Read lulogooli Kwidzulitsa 11 Bible Online

Kwidzulitsa 11 - lulogooli bible

Kwidzulitsa 11

¹Kigira yaga u yanze Yahova Nyasaye wowo, nokugumira lyeganehidza lilye, miima gyigye, nelikalaga lilye, namalago gege, kazozo.

²Lero mu manye: kigira si mbolerana navana venyu ava vula kumanya, na va vula kulola amageli ga Yahova Nyasaye wenyu, nobunene bwibwe, nomukono gwigwe gwetsingulu, nomukono gwigwe gwanyirika,

³nevilolekidzu vivye, nemiyinzi gyigye, gya ya kola ku Farao mwami wa Egepeti, nekivala kikye kyosi hagati ha Egepeti;

⁴kandi kuli ya kola ku lihe lya Egepeti, ku tsiparasi tsyavo, namagari gavo; kandi kuli ya vinika mmadzi ge Inyanza Inzakanyu lwa va mu londerera, na kuli Yahova ya va dividza kuduka lero;

⁵na ga ya mu kolera mu kyangalangwi, mwa luha mwa duka hano;

⁶na ga ya kolera Dathan na Abiram, avana va Eliabu, mwana wa Rubeni; kuli kivala kya kunula munwa gwakyo, ni ki va mira, navo avenyumba yavo, namahema gavo, navyo vyosi vya li mwoyo vya va londa, hagati ha Israeli vosi:

⁷navutswa tsimoni tsyenyu tsya lola miyinzi minene gyosi gya Yahova ya kola.

⁸Kunangwa mu gumire amalago gosi aga mmu laganga lero, mu duke kuva netsingulu, mwingire kugumira kivala, liya mwambukanga yo kukigumira;

⁹na mu duke kukola madiku genyu kuva manyingi mu kivala, kya Yahova yesuhira avaguga venyu a la va ha nevisukululwi vyavo, kivala ki gangalukanga amaveere nobwuki.

¹⁰Kigira kivala, kya mwingira kukigumira, si ki fwanana ne kya Egepeti, kya mwa twula mu, ha wa midza bugutsa bubwo, na wa bu sama amadzi nekirenge kikyo, kuli mulimi gwetsingutsa;

¹¹navutswa kivala, kya mwambukanga yo kukigumira, ki veye kivala kyevigulu namavona, ki nwedzanga amadzi gembula yomigulu,

¹²ki veye kivala kya Yahova Nyasaye wowo a lindanga: kazozo tsimoni tsya Yahova Nyasaye wowo tsi veye kukyo, kutwula ku litanga lyomuhiga kuduka ku kiheri kyomuhiga.

¹³Kandi ga la va, ni mu va ni mu hulira ligali malago gange ga mmu laganga lero, kuyanza Yahova Nyasaye wenyu, nokumutumekira nomwoyo gwenyu gwosi, naroho gwenyu gwosi,

¹⁴hene yaho nda ku ha imbula yekivala kyenyu ku inyinga yakyo, imbula yokutanga nembula yenyima, u duke kuvungidza ubuswage bubwo, newaini yoyo, namaguta gogo.

¹⁵Na nda ku ha bunyasi mmilimi gyigyo okwaya mitugu gyigyo, na u la lia nokwiguta.

¹⁶Mwelinde mwinye avene, gase myoyo gyenyu gyi la gadwa, nokugirunkana, nokutumekira avanyasaye vandi, nokuvasigamira;

¹⁷nobutima bwa Yahova bu laaka ku mwinye, na a la boha ligulu, ha vule kuva nembula nekivala ki vula kwama makuyu, na mu la diva bwangu nokutwula ku kivala kilahi kya Yahova ya mu ha.

¹⁸Kigira yaga mu vike makuva gange yaga mu mwoyo gwenyu na mu roho gwenyu; mu ga bohe ga ve kilolero ku mukono gwenyu, na ga la va kyokwidzulitsa hagati hetsimoni tsyenyu.

¹⁹Na mu legidza avana venyu makuva, ku ga vola, lwa wikalanga mu inyumba yoyo, na lwa u gendanga ku inzira, na lwa u gonanga, na lwa u vukanga.

²⁰Kandi u ga ng'ode ku maliva genyumba yoyo, na ku viribwa vivyo;

²¹madiku genyu ga kolwe manyingi, na gavana venyu, ku kivala kya Yahova yesuhira vaguga venyu kuvaha, kuli madiku geligulu ku lirova.

²²Kigira ni mu va ni mu gumira ligali malago yaga ga mmu laganga, nokugakola, kuyanza Yahova Nyasaye wenyu, nokugenda ku tsinzira tsitsye tsyosi, nokuhambana naye;

²³hene yaho Yahova a la kunga tsihiri yitsi tsyosi imbiri wenyu, na mwinye mu la gumira tsihiri tsinene netsyetsingulu kuvita mwinye.

²⁴Hosi ha tsinduvatiru tsyenyu tsi sena ku ha la va henyu: kutwula ku kyangalangwi, na Lebanon, nokutwula ku mugera, mugera gwa Farati, kali kuduka ku inyanza yemadioli, lu la va lwako lwenyu.

²⁵Si ha la va nomundu u nyala kusingira imbiri wenyu: Yahova Nyasaye wenyu a la vika litihidza lyenyu nelitengidza lyenyu ku kivala kyosi kya mu sena ku, kuli ya mu volera.

²⁶Henza, lero mbika imbiri wenyu ubugasu nevilaamo:

²⁷ubugasu bu ve ho, ni mu va ni mu hulira malago ga Yahova Nyasaye wenyu, ga mmu laganga lero;

²⁸nevilaamo vi ve ho ni mu va ni mu vula kuhulira malago ga Yahova Nyasaye wenyu, ni mu girunkana kutwula ku inzira ya mmu laganga lero, kulonda vanyasaye vandi, ava mu vula kumanya.

²⁹Na ga la duka, lwa Yahova Nya; saye wowo a ku leta nokukuvika mu kivala kya u tsitsanga kukigumira, u la vika ubugasu ku kigulu kya Gerizim, nevilaamo u vi vike ku kigulu kya Ebali.

³⁰Si vi ve engereka ya Yordani inyima wenzira yeliyera lyeliuva mu kivala kya Vakanani va menya mu Kereremu, ku luvega lwa Gilgali, ku nyasi kwemisala gya More?

³¹Kigira mwinye mu lambuka Yordani mwingire kugumira kivala kya Yahova Nyasaye wenyu a mu ha, na mu la ki gumira, nokumenya mu.

³²Mu henze mu kole miima nelikalaga lyosi lya mbikanga imbili wenyu lero.