Read lulogooli Kwidzulitsa 19 Bible Online

Kwidzulitsa 19 - lulogooli bible

Kwidzulitsa 19

¹Inyinga Yahova Nyasaye wovo a li kalaga tsihiri, avene kivala kya Yahova Nyasaye wowo a ku ha, na u la va londa, nokumenya mmadala gavo, no mu tsinyumba tsyavo;

²u la tovola amadala gavaka, ga ve ku ive hagati hekivala kikyo kya Yahova Nyasaye wowo a ku ha kukigumira.

³U la lomba inzira ya vukanye tsinzako tsyekivala kikyo, kya Yahova Nyasaye wowo a ku ha kuva miyandu, ki ve vidieli vivaka, ku vosi wiita mundu yirukire mu.

⁴Yiyi nenkuva yomulumindi u lirukira yo nokuhona: wiita wakye bugira kusaavira, kinga si a mu dunyira kutwula kale;

⁵kuli inyinga mundu a tsitsanga mu mulitu nomtende kuvadza misala, na a hila mukono gwigwe nembadzi a duke kutema musala, nembadzi ni i twula mmuhini, ne i duya mtende, na a kudza, a lirukira mu lilala ku madala yago, nokuhona:

⁶gase wekisalya kyamasahi a la londa mulumindi, inyinga mwoyo gwigwe gu veye nobutima, nokumunyola, kigira inzira intambi, nokumiita; navutswa si a dukira kwiitwa, kigira si a mu dunyira kutwula kale.

⁷Kunangwa nku laga, nokuvola, U la tovola madala gavaka ga ve ku ive.

⁸Na Yahova Nyasaye wowo na a va na a nenehidza lwako lulwo, kuli yesuhira avaguga vovo, na a ku ha kivala kyosi kya ya suuviridza vaguga vovo kuvaha;

⁹nu u va nu u gumira lilaga yili lyosi, lya nku laganga lero, nokugakola, nokuyanza Yahova Nyasaye wowo, nokugenda kazozo mu tsinzira tsitsye, hene yaho u la meda madala gavaka kandi ga ve ku ive, halala na gandi gavaka yaga:

¹⁰masahi aga u ta veye nelihyolo ga ta sundulwa hagati hekivala kikyo, kya Yahova Nyasaye wowo a ku ha ki ve miyandu, na ndiyo amasahi ga la va ku ive.

¹¹Navutswa ku vosi u dunyira mtende, nokumusetera, nokumutulira, na a mu duya kuduka a kudze, naye ne yirukira mu lilala ku madala yaga;

¹²hene yaho avakulundu velidala lilye va tume vatumua kumuvugula yo, nokumbika mmukono gwowekisalya kyamasahi, a duke kukudza.

¹³Imoni yoyo i ta mbererera mba, navutswa u twulidze mu Israeli, amasahi ga u ta veye namahyolo, bu duke kuva bulahi ku ive.

¹⁴U ta twulidza luginga lwa lwako lwa mutende wowo, lwa avandu va kale va vika, mu miyandu gyigyo gya u gumira, mu kivala kya Yahova Nyasaye wowo a ku ha kukigumira.

¹⁵Muloli mulala a ta vukira mundu ku budamano ku bwosi, kinga ku ubwoni ku bwosi, bwa mahyolo ga a hyolanga ku gosi: likuva li dinyeridzwe neminwa gya valoli vaviri, kinga vavaka.

¹⁶Muloli wobukyamu na a vukira mundu ku vosi, nokulolekidza kuye agobukyamu,

¹⁷hene yaho vandu va hangalidzana ku makuva yaga, va singire vombi vaviri imbiri wa Yahova, imbiri wa vasalisi navakalagi, ava li vaho mmadiku yago;

¹⁸avakalagi va vizodze ligali: na henza, muloli uyu na a va na a veye muloli wobubehi, a leta lilola lyobubehi ku amwavo wewe;

¹⁹hene yaho mu mu kolere, kuli ya ganagana kukolera amwavo wewe; ni ndiyo u la twulidza ubudamano hagati hoho.

²⁰Na yavo ava tigala va la hulira, na va tie, va ta kola kandi ubudamano kuli yibu hagati hoho.

²¹Na imoni yoyo i ta va netsimbabasi mba; livamwoyo u vanze livamwoyo, imoni ne imoni, lino nelino, mukono nomuhono, kirenge nekirenge.