Read lulogooli Luka 9 Bible Online

Luka 9 - lulogooli bible

Luka 9

¹Langa ava li likumi na vaviri, na a va ha amaha netsingulu ku mademone gosi, nokuhonnya tsinkudzo.

²Kandi ya va tuma kwilwadza ubwami bwa Nyasaye, nokuhonnya avalwaye.

³Na a va volera, Mu ta vugula kindu kyokugendera, kinga impimbo, kinga imuya, kinga ubukima, kinga ifetha; kandi mu ta va namakoti gaviri.

⁴Kandi ku tsinyumba tsyosi ya mwingira mu, mu menye mu, kandi mu twule mu kutsia.

⁵Vosi ava ta mwingiridza, lwa mu twula mu lidala yilyo, mweye ulugukyi ku virenge vyenyu, lu ve kilolekidzu kuvo.

⁶Navo va twula ni va tsia mu tudala twosi, ni vilwadza ivangeli, ni va honnya hosi.

⁷Herodi mwami ya hulira vyosi vya kolwa: kandi ya genya ligali, kigira avalala va vola Yohana u simuguki mu vakudzi;

⁸navandi va vola, Elija u loleki; navandi va vola mulala ku vaprofeti va kale u simuguki.

⁹Navutswa Herodi ya vola, Nda kalaga Yohana mutwe: navutswa ni bwaha uyu wa mbulira vindu kuli yivi? Ma yenya kumulola.

¹⁰Kandi avatumwa lwa virana va mu volera vindu vyosi vya va kola. Naye ya va hila na a tsia navo kuduka mu kyangalangwi kya li kye lidala lya langwa Betsaida.

¹¹Navutswa viduma vya manya ni vi mu londa: kandi ya va bugirira, na a va volera gobwami bwa Nyasaye, na a honnya ava li nobudaka bwelihonnywa.

¹²Liuva lwa lya mala kweveta, ava li likumi na vaviri vadza ni va mu volera, U sendukidze kiduma va tsie mu tudala twa himbi nomu milimi, va nyole hokugona nevyokulia: kigira ku veye hano mwigendanyama.

¹³Navutswa ya va volera, Mu va he vyokulia. Navo va vola, Si ku veye nekindu, navutswa milango gyitano netsisudzi tsiviri; ni ga ta li kwinye ni ku tsie kugulira avandu yava vosi vyokulia.

¹⁴Kigira va li avandu avasatsa tsielfu tsitano. Na a volera avegidzwi veve, Mu va lohidze vikale, kiduma sa kilala amakumi gatano.

¹⁵Ni va kola ndiyo, ni va vikalidza vosi.

¹⁶Kandi ya vugula milango gyitanu netsisudzi tsiviri, na a henza migulu, na a vi gasidza, na a megannya; na a ha avegidzwi va hilire kiduma.

¹⁷Navo va lagira ni viguta vosi: kandi va vungidza amadonye aga tigala, vihinda likumi na viviri.

¹⁸Lwa ya saala yeng'ine, navegidzwi halala naye; ya va teva, na a vola, Viduma vi vola inze mbeve ibwaha?

¹⁹Ni va tivula ni va vola, Yohana Mubatidzi; navutsw a avandi aa vola, Ni Elija; navandi, mulala ku vaprofeti va kale u simuguki.

²⁰Naye ya va volera, Navutswa mwinye mu vola mbeye ibwaha? Petro ya tivula na a vola, U veye Kristo wa Nyasaye.

²¹Navutswa ya veganehidza na a va ha munwa va ta volera mundu kali mulala yaga;

²²na a vola, Mwana wa Adamu ga mu dukira a saliridzwe vindu vinyingi, kandi avakulundu, navasalisi vanene, navang'odi va mwambakana, kandi yiitwe, nelidiku lya gavaka a simugukidzwe.

²³Kandi ya volera vosi, Uyu wenyanga kunonda, yigaye, a ginge musalaba gwigwe kazozo, a nonde.

²⁴Kigira ku vosi wenyanga kuhonnya liva mwoyo lilye a la li gotidza; navutswa ku vosi u gotidza liva mwoyo lilye kigira inze, a la li honnya.

²⁵Kigira mundu a la nyola ubulahi ki, na a nyola lirova lyosi, navutswa yedividza kinga yegotidza?

²⁶Kigira ku vosi u li mbera tsisoni na makuva gange, naye Mwana wa Adamu a la mu vera tsisoni lwa a lidza mu bukumi bwibwe mwene, nobwa Dada wewe, nobwe tsingelosi avatakatifu.

²⁷Navutswa mmu volera ligali, Ku yava ava singiye hano avalala si va li lola likudza bugira kutanga kulola ubwami bwa Nyasaye.

²⁸Inyima ya makuva yaga ga duka kuli madiku gatanu na gavaka, ya hila Petro na Yohana na Yakobo, ni yanegira mu kigulu kusaala.

²⁹Lwa ya saala, ligondo lyomumoni lya galula, netsingubo tsitsye tsya gwa tsindavu ni tsi ng'ereng'ana.

³⁰Henza avandu vaviri va volerana naye, navo ni Musa na Elija;

³¹ava loleka mu bukumi, ni va vola agelikudza lilye lya yenya kumalilidza mu Yerusalemi.

³²Petro navo va li halala naye, tsindolo tsya va vuha: navutswa lwa va vuka ligali, va lola ubukumi bwibwe, navandu vaviri va li ni va singiye naye.

³³Lwa venya kwavukana naye, Petro ya volera Yesu, Mwegidzi, nu bulahi kwinye ku ve hano: leka kwombake vidioli vivaka; kilala ki ve kiliyo, nekindi kya Musa, nekindi kya Elija: ya vula kumanya ga ya vola.

³⁴Lwa ya li na a vola vindu yivi amalesi gadza ni ga va kinga: ni va tia inyinga ya vingira mu malesi.

³⁵Mwoyo gwa twula mu malesi ni gu vola, Uyu nu Mwana wange, mutovole wange: mu mu hulire.

³⁶Kandi lwa mwoyo gwadza, Yesu ya loleka yeng'ine. Navo va kiring'ana, kandi si va volera mundu mu madiku yago vindu vya va lola.

³⁷Mugamba lwa va sulunguta kutwula mu kigulu, kiduma kinene kya mu vuganira.

³⁸Kandi henza, mundu mulala ku kiduma ya hanzuka, na a vola, Mwegidzi, nku saala u henze mwana wange; kigira a veye mwana wange muderwa:

³⁹kandi henza, lidemone li mu gumira, na nonoho a kupa tsikwili; kandi li mu tandula na a tula lifwulu kandi si lyenya kutwula kuye, li mu kindukidza ligali.

⁴⁰Nda saala avegidzwi vovo va li twulidze; navutswa si va nyala mba.

⁴¹Yesu ya tivula na a vola, Mwinye likula li ta suuvira nelihingi, nda va nemwinye kuduka inyinga ki? Kandi nda mu vererera kuduka inyinga ki? Leta mwana wowo hano.

⁴²Na a ki tsia, lya mu tula hasi, lidemone, ni li mu tandula ligali. Navutswa Yesu ya gaya roho mudamano, na a honnya muyai, na a mu ha ise.

⁴³Kandi vosi va genya ubunene bwa Nyasaye. Navutswa avandu vosi lwa va genya vindu vyosi vya ya kola, ya volera avegidzwi veve,

⁴⁴Amakuva yaga gingire mu matu genyu: kigira Mwana wa Adamu a la zamirwa makono gavandu.

⁴⁵Navutswa si va hulira livola yili, kandi lya viswa va ta duka kulimanya; ni va tia kumuteva ku livola yili.

⁴⁶Lya duka kuvo lihangala, ni va tevana, U li ha kuvo a veye munene.

⁴⁷Navutswa Yesu lwa ya lola litevana lyemyoyo gyavo, ya vugula mwana mukekeke na a mu vika himbi naye,

⁴⁸na a va volera, Ku vosi u li bugirira mwana mukekeke uyu kigira lieta lyange, a bugirira inze; kandi ku vosi u li bugirira inze, a bugirira wa ntuma: kigira u veye mukekeke ku mwinye vosi, uyu niye munene.

⁴⁹Kandi Yohana ya tivula na a vola, Mwegidzi, kwa lola mulala u twulidza amademone ku lieta lilyo; kandi kwa mu gaya kigira si ya londekana nekwinye.

⁵⁰Navutswa Yesu ya mu volera, Mu ta mu gaya: kigira u ta mu hangalidza, a veye ku luvega lwenyu.

⁵¹Amadiku gokwirana igulu lwa genya kuduka, mwene ya saavira kutsia Yerusalemi. Kandi ya tuma avatumwa imbiri wewe:

⁵²ni va tsia ni vingira mu kadala ka Vasamaria, kumulombera.

⁵³Navo si va mwingiridza, kigira mumoni ya fwana u tsia Yerusalemi.

⁵⁴Kandi avegidzwi veve Yakobo na Yohana lwa va lola ndi va vola, Mwami, wenya ku volere muliru kutwula migulu gu va sambe?

⁵⁵Navutswa ya girunkana na a va gaya.

⁵⁶Ni va tsia mu kadala kandi.

⁵⁷Lwa va genda ku inzira, mundu mulala ya mu volera, Nda ku londa ha u tsia hosi.

⁵⁸Yesu ya mu volera, Vinywere vi veye nemianka, namanyonyi gegulu ga veye netsinyumba; navutswa Mwana wa Adamu si a veye na ha a vika mutwe gwigwe.

⁵⁹Naye ya volera wundi, U nonde. Navutswa ya vola, Mwami, mbe munwa ntange kutsia kuta dada wange.

⁶⁰Navutswa ya mu volera, Leka avakudzu va te avakudzu vavo; navutswa ive u tsie kwilwadza ubwami bwa Nyasaye.

⁶¹Kandi wundi ya vola, Nda ku londa, Mwami; navutswa mbe munwa ntange kutsia kusiivula avenyumba yange.

⁶²Navutswa Yesu ya mu volera, Si ha li nomundu u vika mukono ku ligembe, na a henza inyima, a dukana nobwami bwa Nyasaye.