Read lulogooli Kwidzulitsa 32 Bible Online

Kwidzulitsa 32 - lulogooli bible

Kwidzulitsa 32

¹Mu tegidze amatu, mwinve ligulu, na nda vola; Nelirova li huliridze amakuva gomunwa gwange.

²Amegidzo gange ga la sunduka kuli imbula; Namakuva gange ga la tonyatonya kuli lime, Kandi kuli lumanyangoko ku ubulimu buvisi, Na kuli ulunyirira ku tsingutsa.

³Kigira nda landidza lieta lya Yahova: Mu he Nyasaye wetu ubunene.

⁴Niye Lwanda, miyinzi gyigye gyi veye midukanu; Kigira tsinzira tsitsye tsi veye tsinungi: A veye Nyasaye wobusuuvirifu bugira budamano, A veye wa geligali, a veye ubulungi.

⁵Veyononyi, si va veye avana veve, imbala i veye yavo; Va veye likula lidamano lyobukyamu.

⁶Lisantidza lya mu hedzanga Yahova ni yili, Mwinye avandu avasiru, ava ta li nobugeeri? Si a li dada wowo wa ku gula? Niye wa ku lomba, nokukudinyeridza.

⁷Widzulitse madiku ga kale, U ganagane mihiga gyevisukululwi vinyingi: U teve dada wowo, naye a la ku mannya; Avakulundu vovo, navo va la ku volera.

⁸Inyinga U-veye-lgulu-Ligali ya haana miyandu ku vetsihiri, Lwa yavukanya avana vavandu, Ya vika tsinzako tsyavandu Kuli livalidzwa lya avana va Israeli.

⁹Kigira kidieli kya Yahova ki veye avandu veve; Yakobo a veye kidieli kyemiyandu gyigye.

¹⁰Ya mu nyola mu kyangalangwi, Mu kyangalangwi kyere kukutihidza Ya mu kumbiridza, na a mu linda, Ya mu linda kuli indolelo yemoni.

¹¹Kuli indidzu i sambulanga inyumba yayo, Ne yedungerera igulu ku avanavayo, Ni inyira tsimbaha tsyayo, nokuvavugula, Ya va ginga ku tsimbaha tsyayo.

¹²Yahova yeng'ine ya mwimirira, Kandi si ha li nomunyasaye mugeni halala naye.

¹³Ya mu nyinnya igulu he kivala kye ginga, Naye ya lia limedeka lyemilimi; Na ya mu nyunnya ubwuki ku lwanda, Namaguta kutwula ku ligina lidinyu;

¹⁴Maguta geng'ombe, namaveere ge kyayo, Halala namaguta gavana vamagondi, Namagondi makole ge Kibashan, netsimbuli, Halala nobulahi bwengano; Ku masahi gamazabibu wa nwa iwaini.

¹⁵Navutswa Jeshurun ya komera, na a kupa luvasi: U gwiye munetu, nokugwa mukomeru nomunifu, na wa terereka; Ma ya leka Nyasaye wa mu lomba Na ya lega Lwanda lwobuhonywi bwibwe.

¹⁶Va mkendekidza ku vanyasaye vageni; Na mavihiriridzo va mvihiriridza.

¹⁷Va haana vihaanwa ku mademoni, ga ta li Nyasaye mba, Ku vanyasaye va va ta manya, Ku vanyasaye vahya va senuki bwangu ndi, Ava vaguga venyu va vula kutia.

¹⁸U vuli kwidzulitsa Lwanda lwa kwivula Wiviriye Nyasaye wa kwivula.

¹⁹Yahova ya lola, na a va vihirirwa, Kigira livukidza ubutima bwibwe lyavana veve avayai navakana.

²⁰Na a vola, Nda visa mumoni mwange kuvo Nda lola kiheri kyavo ki la va ndi: Kigira va veve likula lidamano Avana ava ta li nobusuuvirifu.

²¹Va vukidza likendeka lyange nevindu vi ta li Nyasaye; Va vukidza inze ubutima bwange ku vindu vyavo vya vutswa: Na inze nda va kendekidza nayavo ava ta li avandu; Nda vukidza livihirirwa lyavo nehiri isiru.

²²Kigira muliru gu fwaneywi mbutima bwange, Gwakanga kuduka mu Kihadisi kyoluliva, Nagwo gu liye lirova halala nelimedeka lyalyo, Nokwadukidza muliru ku mise gyevigulu.

²³Nda tsuka ubudamano kuvo; Kandi nda vungulula mibano gyange kuvo:

²⁴Inzala i la va dambidza, namanda gomuliru ga la va lia Nelidividzwa lilulu; Na nda leta kuvo amino getsinyama, Halala nobusungu bwevindu vi molanga mmarova.

²⁵Kyova kivavi ki la vononya, Mu inyumba litihidza; Vyononya mwana muyai nomwana mukana, U nunanga, halala nowetsimbudzi.

²⁶Nda vola, ngano nda va salanya ihale, Ngano lidzulitswa lyavo li heri mbandu;

²⁷Ni ga ta li nda tia ubutima bwavasigu vavo, Gase avasigu vavo va la kyaminya inkuva, Nokuvola, Mukono gwetu gu gingeywi igulu, Na Yahova si a kola yaga gosi.

²⁸Kigira va veye ihiri i ta li nobugeeri, Na ava vula kuva nelimanya muvo.

²⁹Nkano va veye nobugeeri kumanya yaga, Va duke kuganagana kiheri kyavo

³⁰Mulala a nyala ndi kukunga elfu N a vaviri va nyala ndi kukunga tsielfu likumi, Ni ga ta li Lwanda lwavo lwa va gulidza, Na Yahova ku va leka havulavu?

³¹Kigira lwanda lwavo si lu veye kuli Lwanda lwetu, Kali avasigu vetu avene va veye avakalagi.

³²Kigira muzabibu gwavo gu veye muzabibu gwa Sodoma Nogwemilimi gya Gomora: Mazabibu gavo ga veye mazabibu gobusungu Nevisaganyi vyavo vi veye vilulu:

³³Lwaini yavo i veye busungu bwetsinzoka, Bu veye busungu bululu bwekihirigoma.

³⁴Si bu vikwa mu kedera kyange, Nokuvikwa muhuri mu akiba yange?

³⁵Kisalya ni kyange, nokutunga, Inyinga yekirenge kyavo ki la terera: Kigira lidiku lyekivi kyavo li veye himbi Nevindu vi veye kuduka kuvo vi la kola bwangu.

³⁶Kigira Yahova a la kalagira avandu veve, A la vererera avatumekiri veve; Inyinga a lola tsingulu tsyavo tsi twuli kuvo, Kandi si ha tigala nomundu, wa bofwa kinga wa bohololwa.

³⁷Kandi a la vola, Avanyasaye vavo va veye haliha Lwanda lwa va suuvira;

³⁸Lwa lia maguta gevihaanwa vyavo, Nokunwa iwaini yevihaanwa vyavo vyokunwa? Va singire va mu konye, Va ve ingavo yenyu.

³⁹Henzi kalunu, Inze, ligali mbeye lye, Si ha veye nomunyasaye halala ninze: Nziitanga nokusimugukidza; Nzatanga lugoma, nokuhonnya; Na si ha veye nowundi u nyala kuhonnya mmukono gwange.

⁴⁰Kigira ng'inganga mukono gwange migulu, Nokuvola, Kuli mbeye mwoyo mihiga nemihiga,

⁴¹Nokuhyagala ubwogi bwekivavi kyange, Nomukono gwange gu gumiranga likalaga; Nda vanza avasigu vange kisalya, Nda tunga ava ndunyiranga.

⁴²Nda hambikidza mibano gyange namasahi, Nekivavi kyange ki la lia inyama; Halala na masahi ga yavo aviitwa na va lanywa, Mu miitwe gyavanyampara vavasigu.

⁴³Mwinye tsihiri, mwidzominye, halala navandu veve: Kigira a la vanza kisalya kyavatumekiri veve, A la vanza kisalya ku vasigu veve, Kandi a la lomba kyokukunika ubwoni ku kivala kikye, ku avandu veve.

⁴⁴Na Musa yadza na a vola amakuva yaga gosi golwimbu yilu mmatu gavandu, uyu, na Hoshea mwana wa Nuni.

⁴⁵Na Musa ya mala kuvolera Israeli vosi amakuva yago gosi;

⁴⁶na a va volera, mu vike mu myoyo gyenyu amakuva yaga gosi aga ndolekidzanga ku mwinye lero, na mu lage ku avana venyu va linde, nokukola amakuva gosi gelilaga yili.

⁴⁷Kigira si ga veye amakuva ga vutswa ku mwinye; kigira ga veye livamwoyo lyenyu, noku inkuva yiyi ma madiku genyu mu la ga kola manyingi ku kivala, kya mwambukanga Yordani kukigumira.

⁴⁸Na Yahova ya volera Musa lidiku yilyo, na a vola,

⁴⁹Wanegire mkigulu yiki kya Abarim, kuduka ku kigulu kya Nebo, ki veye mu kivala kya Moabu, engereka ya Yeriko; na u henze kivala kya Kanani, kya mbedzanga avana va Israeli kukigumira;

⁵⁰u kudzire mu kigulu ha wanegiranga u vungidzwe u ve halala naviko vovo, kuli amwavo wowo Haruni ya kudzira mu kigulu kya Horu, na a vungidzwa a ve halala navandu veve:

⁵¹kigira mwononya ku inze hagati ha avana va Israeli ha amadzi ga Meriba ha Kedeshi, mu kyangalangwi kya Zin; kigira si mwa ntakasa hagati ha avana va Israeli.

⁵²Kunangwa u la lola kivala imbiri wowo; navutswa si u la tsia kwingira mu kuduka mu kivala kya mbedzanga avana va Israeli.