Read lulogooli Kwidzulitsa 27 Bible Online

Kwidzulitsa 27 - lulogooli bible

Kwidzulitsa 27

¹Na Musa na vakulundu va Israeli va laga avandu, ni va va volera, Mu gumire lilaga lyosi lya mmulaganga lero.

²Na ga la va ku lidiku lya mu lyambuka Yordani kutsia mu kivala kya Yahova Nyasaye wowo a ku ha, u la simika amagina manene, nokugabuula nobudohi:

³na ung'ode kugo makuva gosi agelilaga yili, lwa u mala kwambuka; u duke kwingira mu kivala kya Yahova Nyasaye wowo a ku ha, kivala ki gangulukanga amaveere nobwuki, kuli Yahova Nyasaye wavaguga vovo, ya ku suuviridza.

⁴Kunangwa, lwa mwambuki Yordani, mu simike magina yaga, aga mmu laganga lero, mu kigulu Ebali, u ga buule nobudohi.

⁵Kandi mwombake yo ubwali ku Yahova Nyasaye wowo ubwali bwa magina: u ta tumekira kiju kyekivya kugo mba.

⁶Wombake ubwali bwa Yahova Nyasaye wowo namagina ga ta vadzwa; u haane ku Yahova Nyasaye wowo vihaanwa vyokusambwa kubwo:

⁷kandi u lombe vihaanwa vyemirembe, u liire ho, na u sangale imbiri wa Yahova Nyasaye wowo.

⁸Na u ng'ode ku magina makuva gelilaga yili lyosi habulavu ligali.

⁹Musa navasalisi Valevi va volera Israeli vosi, ni va vola, U kiring'ane u hulire, O Israeli: Lero u gwiye avandu va Yahova Nyasaye wowo.

¹⁰Kunangwa u hulire mwoyo gwa Yahova Nyasaye wowo, u kole malago gege nemiima gigye, ga nku laganga lero.

¹¹Musa ya laga avandu yavo lidiku yilyo, na a vola,

¹²Yava va singire ku kigulu kya Gerizim kugasidza avandu, lwa mu mali kwambuka Yordani: Simeoni, na Levi, na Yuda, na Isakari, na Yosefa, na Benjamini.

¹³Na yava va singire ku kigulu kya Ebali ku lilaama: Rubeni, na Gadi, na Asheri, na Zebuloni, na Dan, na Nafitali.

¹⁴Na Valevi va tivule, na va volere avasatsa vosi va Israeli nomwoyo munene.

¹⁵A laamwe umundu u lombanga kifwananyi ki vadzwa kinga kutuulwa, ki veye livihiriridza ku Yahova, gyi veye miyinzi gyamakono gomusidza, na a ki singeridza makiriri. Navandu vosi va tivule va vole, Amini.

¹⁶A laamwe u kyayanga dada wewe kinga mama wewe. Navandu vosi va vole, Amini.

¹⁷A laamwe u twulidzanga lwako lwomutende wewe. Navandu vosi va vole, Amini.

¹⁸A laamwe u gotidzanga mboku a gota inzira. Navandu vosi va vole Amini.

¹⁹A laamwe u kyaminyanga likalagirwa lyomugeni, nombisandu, nomukunzakali. Navandu vosi va vole Amini.

²⁰A laamwe u gonanga nomukali wa dada wewe, kigira u vimbuye kyahonyo kya dada wewe. Navandu vosi va vole, Amini.

²¹A laamwe u gonanga netsing'ano tsyosi tsyetsinyama. Navandu vosi va vole, Amini.

²²A laamwe u gonanga nombotso, mukana wa dada wewe, kinga wa mama wewe. Navandu vosi va vole, Amini.

²³A laamwe u gonanga na navizala. Navandu vosi va vole, Amini.

²⁴A laamwe u duyanga mutende wewe makiriri. Navandu vosi va vole, Amini.

²⁵A laamwe u vugulanga kikukula yiite u ta li namahyolo. Navandu vosi va vole, Amini.

²⁶A laamwe u vula kudinyeridza amakuva gelilaga yili nokugakola. Navandu vosi va vole, Amini.