Read lulogooli Kwidzulitsa 17 Bible Online

Kwidzulitsa 17 - lulogooli bible

Kwidzulitsa 17

¹U tiitira Yahova Nyasaye wowo ing'ombe, kinga ligondi, vi veye nobulema, kinga kindu kidamano kuvyo; kigira yili ni livihiriridza ku Yahova Nyasaye wowo.

²Na a va na a loleka hagati hoho, mu kilala ku viribwa vivyo vya Yahova Nyasaye wowo a ku ha, mundu musatsa kinga mukali, u kolanga ubudamano mmoni mwa Yahova Nyasaye wowo, kwononya lilagana lilye,

³na a tsia kutumekira avanyasaye vandi, nokuvasigamira, kinga liuva, kinga mweli, kinoa vi veye mu lihe lyomigulu, vya inze nda vula kulaga,

⁴na ive nu u volerwa, na u ga hulira; hene yaho wenye ligali; u henze, ni ga va ni ga veye ageligali, nelikuva yilyo li ve lya dodo, ubudamano kuli yibu bu kolangwa mu Israeli,

⁵hene yaho u lete kyova musatsa uyu kinga mukali uyu, wa kola inkuva imbi yiyi, ha kiribwa kikyo, kuduka musatsa uyu kinga mukali uyu; va laswe magina va duke kukudza.

⁶Uyu u vedzanga, yiitwe kwiitwa kuminwa gya valoli vaviri, kinga vavaka; a tiitwa kumunwa gwomuloli mulala.

⁷Amakono gavaloli ga tange kuva kuye kumwiita, ma makono gavandu vosi ga londe. U twulidze ndiyo ubudamano hagati hoho.

⁸Ni li va ni li twula likuva lidinyu kutama ive mu likalaga, hagati ha masahi namasahi, na hagati hekiyalo nekiyalo, na hagati heliduya neliduya, nago ga veye lihangalidzana mu viribwa vivyo; hene yaho u singire, wanegire u tsie ha Yahova Nyasaye wowo a la tovola;

⁹u tsie ku vasalisi Avalevi, nomukalagi u va ho madiku yago; u va teve; navo va la ku mannya likuva lyobukalagi.

¹⁰Na u la kola likuva lya va ku mannya ha zana ha Yahova a la tovola; na u la linda kukola gosi ga va la kwegidza:

¹¹kuli liva lye lilaga lyava kwegidza, na kuli likalaga lya va ku volera, u kole ndiyo; u ta girunkana kutwula ku likalaga lya va ku mannya, kutsia ku mukono mulungi, kinga mmosi.

¹²Nomundu u kolanga lihindageridza, kuvula kuhulira musalisi u singiranga kutumekira Yahova Nyasaye wowo, kinga mukalagi, mundu uyu a kudze: na u la twulidza ubudamano mu Israeli.

¹³Navandu vosi va la hulira, nokutia, va vule kukola kandi lihindageridza.

¹⁴Inyinga u li duka mu kivala kya Yahova Nyasaye wowo a ku ha, kukigumira, na u menye mukyo, nokuvola, Nda vika mwami ku inze, kuli tsihiri tsyosi tsi veye himbi ku inze;

¹⁵ligali u la vika uyu, wa Yahova Nyasaye wowo a la tovola kuva mwami ku ive: u vike mulala ku vamwavo vovo a ve mwami ku ive; u tamehidza mugeni ku ive mba, u ta li amwavo wowo.

¹⁶Navutswa a ta kola tsiparasi tsitsye kuva tsinyingi, kinga a tirannya avandu Egepeti mba, a duke kukola tsiparasi tsitsye kuva tsinyingi; kigira Yahova ya mu volera, Kutwula kalunu mu tirana kandi ku inzira yiyi.

¹⁷Kinga a ta kola avakali veve kuva avanyingi mba, mwoyo gwigwe gu vule kugirunkana, kinga a ta kola ifetha yeye kinga ithahabu yeye kuva inyingi ligali mba.

¹⁸Na ga la duka, mmadiku ga yikala ku intebe yobwami bwibwe, a la ng'oda ku makuva gelilaga yili mu kitabu, a londe yikyo ki veye imbiri wa vasalisi na Valevi:

¹⁹a ve nakyo, a some mukyo madiku gosi aga a veye mwoyo; a duke kweyegidza kutia Yahova Nyasaye wewe, a gumire makuva gosi gelilaga yili na miima yigyi, kugyikola

²⁰mwoyo gwigwe gu ta gingwa igulu ku avamwavo veve, kandi a ta girunkana mu lilaga ku yeka ku mukono mulungi, kinga mukono mmosi: a duke kukola madiku gege manyingi mu bwami bwibwe, uyu navana veve hagati ha Israeli.