Read lulogooli Kwidzulitsa 2 Bible Online

Kwidzulitsa 2 - lulogooli bible

Kwidzulitsa 2

¹Kunangwa kwa girunkana, nokutanga lugendo lwetu kutsia mu kyangalangwi ku inzira ye Inyanza Inzakanyu, kuli wa Yahova ya mbolera; kwa vodonkana ku kigulu kya Seiru madiku manyingi.

²Na Yahova ya mbolera, na a vola,

³Livodonkana lya mu vodonkani ku kigulu yiki li duki: mu girunkane ku, luvega lwa kasikasini.

⁴Na u lage avandu yava, u va volere, Mu vite ku lwako lwavamwavo venyu avana va Esau, ava menyi Seiru; navo va la mu tia. Mwehenze bulahi;

⁵mu ta hing'ana navo; kigira si nda mu ha ku kivala kyavo, kali kuduka kya mu sena ku induvatiru yekirenge; kigira nda ha Esau kigulu kya Seiru kuva miyandu gyigye.

⁶Mu la gula kuvo vyokulia nefetha yenyu, mu duke kulia; namadzi mu la gula kuvo nefetha yenyu, mu duke kunwa.

⁷Kigira Yahova Nyasaye wowo u ku gasidzi mmiyinzi gyosi gyamakono gogo; ya manya ligenda lilyo mu kyangalangwi kinene yiki: mihiga makumi gane yigyi Yahova Nyasaye wowo ya li halala nive; si wa daka kindu.

⁸Kunangwa kwa vita ha luvega ha vamitu vetu avana va Esau, ava menyi mu Seiru, kutwula ku inzira ye Kereremu, kutwula Elathu, nokutwula Ezion-geberi. Na kwa girunkana nokuvita inzira yekyangalangwi kya Moabu.

⁹Na Yahova ya mbolera, U ta dambidza Moabu, kandi u ta hing'ana navo mbulwani; kigira si nda kuha ku kivala kikye ku ki gumira; kigira mmali kuha avana va Loti kugumira Ari.

¹⁰(Avamenya ho kale na Vaemi va veye avandu avanene, avanyingi, avatambi, kuli Vaanaki:

¹¹navene yava va ganaganangwa kuva emindu, kuli Vaanaki; navutswa Vamoabu va va langa Vaemi.

¹²Na Vahori va menya Seiru ku matsyambiri, navutswa avana va Esau va va londa; na va va dividza imbiri wavo, na va menya mbugono bwavo; kuli Israeli va kola mkivala kyemiyandu gyigye, kya Yahova ya va ha.)

¹³Kunangwa kalunu mu singire, mwambuke mugera gwa Zeredi. Na kwinye kwambuka mugera gwa Zeredi.

¹⁴Namadiku ga kwa tsitsanga kutwula Kadesh-barnea, kuduka lwa kwambuka mugera gwa Zeredi, ga li mihiga makumi gavaka na gyitano na gyivaka; kuduka likula lyosi lyavasatsa avelihe lya dividzwa, kuli Yahova ya visuhira.

¹⁵Kandi mukono gwa Yahova gwa li kuvo, kuvononya kuvatwulidza hagati ha hokusosa, va luhe va duke kuhera.

¹⁶Kunangwa ga duka, lwa va mali kuhera avasatsa vosi velihe, nokukudza kutwula hagati ha avandu,

¹⁷Yahova ya mbolera, na a vola,

¹⁸Lero mwambuke Ari, lwako lwa Moabu:

¹⁹na lwa mu duka himbi ku luvega lwavana va Amon, u ta dambidza avana va Amon, kandi u ta hing'ana navo; kigira si nda ku ha ku kivala kyavana va Amon kuva miyandu: kigira nda ha avana va Loti kuva miyandu gyavo.

²⁰(Yiki kandi ki volangwa kuva kivala kya Emindu: Emindu va menya yo ku matsyambiri; navutswa Vaamoni va va langa Vazamzumi,

²¹avandu avanene, navanyingi, navatambi, kuli Vaanaki; navutswa Yahova ya vononya imbiri wavo; na va va londa, ni va menya mbugono bwavo;

²²kuli ya kolera avana va Esau, ava menyi mu Seiru, lwa ya dividza Vahori va twula imbiri wavo; na va va londa, navo va menya mbugono bwavo kali kuduka lero.

²³Na Vaavim, va menya mu tudala kuduka ha Gaza, Vakafitori, avatwula Kafitori va vononya, ni va menya mbugono bwavo.)

²⁴Mu vuke, mu tange lugendo lwenyu, mwambuke livona lya Arnon: henza, mbiki mmakono gogo Sihon Muamori, mwami wa Heshibon, nekivala kikye; mu tange kukigumira, mu hing'ane naye mbulwani.

²⁵Lero nda tanga kuvika litihidza lilyo nelitibwa lilyo ku avandu va veye isi weligulu hosi, lwa va hulira makuva gogo, va la degera, na va la henda mwoyo kigira ive.

²⁶Na nda tuma avatumwa kutwula mu kyangalangwi kya Kedemothu ku Sihon mwami wa Heshibon namakuva gemirembe, kuvola,

²⁷Mpe munwa kuvita mu kivala kikyo: nda genda vutswa ku inzira, si nda girunkana kali kutsia ku mukono mulungi kinga mukono mmosi.

²⁸U la ngulidza vyokulia ku ifetha, nduke kulia; na u la mba madzi ku ifetha, nduke kunwa: navutswa u la mba munwa kuvita mu ku virenge vyange;

²⁹kuli avana va Esau ava menyi mu Seiru, na Vamoabu ava menyi mu Ari, v a nkolera; nduhe nduke kwambuka Yordani kwingira kivala kya Yahova Nyasaye wetu ya ku ha.

³⁰Navutswa Sihon mwami wa Heshibon si ya ku ha munwa kumuvita; kigira Yahova Nyasaye wowo ya dinyeridza roho gwigwe, na a vika mmwoyo gwigwe kirage, a duke kumbika mu makono gogo, kuli ga veye lero.

³¹Na Yahova ya mbolera, Henza, nda tanga kuvika Sihon nekivala kikye havulavu imbiri wowo: na u tange kukigumira, u duke kunyola kivala kikye ki ve miyandu gyigyo.

³²Hene yaho Sihon ya twulira kwinye, uyu navandu veve vosi, kulwana ha Jahazu.

³³Yahova Nyasaye wetu ya mu vika havulavu kuguutwa imbiri wetu; kwa mu duya, uyu navana veve, navandu veve vosi.

³⁴Kwa vugula madala gege gosi inyinga zana, kwononya ligali avasatsa, navakali, navana vamadala gosi; si kwa leka kali mulala:

³⁵navutswa tsing'ombe tsyavo kwa vugula kuva vilanye vyetu, halala nelilanya lya madala ga kwa vugula.

³⁶Kutwula Aroeri, li veye ku luginga lwa livona lya Arnon, nelidala li veye mu livona, kali kuduka Gileadi, si ha li nelidala lyelidigi litambi lya kutama Yahova Nyasaye wetu ya ga vika havulavu kuguutwa imbiri wetu:

³⁷navutswa si wisunda himbi ku kivala kyavana va Amon; tsimbega tsyosi tsyomugera gwa Jaboku, namadala gekivala kyevigulu, na hosi ha Yahova Nyasaye wetu ya ku gaya.