago ya twula na a tsia mu kigulu kusaala; ya hongera kusaala Nyasaye ubudiku bwosi.

¹³Lwa bwa kya, ya langa avegidzwi veve; na a tovola kuvo likumi na vaviri, ava ya langa avatumwa:

¹⁴Simoni, wa ya langa kandi Petro, na Andreya amwavo wewe, na Yakobo na Yohana, na Filipu na Bartlomeyo,

¹⁵na Matayo, na Tomasi, na Yakobo wa Alfayo, na Simoni wa langwa Zelote,

¹⁶na Yuda wa Yakobo, na Yuda Iskarioti, wa gwa muzami.

¹⁷Ya sulunguta navo, na a singira mu kiguti, nekiduma kinene kyavegidzwi veve, navandu vanyingi va twula Buyuda bwosi ne Yerusalemi nomu kivala kya Turo na Sidon ku luginga lwenyanza, vadza kumuhulira nokuhonnywa tsinkudzo tsyavo;

¹⁸navo va nyangidzwa na roho midamano va honnywa.

¹⁹Na kiduma kyosi kyenya kumudira; kigira tsingulu tsya twula kuye ni tsi va honnya vosi.

²⁰Ya henza avegidzwi veve, na a vola, Mu veye nobugasu, mwinye avadaka: kigira ubwami bwa Nyasaye nu bwenyu.

²¹Mu veye nobugasu mwinye ava veye nenzala kalunu: kigira mu liguta. Mu veye nobugasu ava liranga kalunu; kigira mu la seka.

²²Mu veye nobugasu, mwinye, avandu lwa va li mu dunyira, kandi lwa va li mwesigana, nokumunyega, nokuta lieta lyenyu kuli li veye lidamano, kigira Mwana wa Adamu.

²³Ku lidiku yilyo mu sangale, mu kine nobuyanzi: kigira henzi, madanyi genyu ga veye ma nene migulu; kigira avaguga vavo va kola ndiyo ku vaprofeti.

²⁴Navutswa mu la lola ubudamano, mwinye avatugi kigira mu mali kunyola lihodzeridza lyenyu.

²⁵Mu la lola ubudamano mwinye, avahinda kalunu kigira mu la va nenzala. Mu la lola ubudamano, mwinye avaseka kalunu kigira mu la verera nokulira.

²⁶Mu la lola ubudamano mwinye, avandu vosi lwa va mu laha bulahi kigira avaguga vavo va kola ndiyo ku vaprofeti vobubehi.

²⁷Navutswa mmu volera, mwinye avahulira, Mu yanze avasigu venyu, mu kolere bulahi ava mu dunyira,

²⁸mu saavire ubugasu ava mu nyega, kandi mu saalire ava mu kolera ubudamano.

²⁹U ku duya ku lusaya lulala, u mu girunkanyire lundi; kandi u ku nyaga ijoho yoyo u leke a hile kandi likoti lilyo.

³⁰U he vosi ava ku saala; kandi u ku nyaga vindu vivyo, u ta mu teva kandi mba.

³¹Kuli mwinye mwe nya avandu va mu kolere, kandi mu va kolere ndiyo.

³²Mwinye ni mu yanza ava mu yanza, mu nyoye lidzominywa ki? Kigira kali avoni va yanza ava va yanza.

³³Ni mu kolera bulahi ava mu kolera bulahi, mu nyoye lidzominywa ki? Kigira kali avoni va kola ndiyo.

³⁴Ni mu ha mundu kivete ha mu suuvira mu la nyola kindu mu nyoye lidzominywa ki? Kigira kali avoni va hedza avoni avandi ki vete, ma viranyirwa kuli vya zana.

³⁵Navutswa mu yanze avasigu venyu, mu kole bulahi, mu hambidzane kivete mu ta suuvira mu liranyirwa; na madanyi genyu ga la va manene, kandi mu la va avana va Uveye Igulu Ligali: kigira a veye mulahi ku ava ta santidza navadamano.

³⁶Mu ve netsimbabasi, kuli Dada uenyu a veye netsimbabasi.

³⁷Mu ta kalagira, na mwinye si mu li kalagirwa mba: kandi mu ta kyaya, na mwinye si mu la kyaywa mba: mu sameha na mwinye mu la samefwa.

³⁸Mu haane na mwinye mu la hebwa; kigero kilahi kigatirangwa kandi ki sung'usangwa vi duka kusalika, ndiyo va la mu ha mu viritu vyenyu. Kigira ligera lya mu gera, lilyo lya mu li gererwa.

³⁹Kandi ya va kupa lugano, Mboku a nyala kwimirira mboku wakye? Si va la gwa vombi mbogo?

⁴⁰Mwegidzwi si a vita mwegidzi wewe: navutswa ku vosi u mali kwega ligali a la va kuli mwegidzi wewe.

⁴¹Kandi kigira ki ive u lola lindu li veye mu imoni yamwavo wowo, navutswa musala gu veye mu imoni yoyo gwa u ta ganagana?

⁴²Kinga u la nyala ndi kuvolera amwavo wowo, Amitu, u leke, nku twulidze lindu mu imoni yoyo, na ive mwene si u lola musala gu veye mu imoni yoyo? Mugadi ive, u tange kutwulidza musala gu veye mu imoni yoyo, kunangwa u la lola bulahi kutwulidza lindu li veye mu imoni yamwavo wowo.

⁴³Kigira si ha li nomusala mulahi gwamanga makuyu madamano; kandi si ha li nomusala mudamano gwamanga makuyu malahi.

⁴⁴Kigira misala gyosi gyi manyekana ku makuyu gagyo. Kigira ku amafwa avandu si vagula makuyu, kandi ku matagalu si vagula mazabibu.

⁴⁵Mundu mulahi ku vindu vyomwoyo gwigwe, a twulidza vindu vilahi; nomundu mudamano, ku vindu vidamano vyomwoyo gwigwe, a twulidza vindu vidamano: kigira ku vindu vya kira mu mwoyo, munwa gwigwe gu vola.

⁴⁶Kandi kigira ki mu nanga, Mwami, Mwami, navutswa si mu kola ga mbola?

⁴⁷Ku vandu vosi udza ku inze na a hulira amakuva gange na a ga kola, nda mu mannya kuli a fwana.

⁴⁸A veye kuli mundu wombaka inyumba yeye, na a yava, ni yikidza hasi, na a vika muse ku lwanda. Kandi amadzi lwa gazula nomugera gwa kupa induta ku inyumba yeyo, si ya nyala kugidengeyidza: kigira ya li ni yombakwa bulahi.

⁴⁹Navutswa uyu u hulira na a ta kola a veye kuli mundu wombaka inyumba yeye ku marova bugira muse; yomugera gwa kupa ku induta, kandi nonoho ya gwa; kandi ligwa lyayo lya li linene.