Read lulogooli Kwidzulitsa 30 Bible Online

Kwidzulitsa 30 - lulogooli bible

Kwidzulitsa 30

¹Kandi ga la va, lwa vindu yivi vyosi vi duka ku ive, ubugasu nevilaamo, vya mbiki imbiri wowo, na ive u la vidzulitsa hagati hetsihiri tsyosi, ha Yahova Nyasaye wowo a ku kungi,

²na wenya kwirana ku Yahova Nyasaye wowo, nokuhulira mwoyo gwigwe kuli gosi ga nku laganga lero, ive navana vovo, no mwoyo gugwo gwosi, naroho gugwo gwosi;

³hene yaho Yahova Nyasaye wowo a la girunkanya lilanywa lilyo, na a la ku vera tsimbabasi, kandi a lirana kukuvungidza mu tsihiri tsyosi, ha Yahova Nyasaye wowo ya ku salanya.

⁴Ni i va ava kungwa vovo va veye ku kiheri kyeligulu, kutwula ha zana Yahova Nyasaye wowo a la ku vungidza, na kutwula ha zana a la ku vugula:

⁵na Yahova Nyasaye wowo a la ku leta mu kivala kyavaguga vovo va gumira, na ive u la ki gumira; na a la ku kolera bulahi, nokukukola u ve vanyingi kuvita avaguga vovo.

⁶Na Yahova Nyasaye wowo a la keva mwoyo gugwo, nomwoyo gwa avana vovo, u duke kuyanza Yahova Nyasaye wowo nomwoyo gugwo gwosi, na roho gugwo gwosi, u duke kuva mwoyo.

⁷Na Yahova Nyasaye wowo a la vika vilaamo yivi vyosi ku avasigu vovo, noku yavo ava ku dunyira, ava ku dambidza.

⁸Na ive u lirana nokuhulira mwoyo gwa Yahova, nokukola malago gosi gege ga nku laganga lero.

⁹Na Yahova Nyasaye wowo a la ku kola u ve nobunyingi mmiyinzi gyosi gyomukono gugwo, ku lwivulo lwe imla yoyo, nolwalo lwetsing'ombe tsitsyo, nelyama lyekivala kikyo kukuha bulahi kigira Yahova a la sangala kandi ku ive kukuha bulahi, kuli ya sangala ku vaguga vovo;

¹⁰nu u va nu u londa omwoyo gwa Yahova Nyasaye wowo, nokugumira malago gege, nemiima gyigye gya ng'odwa mkitabu yiki kyelilaga; nu u va nu u yeka ku Yahova Nyasaye wowo nomwoyo gugwo gwosi, na roho gugwo gwosi.

¹¹Kigira lilaga yili lya nku laganga lero, si li veye liliduhu kuvita ive, kandi si li veye ihale.

¹²Si li veye migulu, u luhe u vole, Ni bwaha u ku ninira mwigulu, a ku letere, yadze kukuvolera ku hulire, ku duke kulikola?

¹³Kandi si li veye engereka wenyanza, u luhe u vole, Ni bwaha u kwambukira inyanza, a ku letere, yadze kukuvolera, ku hulire, ku duke kulikola?

¹⁴Navutswa likuva yili li veye himbi ku ive, li veye mmunwa gugwo, nommwoyo gugwo, u duke kulikola.

¹⁵Henza, nku vikiye lero livamwoyo nobulahi imbiri wa ive, kandi likudza nobudamano;

¹⁶kuli nku laganga lero kuyanza Yahova Nyasaye wowo, nokugenda ku tsinzira tsitsye, nokugumira malago gege nemiima gyigye nelikalaga lilye, u duke kuva mwoyo nokumedeka, Yahova Nyasaye wowo a duke kukugasidza mu kivala kya wingira mu kukigumira.

¹⁷Navutswa mwoyo gugwo ni gu girunkana kuyeka haluvega, nokusula kuhulira, kandi u kweswa ha luvega, kusigamira avanyasaye vandi, nokuvatumekira;

¹⁸ng'ambanga ku mwinye lero ndi, ligali mwinye mu la diva; si mu nyala kumenya madiku manyingi mu kivala, kya wambukanga Yordani wingire ku kigumira.

¹⁹Nanganga ligulu nelirova kulolekidza ku mwinye lero kuli mbikiye imbiri wa ive livamwoyo nelikudza, ubugasu nevilaamo: kunangwa u tovole livamwoyo, u duke kuva mwoyo, ive navana vovo;

²⁰kuyanza Yahova Nyasaye wowo, kuhulira mwoyo gwigwe, nokuhambana naye; kigira a veye livamwoyo lilyo, nobutambi bwamadiku gogo; u duke kumenya mu kivala kya Yahova yisuhira avaguga vovo, Abrahamu, na Isaka, na Yakobo, kuvaha.