Read lulogooli Kwidzulitsa 28 Bible Online

Kwidzulitsa 28 - lulogooli bible

Kwidzulitsa 28

¹Na ga la duka, nu u va nu u hulira ligali mwoyo gwa Yahova Nyasaye wowo, nokulinda nokukola malago gege gosi ga nku laganga lero, hene yaho Yahova Nyasaye wowo a la ku vika igulu ku tsihiri tsyosi tsyomu lirova:

²nobugasu yibu bwosi bu la duka ku ive, nokukunyola, lwa u hulira mwoyo gwa Yahova Nyasaye wowo.

³U la gasidzwa mu lidala, u la gasidzwa mu mulimi.

⁴U la gasidzwa ku lwivulu lwe inda yoyo, noku lwivulu lwekivala kikyo, noku lwivulu lwemitugu gyi gyo, nelimedeka lyetsing'ombe tsitsyo, navana vamagondi gogo.

⁵U la gasidzwa mu kihinda kikyo, nomu kidera.

⁶U la gasidzwa lwa wingiranga, u la gasidzwa lwa u twulanga.

⁷Yahova a la kola avasigu vovo ava ku vukiranga va duywe imbiri wowo: va la ku twulira ku inzira indala, na va liruka imbiri wowo ku tsinzira tsitano na tsiviri.

⁸Yahova a la laga ubugasu budze ku ive mu magungi, na mu vyosi vya u vika ku mukono gugwo; na a la ku gasidza mu kivala kya Yahova Nyasaye wowo a ku ha.

⁹Yahova a la ku kola kuva ihiri imakatifu kuye, kuli ya kwisuhira; nu u va nu u gumira malago ga Yahova Nyasaye wowo, nokugenda mu tsinzira tsitsye.

¹⁰Navandu vosi velirova va la lola ndi, ive u langwa ku lieta lya Yahova, na va la ku tia.

¹¹Na Yahova a la ku kola u ve nobunyingi bwobugasu, mu lwivulu lwenda yoyo, nolwalo lwetsinyama tsitsyo, noku lyama lyekivala kikyo, mu kivala kya Yahova yisuhira vaguga vovo a la ku ha.

¹²Yahova a la ku kunulira ligungi lilye lilahi, nalyo li veye ligulu, ku lihaana imbula yekivala kyikyo ku tsinyinga tsyayo, nokugasidza miyinzi gyomukono gugwo gyosi: na u la hambidza tsihiri tsinyingi kivete, na ive si u la hamba kivete mba.

¹³Yahova a la ku kola kuva umutwe, u la vula kuva mkira; na u la va igulu yeng'ine, na u la vula kuva hasi; nu u va nu u k hulira malago ga Yahova Nyasaye a wowo, ga nku laganga lero ndi, noku gahenza nokugakola,

¹⁴ni mu vula kugirunkana kuleka amakuva gosi aga mu laga lero, kutsia ku mukono mulungi kinga ku mmosi, kulonda avanyasaye vandi kuvatumekira.

¹⁵Navutswa ga la va, nu u va nu u vula kuhulira mwoyo gwa Yahova Nyasaye wowo, kukola malago gege gosi nemiima gyigye gya nku laganga lero, hene yaho vilaamo yivi vyosi vi la duka ku ive, nokukunyola.

¹⁶U la laamwa mu lidala, na u la laamwa mu mulimi.

¹⁷U la laamwa mu kihinda kikyo, na u la laamwa mu kidera kikyo.

¹⁸U la laamwa mu lwivulu lwe inda yoyo, nelyama lyekivala kikyo, na limedeka lyetsing'ombe tsitsyo, nevimeme vekyayo kikyo.

¹⁹U la laamwa lwa wingiranga, u la laamwa lwa u twulanga.

²⁰Yahova a la leta ku ive vilaamo, nekivi, nelihebwa mageli, mu vyosi vya u vika ku mukono gugwo kukola, u luhe u dive, nokugota bwangu; kigira ubudamano bwelikola lilyo, lyagira ni u ndeka.

²¹Yahova a la ku hambanya ku iplegi, a luhe a ku l dividze mu kivala, kya wingira mu kukigumira.

²²Yahova a la ku duya namagero, noluhudza, nokuhiya, noluya, nekivavi, neliniala, nobuguku; navyo vi la kukunga u luhe u dive.

²³Neligulu lilyo li veye igulu ku mutwe gugwo li la gwa mugasa, nekivala ki veye isi wowo ki la gwa kivya.

²⁴Yahova a la kola imbula yekivala kikyo i gwe kuli ubusie nolugukyi: vi la duka ku ive kutwula migulu, u luhe u dive.

²⁵Yahova a la ku kola u duywe imbiri wavasigu vovo; u la va twulira ku inzira indala, u liruka imbiri wavo ku tsinzira tsitano na tsiviri: na u la sikiswa yiyi ne yiyi mu ubwami bwosi bwo mu lirova.

²⁶Nomubiri mukudzu gugwo gu la va kyokulia kyamanyonyi gosi ago mbwerefu, netsinyama tsyosi tsyo mu lirova; na si ha la va nomundu wokuvigosa.

²⁷Yahova a la ku duya na livimba lya Egepeti, nelihi, nolwiyage, nokwekuta, vya u vula kuhona.

²⁸Yahova a la ku duya nobulalu, nobuboku, ligenya lyomwoyo;

²⁹na u la havatidza inyinga yombasu hagati, kuli mboku a havatidzanga mkisundi, si u la gasidzwa ku tsinzira tsitsyo mba: madiku gosi u la dambidzwa nokulanywa, na si ha la va nomundu wokukuhonnya.

³⁰U la kwa mukali, nomusatsa wundi a la va naye, u lombaka inyumba, na u la vula kumenya muyo: u la simika muzabibu, u la vula kutumekira makuyu gagwo.

³¹Ing'ombe yoyo i liitirwa imbiri wetsimoni tsitsyo, u la vula kulia inyama yayo: u la nyagwa isukiri yoyo netsingulu imbiri wommoni mumwo, u la vula kwiranyirwa: amagondi gogo, musigu wowo a la hebwa, u la vula kunyola mundu wokukuhonnya.

³²Avana vovo vayai navakana va la hebwa ihiri yindi; netsimoni tsitsyo tsi la henzerera nokukuvuka kigira likayirwa mbasu bei: na si ha la va nekindu mu bunyali bwomukono gugwo mba.

³³Makuyu gekivala kikyo, nelididikana lilyo lyosi, ihiri yindi ya u ta manya i la li lia; u la kupidzwa kivi nokushonolanywa kazozo;

³⁴kuduka u ve wobulalu kigira lilola lyetsimoni tsitsyo tsi li lola.

³⁵Yahova a la ku duya ku masigamo, noku virenge, namavimba maliduhu, ga u ta nyala kuhonywa, kutwula ku induvatiru yekirenge kikyo, kuduka mu lwote lwomutwe gugwo.

³⁶Yahova a la ku hila, nomwami wowo wa u li vika igulu ku ive, ku ihiri ya u ta manya, ive kinga vaguga vovo; na u la tumekira vanyasaye vandi, avemisala namagina.

³⁷Na u la duka kuva kyokugenya, namakuva getsing'ano, nelinyego, hagati ha avandu vosi ha Yahova a kwimirira.

³⁸U la hila bugutsa bunyingi mu mulimi, na u la tera bukekeke; kigira tsisigi tsi la bu lia;

³⁹u la simika mizabibu minyingi, na u la ga lomba, navutswa u la vula kunwa iwaini, kinga kwagula mazabibu; kigira tsing'ende tsi la ga lia.

⁴⁰U la va nemizeituni mu tsinzako tsitsyo tsyosi tsimbega tsyosi, na u la vula kwevaka maguta gagyo; kigira muzeituni gugwo gu la vunguluka makuyu gaguo.

⁴¹U livula avana vayai navakana, va la vula kuva avovo; kigira va la Ianywa.

⁴²Misala gyigyo gyosi nelyama Ivekivala kikvo tsitsigi tsi la vi gumira.

⁴³Mumenya u veye hagati hoho a la kira kunina igulu ku ive; na ive u la kira kwiika hasi.

⁴⁴Uyu a la kuhambidza kivete, u la vula kumuhambidza: a la va mutwe, ive u la va mukira.

⁴⁵Nevilaamo yivi vyosi vi la duka ku ive, na vi la ku londa, nokukunyola, u luhe u dividzwe; kigira si wa hulira mwoyo gwa Yahova Nyasaye wowo, nokugumira malago gege nemiima gyigye gya ya ku laga:

⁴⁶navyo vi la va ku ive ku lilolekidza neligenya, noku visukululwi vivyo mihiga nemihiga.

⁴⁷Kigira wa vula kutumekira Yahova Nyasaye wowo nobuyanzi, nobusangali bwomwoyo, kigira ubunyingi bwevindu vyosi:

⁴⁸kunangwa u la tumekira avasigu vovo ava Yahova a leta ku ive, nenzala, nobuluhu, nekyahonyo, nobudaka bwevindu vyosi: naye a la ku vika inira yekivya kwigoti lilyo, i luhe i ku dividze.

⁴⁹Yahova a la leta ku ive ihiri i twula ihale, ku nyasi kwelirova, bwangu kuli libuluka lyendidzu ihiri ya u ta manya lulimi lwayo,

⁵⁰ihiri yommoni mululu, si i la vererera mmoni mwomusakulu, kinga si yelidza musoleli;

⁵¹naye a la lia lwalo lwemitugu gyigyo, nelyama lyekivala kikyo, kuduka u luhe u dividzwe; na si a la ku lekera ubuswage, kinga iwaini, kinga maguta, limedeka lyetsing'ombe tsitsyo, kinga avana vamagondi gogo, kuduka a luhe a ku dividze.

⁵²Navo va la kwigalira mu viribwa vivyo vyosi kali madigi gogo amatambi getsingaga, aga wa suuvira, gike, mu kivala kikyo kyosi, tsimbega tsyosi na a la kwigalira mu viribwa vivyo vyosi tsimbega tsyosi mkivala kikyo kyosi, kya Yahova Nyasaye wowo ya ku ha.

⁵³Na u la lia lwivulu lwe inda yoyo mwene, inyama yavana vovo avayai navakana, ava Yahova Nyasaye wowo ya ku ha, mu ligalirwa nomu libofwa lyavasigu vovo va la ku dambidza.

⁵⁴Musatsa hagati henyu u veye muyesereru, nomusiyeku, imoni yeye i la va indamano ku amwavo wewe, noku mukali womu kiritu kikye, noku vatigala ku avana veve avatigala naye;

⁵⁵kuduka a la vula kuha mulala kuvo ku inyama yavana veve ya a li lia, kigira si a veye ne kya tigala kuye, mu ligalirwa nelibofwa lyavasigu vovo a la ku dambidza mu viribwa vivyo vyosi.

⁵⁶Mukali hagati henyu u veye muyesereru, nomusiyeku, si a bugirira kuvika induvatiru yeye hasi kigira busiyeku nobuyesereru, imoni yeye i la va indamano ku musatsa womu kiritu kikye, noku mwana wewe muyai, noku mwana wewe mukana,

⁵⁷noku indanya yeye ya twula hagati he virenge vivye, noku avana veve va a livula; kigira a la va lia makiriri kigira lyenya lyevindu vyosi, mu ligalirwa nelibofwa lyavasigu vovo va la mu dambidza mu viribwa vivyo.

⁵⁸Nu u va nu u sula kulinda nokukola amakuva gosi agelilaga yili lya ng'odwa mu kitabu yiki, u duke kutia lieta yili lyobukumi nelyokutihidza, YAHOVA NYASAYE WOWO;

⁵⁹hene yaho Yahova a la kola maduya gogo ga ve geligenya, namaduya golwivulu lulwo, maduya manene ligali, na ga madiku manyingi, nobulwaye budinyu, bwokumenya madiku manyingi.

⁶⁰Na a lirannya ku ive ubulwaye bwosi bwa Egepeti, bwa wa tia, na bu la hamba ku ive.

⁶¹Kandi ubulwaye bwosi, namaduya gosi, aga ta ng'odwa mu kitabu kyelilaga yili, Yahova a la bu vika ku ive, kuduka u luhe u dive.

⁶²Na mu la tigala vakekeke ku livalidzwa, kali ni mwa li kuli tsing'ereng'ani tsyomigulu ku bunyingi; kigira wa vula kuhulira mwoyo gwa Yahova Nyasaye wowo.

⁶³Kandi ga la va, kuli Yahova ya sangala ku mwinye kumukolera ubulahi, nokumukola avanyingi, na ndiyo kandi Yahova a la sangala ku mwinye kumugotidza, nokumudividza; na mu lifwa mu kivala kya mwingira mu kukigumira.

⁶⁴Na Yahova a la mu salanya hagati he tsihiri tsyosi, kutwula ku luvega yilu lwelirova kuduka ku luvega yilu lwelirova; na u la tumekira avanya saye vandi ha zana, ava u ta manya, ive kinga avaguga vovo, navo va veye misala namagina.

⁶⁵Na hagati ha tsihiri yitsi u la vula kunyola bwelemeridzi kali hakuzu, kandi u Ia vula kuva na hokusosidzira induvatiru yekirenge kikyo: navutswa ha zana Yahova a la ku ha mwoyo gwokudegera, netsimoni tsi luhi, neliverera lyomwoyo,

⁶⁶nelivamwoyo lilyo li la hayahaya imbiri wowo; kandi u la va nobutii ubudiku nombasu, na u la vula kuva nelisuuvira ku livamwoyo lilyo.

⁶⁷Mugamba u la vola, Ngano gu ve mgolova namgolova u la vola, Ngano gu ve mugamba kigira ubutii bwomwoyo gugwo bwa u tia, nelilola lyetsimoni tsitsyo lya u li lola.

⁶⁸Yahova a la ku hila kandi Egepeti namato, ku inzira ya nda ku volera, Si u la gi lola kandi kali hakuzu: na yaho mu legulidza ku avasigu venyu mu ve avatugwa vayai navatugwa vakana, na ha la vula kuva nowenya kumugula.