Read lulogooli Kwidzulitsa 29 Bible Online

Kwidzulitsa 29 - lulogooli bible

Kwidzulitsa 29

¹Yaga namakuva gelilagana lya Yahova ya laga Musa a lombe navana va Israeli mu kivala kya Moabu, li medwa ku lilagana lya ya lomba navo mu Horebu.

²Na Musa yanira ku Israeli vosi, na a va volera, Mu loli vyosi vya Yahova ya kola ku Farao mu kivala kya Egepeti imbiri wetsimoni tsyenvu, uyu na vatugwa veve vosi, nekivala kikye kyosi;

³amageridzwa manene agetsimoni tsitsyo tsya lola, vilolekidzu, nevyokugennya vinene:

⁴navutswa Yahova si ya mu ha mwoyo kumanya, kinga tsimoni kulola, kinga amatu kuhulira, kuduka lero.

⁵Na inze nda mwimirira mihiga makumi gane mu kyangalangwi: tsingubo tsyenyu si tsya kunguha ku mwinye mba, kinga kilatu kikyo si kya kunguha mu kirenge kikyo.

⁶Si mwa lagira ubukima, kinga si mwa nwa iwaini, kinga kyokuhambikidza; mu duke kumanya inze mbeye Yahova Nyasaye wenyu.

⁷Na lwa mwa duka hano, Sihon mwami wa Heshibon, na Ogu mwami wa Bashan, va ku twulira kulwana na kwinye, na kwa va kuya:

⁸na kwa vugula kivala kyavo, ni ku ha Varubeni, na Vagadi, nenusu yehiri ya Vamanase, ki ve miyandu.

⁹Kunangwa mu gumire amakuva gelilagana yili, mu ga kole, bu duke kuva bulahi ku mwinye mu vyosi vya mu kola.

¹⁰Lero mu singiye imbiri wa Yahova Nyasaye wenyu mwosi; mitwe gyenyu, netsihiri tsyenyu, navakulundu venyu, navanyampara venyu, avasatsa vosi va Israeli,

¹¹avana venyu, navakali venyu, namumenya wowo u veye hagati ha hokusosa hoho, kutwula ku umutenyi wetsinku tsitsyo kali ku umuleti wamadzi gogo;

¹²u duke kwingira mu lilagana lya Yahova Nyasaye wowo, nelyesuha lilye, lya Yahova Nyasaye wowo a kolanga nive lero;

¹³a duke kukuvika lero u ve ihiri kuye, naye a duke kuva Nyasaye ku ive, kuli ya ku volera, kandi kuli yesuhira avaguga vovo, Abrahamu, na Isaka, na Yakobo.

¹⁴Si nomba lilalgana yili nelyesuha yili nemwinye mweng'ine,

¹⁵navutswa halala na uyu u singiye hano halala ne kwinye lero imbiri wa Yahova Nyasaye wetu, kandi halala na uyu u ta veye ho halala na kwinye lero

¹⁶(higira mu manya kuli kwa menya mkivala kya Egepeti, na kuli kwa vita hagati hetsihiri yitsyo tsya mwa vita hagati havo,

¹⁷na mwa lola livihiriridza lyavo, nekifwananyi kyavo, misala namagina, if etha nethahabu, vya li kuvo);

¹⁸gase ha la va nomundu hagati henyu musatsa, kinga mukali, kinga venyumba, kinga ihiri, womwoyo gwigwe gu girunkana lero kutwula ku Yahova Nyasaye wetu, kutsia kutumekira avanyasaye vetsihiri yitsyo; gase ki la va hagati henyu kitinya kivulanga ubululu nabisintho,

¹⁹na ga veye, na a va na a hulira amakuva gevilaamo yivi, yegasidze mmwoyo gwigwe, a vole, Nda va nemirembe, kali ni ng'enda mu kirage kyomwoyo gwange, kumeda lihambika ku ubuluhu.

²⁰Yahova si a li msameha, navutswa inyinga yeyo ubutima bwa Yahova nelikendeka lilye vi la vuya mwoki ku mundu uyu, nevilaamo vyosi vya ng'odwa mu kitabu yiki vi la menya kuye, na Yahova a leya lieta lilye isi weligulu.

²¹Na Yahova a la mu vika ha luvega ku budamano mu tsihiri tsyosi tsya Israeli, kuli vilaamo vyosi vyelilagana vya ng'odwa mu kitabu kya malago yiki.

²²Nelikula li la duka, avana venyu va li vuka inyima wenyu, nomugeni u li duka kutwula mu kivala kyehale, va la vola, lwa va lola maduya lyekivala yikyo, nobulwaye bwa Yahova ya ki kola kulwala;

²³na kuli kivala kyosi ki veye kibiridi, nomunyu, nalisamba, ki vule kutagangwa, kinga kwama, kinga ubulimu bu meranga mu mba, kuli li tung'aminywa lya Sodoma na Gomora, Adima na Zeboim, ga Yahova ya tung'aminya nobutima bwibwe, nelivihirirwa lilye

²⁴kuduka tsihiri tsyosi tsi la vola Kigira ki Yahova ya kola ndi kivala yiki? Kivune kyago ki veye ki kigira ki uluya lwelivihirirwa linene yili?

²⁵Hene yaho avandu va la vola Ga veye kigira va leka lilagana lya Yahova, Nyasaye wavaguga vavo, lya ya kola navo lwa ya va twulidza mu kivala kya Egepeti,

²⁶na va tsia kutumekira avanyasaye vandi, nokuvasigamira, avanyasaye va va ta manya, ava ya vula kuvaha:

²⁷kunangwa ubutima bwa Yahova bwakiidzwa ku kivala yiki, kuleta kukyo kilaamo kyosi kya ng'odwa mu kitabu yiki:

²⁸na Yahova ya viiha mu kivala kyavo nelivihirirwa, nobutima nobululu bunene, na a va ta mu kivala kindi, kuli ndi lero.

²⁹Vya viswa ni vya Yahova Nyasaye wetu, navutswa vya lang'aminywa ni vyetu ni vya avana vetu mihiga nemihiga, ku duke kukola amakuva gosi gelilaga yili.