Read lulogooli Kwidzulitsa 23 Bible Online

Kwidzulitsa 23 - lulogooli bible

Kwidzulitsa 23

¹Uyu u duvuki manege, kinga u kaliki ubusatsa bwibwe, a vule kwingira mu livugana lya Yahova.

²Nomwana wenda simba a vule kwingira mu livugana lya Yahova; kali kuduka ku kisukululwi kyelikumi ku va veye veve a vule kwingira mu livugana lya Yahova.

³Muamoni, kinga Mumoabu a vule kwingira mu livugana lya Yahova; kali kuduka ku kisukululwi kyelikumi, mundu wavo a vule kwingira mu livugana lya Yahova mihiga nemihiga:

⁴kigira lwa mwa twula Egepeti, si va mu vuganira nobukima namadzi ku inzira, kandi kigira va lagana na Balaam mwana wa Beori wa Pethoru li veye mu Mesopotamia a duke kukulaama.

⁵Navutswa Yahova Nyasaye wowo si ya bugirira kuhulira Balaam; Yahova Nyasaye wowo ya girunkanya vilaamo kuva ligasidza ku ive, kigira Yahova Nyasaye wowo ya ku yanza.

⁶U vule kwenya mirembe gyavo kinga ubugasu bwavo amadiku gogo kazozo.

⁷U ta vihirirwa Muedom, kigira a veye amwavo wowo: u ta vihirirwa Muegepeti; kigira wa li mumenya mu kivala kikye.

⁸Avana vavo ava li vulwa, velikula li kola kavaka vingire mu livugana lya Yahova.

⁹Lwa u twulira vasigu vovo, no u veye hokusosa, welinde ku vindu vyosi vi veye vidamano.

¹⁰Na a va na a veye ku mwinye, wa vula kuva museredze kigira aga duki kuye ubudiku, hene yaho a tsie kyova wa hokusosa, a vule kwingira hokusosa:

¹¹navutswa lwa gu veye himbi mgolova, uyu yesinge; neliuva lwa li mala kuyera, yingire mu hokusosa.

¹²Na u ve nobwiyangu kyova wa hokusosa, ho kutsia mu kifumbu:

¹³na u la va nekisiri mu vyuma vivyo; na ga la duka, lwa u tsia mu kifumbu, u yave nekisiri, nokugirunkana nokuhuma kya twula ku ive:

¹⁴kigira Yahova Nyasaye wowo a gendanga mu hokusosa, kukuhonnya, nokukuvikira havulavu vasigu vovo imbiri wowo; kigira yaga hokusosa hoho ha ve hatakatifu, gase a la lola ku ive kindu ki ta li kisiyeku, na a la girunkana kukuleka.

¹⁵U tirannya umutugwa ku wa mutuga lwa a mala kwehonya kutwula ku wa mutuga kuduka ku ive:

¹⁶a menya nive, hagati hoho, mu viribwa vivyo kilala kuvyo ha a li tovola, kuli a yanza ligali: u ta mu dambidza.

¹⁷Ha ta va nomuheyi mu avana vakana va Israeli, kinga ha ta va nomuheyi mu avana vayai va Israeli.

¹⁸U ta leta amadanyi gomuheyi, kinga madanyi gembwa, mu inyumba ya Yahova Nyasaye wowo kigira lisuuviridza lyosi: kigira vindu yivi vyombi vi veye livihiriridza ku Yahova Nyasaye wowo.

¹⁹Inyinga u hambidza amwavo wowo kivete u ta meda ku kyambeti mba; kyambeti kyeifetha, kyambeti kyevyokulia, kinga kyambeti kyekindu ku vyosi vi hambidzangwa kivete.

²⁰Ku mugeni u nyala kumuhambidza kivete kyekyambeti; navutswa ku amwavo wowo u ta mu hambidza kivete kyokuvika ku kyambeti mba, kuduka Yahova Nyasaye wowo a duke kukugasidza mu vyosi vya u vika ku mukono gugwo, mu kivala kya wingira mu kukigumira.

²¹Lwa wivika lyelaga ku Yahova N y asaye wowo, u ta gadahala kutunga: kigira Yahova Nyasaye wowo si d la vula kuvanza ku ive; na ga la duka kuva ku ive ubwoni.

²²Navutswa ni i va u vula kwivika lyelaga, si bu la va ubwoni ku ive mba.

²³Aga twuli ku munwa gugwo u ga gumire nokugakola; kuli wa wivika lyelaga ku Yahova Nyasaye wowo, ni ki veye kihaanwa kyobuyanzi, kya wa suuviridza nomunwa gugwo.

²⁴Lwa wingira mmulimi gwa muzabibu gwo mutende wowo, u lie amazabibu ago ku kwigutidza, kuli liyanza lilyo; navutswa u ta ga vika mu kiju kikyo.

²⁵Lwa wingira mu vya mera vyomutende, u nyala kuvunga viyangala nomukono gugwo; navutswa u ta hila mbano gwokugesa ku vyamera vyomutende mba.