Read lulogooli Kwidzulitsa 10 Bible Online

Kwidzulitsa 10 - lulogooli bible

Kwidzulitsa 10

¹Inyinga zana Yahova ya mbolera, Vadza vibao viviri vyamagina vi fwanana nevya li vyembiri, udze ku inze mu kigulu, kandi u lombe lisanduku lyomusala.

²Na inze nda ng'oda ku vibao makuva aga li ku vibao vyambiri vya watanya, na u la vi vika mu lisanduku.

³Kunangwa nda lomba lisanduku lyomusala gwa akesia, na nda vadza vibao viviri vyamagina ku fwanana nevyambiri, na ndanegira mkigulu, nevibao viviri mmakono gange.

⁴Naye ya ng'oda ku vibao, kuli amang'oda gokutanga, amalago likumi, ga Yahova ya mbolera mkigulu nomuoyo gwa twula hagati homuliru, ku lidiku lyelivugana: na Yahova ya mba.

⁵Nda girunkana nokusulunguta kutwula mkigulu, na nda vika vibao mu lisanduku lya nda lomba; na vi veye mu kuli Yahova ya laga.

⁶(Avana va Israeli va samula kutwula Beerothu wa avana va Jaakan kutsia Mosera. Na Haruni ya kudzira ho, na a tebwa ho; na Eleazaru mwana wewe ya tumika mubusalisi mbugono bwibwe.

⁷Va samula kutwula ho kutsia Gudugoda; va twula Gudugoda ni va tsia Jotibatha, kivala kyemigera gyamadzi.

⁸Nenyinga yeyo Yahova yahula ihiri ya Levi, va ginge lisanduku lya malago ga Yahova, va singire imbiri wa Yahova kumutumikira, nokugasidza avandu ku lieta lilye, kuduka lero.

⁹Kigira yaga Levi u vuli kuva nekidieli kinga miyandu halala navamwavo veve; Yahova niye miyandu gyigye, kuli Yahova Nyasaye wowo ya mu volera.)

¹⁰Na nda menya mkigulu, kuli matsyambiri, madiku makumi gane ubudiku nombasu: na Yahova ya mbulira inyinga yeyo kandi: Yahova si yenya kukwononya.

¹¹Na Yahova ya mbolera, Vuka, u gumire lugendo lulwo imbiri wa avandu; navo va lingira kugumira kivala, kya ndisuhira avaguga vavo nda va ha.

¹²Na ive kalunu, Israeli, Yahova Nyasaye wowo yenya ki ku ive, ni li ta li kutia Yahova Nyasaye wowo, u gende ku tsinzira tsitsye tsyosi, nokumuyanza, nokutumekira Yahova Nyasaye wowo nomwoyo gugwo gwosi naroho gugwo gwosi,

¹³nokugumira malago ga Yahova, na miima gyigye, gya nku laganga lero gyi ve ku ive ubugasu?

¹⁴Henza, ligulu li veye lya Yahova Nyasaye wowo, neligulu lyomigulu, nelirova, na vyosi vi veye mulyo.

¹⁵Navutswa Yahova ya li nobuyanzi ku vaguga vovo kuvayanza, na a tovola kisukululwi kyavo inyima wavo, nakyo ki veye mwinye, ku tsihiri tsyosi, kuli ga veye lero.

¹⁶Kunangwa mu keve ligodo lyomwoyo gwenyu, na mu vule kuva nemyoyo midinyu kandi.

¹⁷Kigira Yahova Nyasaye wenyu, niye Nyasaye wa avanyasaye, nomwami wavami, Nyasaye munene, wetsingulu, nelitihidza, u vulanga kuhenza liloleka lyavandu, kinga kuvugula vikukula.

¹⁸A dukidziranga mbisandu nomukunzakali likalaga, nokuyanza mugeni, nokumuha, vyokulia netsingubo.

¹⁹Kunangwa mu yanze umugeni; kigira mwinye mwa li avageni mu kivala kya Egepeti.

²⁰U tie Yahova Nyasaye wowo, u mu tumekire; na u hambane naye, na wesuhe ku lieta lilye.

²¹A veye lidzominywa lilyo, na Nyasaye wowo, wa ku kolera vindu yivi vinene vyelitihidza, vyetsimoni tsitsyo tsi loli.

²²Avaguga venyu va sulunguta Egepeti avandu makumi gatano na gaviri; na kalunu Yahova Nyasaye wowo u ku koli kuli tsing'ereng'ani tsyomigulu, kiduma kinene.