Read lulogooli Kwidzulitsa 14 Bible Online

Kwidzulitsa 14 - lulogooli bible

Kwidzulitsa 14

¹Mwinye mu veye avana va Yahova Nyasaye wenyu: mu ta salaga mibiri gyenyu, kandi mu ta lomba kyavusu hagati hetsimoni tsyenyu kigira mukudzu.

²Kigira u veye ihiri intakatifu ku Yahova Nyasaye wowo, na Yahova ya ku tovola kuva ihiri yahulwa kuva yeye, kuvita tsihiri tsyosi tsi veye ku lirova.

³U ta lia kindu kidamano.

⁴Tsinyama tsya u nyala kulia ni yitsi: ing'ombe, neligondi, nembuli,

⁵imboongo, nekulu, nekongoni, nembuli yombulimu, nekisusu kilavu, nembogo, nekisusu.

⁶Na ku tsinyama tsyosi tsyetsimbagayu tsya vukana kuva tsiviri na tsi litsanga gamula, hagati hetsinyama tsyosi, yitsi ni tsinyama tsya mu nyala kulia.

⁷Navutswa kandi mu ta lia ku yitsi, tsi litsanga gamula, netsyavukana tsimbagayu: ingamia, nekifwoyo, nelikinyeli, kigira tsi litsanga gamula navutswa si tsyavukana tsimbagayu, tsi veye tsindamano ku mwinye.

⁸Nempidzi, kigira yavukana tsimbagayu, navutswa si i litsanga gamula mba, yiyi i veye indamano ku mwinye: mu ta lia tsinyama tsyatsyo, nomibiri gyatsyo mu ta dira mba.

⁹Mu lie yivi mu vyosi vi veye mmadzi: mu lie ku vyosi ki veye na matsusuywa na magamba;

¹⁰noku vyosi ki ta li na matsusuywa na magamba mu ta lia mba; ki veye kidamano ku mwinye.

¹¹Mu veye nomunwa kulia ku manyonyi gosi manifu.

¹²Navutswa yaga nigo ga mu ta lia mba: indidzu nengwasi, nekihungu,

¹³nekiliitsa, nolugaka, nekinamasiagali noku tsing'ano tsyavyo,

¹⁴na majikolo ku tsing'ano tsyago,

¹⁵nelikuuli, nembugabuga, nekikuni, nelive kuli tsing'ano tsyago,

¹⁶neliudo, nelikuuli likekeke, nelikuuli lyetsinziga,

¹⁷neliluvi linene, nesoti, nelikuuli linene,

¹⁸neligungu, neling'ang'a ku tsing'ano tsyago, nelihudihudi, nelinyinya.

¹⁹Na vyosi vi molanga vyetsimbaha, vi veye vidamano ku mwinye: mu ta lia mba.

²⁰U veye nomunwa kulia manyonyi gosi ga veye manifu.

²¹Mu ta lia ikindu kyekudziye kyene mba u nyala kuha mugeni u veye mu kiribwa kikyo, a lie; kinga kugulidza mugeni: kigira u veye ihiri intakatifu ku Yahova Nyasaye wowo. U ta dekera kimeme mmaveere ga nnya.

²²U la haana izaka ku kidieli kyelikumi ku limedeka lyobugutsa bubwo, bu twulanga mmulimi gugwo muhiga nomuhiga.

²³Na u lie imbiri wa Yahova Nyasaye wowo, ha a li tovola, lieta lilye li menya ho, izaka yobuswage bubwo, newaini yoyo, na maguta gogo, nevyokutanga kwivulwa vyekyayo kikyo, tsing'ombe na magondi; u duke kweyegidza kutia Yahova Nyasaye wowo kazozo.

²⁴Nolugendo ni lu va ni lu veye lutambi, nu u ta nyala kuviginga, kigira ha zana ha Yahova Nyasaye wowo a li tovola, a vike ho lieta lilye ha veye ihale, lwa Yahova Nyasaye wowo a ku gasidza;

²⁵hene yaho u vi kiranye ifetha, na u la boha ifetha zana, u tsie nayo mmukono gugwo kuduka ha Yahova Nyasaye wowo a li tovola:

²⁶nefetha zana u gi tumekira ku kya roho gugwo gu kayirangwa, ing'ombe, kinga ligondi, kinga iwaini, kinga kyokunwa kyetsingulu, kinga kya roho gugwo gwenyanga ku ive, na u lie yo imbiri wa Yahova Nyasaye wowo, na u sangale, ive navenyumba yoyo.

²⁷Na Mulevi u veye mu viribwa vivyo, u ta mu leka mba; kigira si a veye nelisanga kinga nemiyandu halala nive.

²⁸Ku mihiga gyosi gwegyivaka ku kiheri kyagwo u haane kidieli kye likumi kyelimedeka lilyo lyomuhiga yigwo, na u ki vike mu viribwa vivyo:

²⁹na uyu Mulevi, kigira si a veye nekidieli kinga miyandu halala nive, nomugeni, nombisandu, nomukunzakali, ava veye mu viribwa vivyo, vadze kulia vi gute; Yahova Nyasaye wowo a duke ku kugasidza ku miyinzi gyosi gyomukono gugwo gu kolanga.