Read lulogooli Kwidzulitsa 16 Bible Online

Kwidzulitsa 16 - lulogooli bible

Kwidzulitsa 16

¹U linde mweli gwa Abibu, na u gumira lipasaka lya Yahova Nyasaye wowo; kigira gwa li mweli gwa Abibu lwa Yahova Nyasaye wowo ya ku twulidza Egepeti mbudiku.

²Na wiite lipasaka lya Yahova Nyasaye wowo, ku kyayo kyamagondi kinga kyetsing'ombe, ha Yahova a la tovola, kuvika lieta lilye li menya ho.

³U ta lia mamera halala na lipasaka; madiku gatano na gaviri u lagire ubukima bu ta li na mamera; nabwo bu veye ubukima bwobusaliri; kigira wa twula Egepeti nelididikana, u duke kwidzulilsa lidiku yili lya wa twula Egepeti, madiku gosi ga u veye mwoyo.

⁴Na mamera ga ta loleka ku ive mu tsinzako tsitsyo tsyosi ku madiku gatano na gaviri; kandi inyama ya u haananga kihaanwa ku lidiku lyokutanga inyinga ya mgolova, i ta tigala kuduka bukye mba.

⁵U tiitira lipasaka mviribwa vivyo kali kilala kya Yahova Nyasaye wowo ya ku ha;

⁶navutswa ha Yahova Nyasaye wowo a la tovola, a vike lieta lilye kumenya ho, ha zana u liire ho lipasaka inyinga ya mgolova, mu liyera lyeliuva, ku inyinga kuli ya wa twula Egepeti.

⁷U gyuminye na u liire ha Yahova Nyasaye wowo a la tovola, na mugamba wirane ku mahema gogo.

⁸Madiku gatano ne lilala u lagire ubukima bu ta li na mamera; na ku lidiku lya gatano na gaviri u ve nelivugana lyobukumi ku Yahova Nyasaye wowo; u ta kola miyinzi kali mulala.

⁹U la validza masidza gatano na gaviri: kutwula inyinga ya u tanganga kuvika mbano ku vyamera vivyo u la validza masidza gatano na gaviri.

¹⁰Na u lombe lilia lyelisidza ku Yahova Nyasaye wowo, na u la haana kihaanwa kyobuyanzi kyomukono gugwo, kya u la haana kuli ubugasu bwa Yahova Nyasaye wowo ya ku gasidza:

¹¹na u sangale imbiri wa Yahova Nyasaye wowo, ive, nomwana wowo, nomukana, nomutugwa muyai wowo, nomukana, no Mulevi u veye mu viribwa vivyo, nomugeni, nombisandu, nomukunzakali, ava veye hagati hoho, ha Yahova Nyasaye wowo a la tovola, kuvika lieta lilye li menye ho.

¹²Na u lidzulitsa wa li mutugwa mu Egepeti: na u gumire miima yigyi nokugyikola.

¹³U lombe lilia lyamadiri madiku gatano na gaviri, lwa u mala kuteera vyokulodze lulwo, na vyekyokumina kikyo kyewaini:

¹⁴na u sangale mu lilia lilyo, ive, nomwana wowo muyai, nomukana, nomutugwa wowo, muyai, nomukana, na Mulevi, nomugeni, nombisandu, nomukunzakali ava veye mu viribwa vivyo.

¹⁵Madiku gatano na gaviri u la kola lilia ku Yahova Nyasaye wowo, ha Yahova a la tovola; kigira Yahova Nyasaye wowo a la ku gasidza mu linyola lilyo lyosi, na mu miyinzi gyosi gya makono gogo, na u ve nelisangala ligali.

¹⁶Hali kavaka ku muhiga avasatsa vovo va la loleka imbiri wa Yahova Nyasaye wowo ha a la tovola: mu lilia lyobukima bu ta li namamera, na mu lilia lyamasidza, na mu lilia lyamadiri; va ta loleka imbiri wa Yahova namakono makaya;

¹⁷sa mulala a haane kuli a nyala, kuli ubugasu bwa Yahova Nyasaye wowo a mu ha.

¹⁸U vike avakalagi navanyampara mu viribwa vivyo vyosi, vya Yahova Nyasaye wowo a ku ha, kuli tsihiri tsitsyo; navo va kalagire avandu nelikalaga lyobulungi.

¹⁹U ta kyaminya likalaga: kinga u ta henza magondo gavandu; kandi u ta vugula vikukula; kigira vikukula vi kyaminyanga tsimoni tsya vageeri, nokugirunkanya makuva gowobulungi.

²⁰U la londa yaga aga veye bulungi ligali, u duke kuva mwoyo, nokunyola kivala gya Yahova Nyasaye wowo a ku ha.

²¹U ta simika misala ku gyosi kuva misambwa ku ive a himbi ku bwali bwa Yahova Nyasaye wowo, bwa welombera.

²²Kinga u ta singeridza munara; gwa Yahova Nyasaye wowo a dunyiranga.