Read lulogooli Kwidzulitsa 1 Bible Online

Kwidzulitsa 1 - lulogooli bible

Kwidzulitsa 1

¹Yaga ga veye makuva ga Musa ya volera Israeli vosi engereka ya Yordani mu kyangalangwi, mu Kereremu ku luvega lwa Sufi, hagati ha Parani, na Tafeli, na Labani, na Hazerothu, na Di-zahabu.

²Lu veye lugendo lwamadiku likumi na lilala kutwula Horebu ku inzira yekigulu kya Seiru kuduka Kadeshbarnea.

³Ga duka ku muhiga gwa kola makumi gane, mweli gwelikumi na mulala, lidiku lyokutanga mweli, Musa ya volera avana va Israeli, kuli gosi ga Yahova ya mu ha gokuvalaga;

⁴lwa ya mala kuguuta Sihon, mwami wa Vaamori, wa menya Heshibon, na Ogu mwami wa Bashan, wa menya Ashitarothu, ha Edrei.

⁵Engereka wa Yordani, mu kivala kya Moabu, Musa ya tanga kugamba amalago yaga, na a vola,

⁶Yahova Nyasaye wetu ya ku volera ha Horebu, na a vola, Limenya lya mwa menya mkigulu yiki li duki:

⁷mu girunkane, mu gumire lugendo lwenyu, mu tsie mkivala kyevigulu kya Vaamori, na hosi himbi ha zana, mu Kereremu, nomu kivala kyevigulu, nomkivala kereremu, na Kusini, noku luginga lwenyanza, kivala kya Vakanani, na Lebanon, kuduka ku mugera munene, mugera gwa Farati.

⁸Henza, mbiki kivala imbiri wenyu; mwingire mu gumire kivala kya Yahova yesuhira avaguga venyu, Abrahamu, na Isaka, na Yakobo, kuhaana kuvo, noku visukululwi vyavo inyima wavo.

⁹Na nda mu volera inyinga yiyi, ni mbola, Si nyala inze mwene kumuginga tsyeng'ine:

¹⁰Yahova Nyasaye wenyu a mu kola kuva avanyingi, na, henzi, lero mu veye avanyingi kuli tsing'ereng'ani tsyomigulu.

¹¹Yahova, Nyasaye wavaguga venyu, a mu kole avanyingi hali elfu kuli mu veye, na a mu gasidze, kuli ya mu laga

¹²Inze mwene nyala ndi kuginga lididikana lyenyu, nomusigo gwenyu, nelihing'ana lyenyu?

¹³Mu lete avobugeeri, navelimanya, avomanyekana, kuli tsihiri tsyenyu, na nda va kola kuva mitwe ku mwinye.

¹⁴Na mwinye mwa ntivulira, ni mu mbolera, Likuva lya wa vola li veye lilahi lyokukola.

¹⁵Kunangwa ndz vugula mitwe gyetsihiri tsyenyu, avobugeeri, avamanyekana, ni mba kola va ve mitwe ku mivinye, vanyampara vetsielfu, na vanyampara vetsimia, na vanyampara va makumi gatano, na vanyampara velikumi, na valindi kuli tsihiri tsyenyu.

¹⁶Na ndeganehidza avakalagi venyu inyinga yeyo, ni mba volera, Mu hulire makuva ga veye hagati ha vamwavo venyu, mu kalage nobulungi hagati homundu namwavo wewe, nomugeni u veye halala naye.

¹⁷Mu ta henza magondo gavandu mu likalaga; mu hulire avakekeke navanene kuleng'ana; mu vule kutia mumoni mwomundu kali mulala; kigira likalaga li veye lya Nyasaye: nelikuva li mu tama mu lete ku inze, nda li hulira.

¹⁸Nda mu laga inyinga yeyo gosi ga mu dukira kukola.

¹⁹Ma kwa samula kutwula Horebu, ni ku vita hagati he kyangalangwi kinene yikyo kyosi kyokutihidza kya mwa lola, ku inzira yekivala kyevigulu kya Vaamori, kuli Yahova Nyasaye wetu ya ku laga; kwa duka Kadesh-barnea.

²⁰Na nda muvolera, Mu duki ku kivala kyevigulu kya Vaamori, kya Yahova Nyasaye wetu a ku ha.

²¹Henza, Yahova Nyasaye wowo u viki kivala yiki imbiri wowo: wanegire, u ki gumire, kuli Yahova, Nyasaye wavaguga vovo, ya ku volera: u ta tia kinga u ta kudza mwoyo.

²²Na mwinye mwisunde himbi ku inze sa mulala ku mwinye mwa mbolera, Ku tume avandu imbiri wetu, va ku lutire kivala, ma va ku letere makuva genzira yokwanegirira ku, namadala ga ku duka mu.

²³Nelikuva yili lya nyanzidza ligali; na nda vugula avandu likumi na vaviri ku mwinye, ku ihiri indala, mulala:

²⁴navo va girunkana ni vanegira mu kivala kyevigulu, ni va duka mivona lya Esikoli, ni va luta.

²⁵Ni va vugula ku makuyu gekivala mmakono gavo, ni va ku letera hasi ni va ku letera makuva kandi, ni va vola, Ni kivala kilahi kya Yahova Nyasaye wetu a ku ha.

²⁶Navutswa si mwa bugirira kwanegira yo, mwa tinguha ku lilaga lya Yahova Nyasaye wenyu:

²⁷na mwa monyira mmahema genyu, ni mu vola, Kigira Yahova ya ku dunyira ya ku twulidza mkivala kya Egepeti a duke kukuvika mmakono ga Vaamori, kukudividza.

²⁸Kwanegira kutsia haliha? Avamitu vetu va salulukidzi myoyo gyetu, ni va vola, Avandu yavo va veye avanyingi navatambi kuvita kwinye; namadala ga veye manene, kandi ga veye namadigi kuduka migulu; na kandi kwa lola avana va Anaki va veye ho.

²⁹Hene yaho nda mu volera, Mu ta va nobutii, kinga mu ta va tia.

³⁰Yahova Nyasaye wenyu wimiranga imbiri wenyu, a la mu lwanira kuli vyosi vya ya mu kolera mu Egepeti imbiri wetsimoni tsyenyu

³¹na mukyangalangwi, ha wa lola kuli Yahova Nyasaye wowo a ku ginga, kuli mundu a ginganga mwana wewe, ku inzira yosi ha mwa tsia, kuduka hano.

³²Navutswa ku kindu yiki si mwa suuvira Yahova Nyasaye wenyu,

³³wa mwimirira ku inzira, nomuliru mbudiku a duke kummannya hokusingiridza mahema genyu, nambasu nelilesi ku mu mannya hokugenda.

³⁴Na Yahova ya hulira mwoyo gwamakuva genyu, na ya vihirirwa, na yesuha, na a vola,

³⁵Ligali si ha veye nomulala mu avandu yava ku likula yili lidamano u li lola kivala kilahi yikyo, kya ndisuha kuha avaguga venyu,

³⁶na a ta li Kalebu mwana wa Jefune; uyu a la ki lola; na nda ha uyu kivala yiki kya ya sena ku, navana veve, kigira u londi Yahova ku makuva gosi.

³⁷Kandi Yahova ya vihirirwa inze kigira l mwinye, na a vola, Ive kandi si u lingira mu mba:

³⁸Joshua mwana wa Nuni, u singiranga imbiri wowo, a lingira mu: u mu leminye mwoyo; kigira uyu a la lihidza Israeli miyandu.

³⁹Kandi avakekeke venyu, ava mwa vola va la va vilanye, navana venyu, ava ta veve lero nelimanya lyobudamano nobulahi, yavo va lingira, nivo ava ndi haana kuvo, kuva miyandu kuvo.

⁴⁰Navutswa ku mwinye, mu girunkane mu gumire lugendo lwenyu, mu tsie mu kyangalangwi ku inzira ye Nyanza Inzakanyu.

⁴¹Na mwa ntivulira ni mu mbolera, Kwinye kwa koli ubwoni ku Yahova, ku lanegira kulwana, kuli gosi ga Yahova Nyasaye wetu ya ku laga. Ma mweboha sa mulala vyuma vivye vyelihe, na mwa kola bwangu kwanegira mkivala kyevigulu.

⁴²Na Yahova ya mbolera, U va volere, Mu ta tsia, kandi mu ta lwanakigira inze si mbeye hagati henyu, gase mu la guutwa imbiri wavasigu venyu.

⁴³Na nda mu volera, na mwinye si mwa mbulira; mwa tinguha ku lilaga lya Yahova, na mwa hindageridza, na mwanegira mkivala kyevigulu.

⁴⁴Na Vaamori, ava menya mkivala kyevigulu yikyo, va mu twulira, na va mu kunga, kuli tsinzuki tsi kunganga, va mwononyira Seiru, kuduka Horma.

⁴⁵Mwirana ni mu lira imbiri wa Yahova; navutswa Yahova si ya hulira mwoyo gwenyu, kandi si ya yekidza amatu gege ku mwinye.

⁴⁶Kunangwa mwa menya Kadesh madiku manyingi, kuli madiku ga mwa menya yo.