Read lulogooli Kwidzulitsa 33 Bible Online

Kwidzulitsa 33 - lulogooli bible

Kwidzulitsa 33

¹Na yibu nobugasu, bwa Musa mundu wa Nyasaye ya gasidza avana va Israeli na a kikiri kukudza.

²Na a vola, Yahova ya twula Sinai, Ya va vukira kutwula Seiru; Ya ng'ereng'ana mkigulu kya Paran Yadza halala navatakatifu tsielfu likumi: Ku mukono mulungi gwigwe ha veye nelilaga lyomuliru kuvo.

³Ligali a yanza tsihiri tsyavandu; Avatakatifu veve vosi va veye mmukono gugwo; Navo vikala ha virenge vivyo; Sa mulala va la vugula amakuva gogo.

⁴Musa ya ku laga lilaga, Li veye miyandu gyelivugana lya Yakobo.

⁵Ya li mwami mu Jeshurun, Inyinga mitwe gyavandu va vugani Tishiri tsyosi tsya Israeli halala.

⁶Rubeni a ve mwoyo, a vule kukudza; Kandi avandu veve va ta va vakekeke.

⁷Ubugasu bwa Yuda ni yibu: na a vola, Yahova, u hulire mwoyo gwa Yuda, U mwingiridze mu avandu veve. Makono gege ga duke kumukonya; Na u la va mukonyi ku avasigu veve.

⁸Na ku Levi ya vola, Thumimi yoyo na Urim yoyo vi ve halala nomutakatifu wowo, Wa mu geridza ha Massa, Wa wa hing'ana naye ha madzi ga Meriba;

⁹Wa vola ku dada wewe, noku mama wewe, Si nda mu lola Kandi si a bugirira avamwavo veve, Kandi si ya manya avana veve mwene: Kigira va linda likuva lilyo, Navo va gumira lilagana lilyo.

¹⁰Va legidza Yakobo miima gyigyo, Na ku Israeli lilaga lilyo: Va la vika vimuli imbiri wowo, Nekihaanwa kidukanu kyokusambwa ku bwali bubwo.

¹¹Yahova, u gasidze liva lilye, U bugirire miyinzi gyamakono gege; U teme vikenge vya yavo ava mu vukiranga, Nevya yava ava mu dunyiranga, va ta vuka kandi.

¹²Ku Benjamini ya vola Umuyanze wa Yahova a la menya nemirembe kuye; A mu kinganga mbasu bei Na a menyanga hagati ha mavega gege.

¹³Na ku Yosefa ya vola, Kivala kikye, Yahova a ki gasidze, Ku evindu vyobuguli budinyu vyomigulu, noku lime, Noku luliva lu baamanga hasi,

¹⁴Noku vindu vyobuguli budinyu vyamakuyu geliuva, Noku vindu vyobuguli budinyu vyelimedeka lyemieli

¹⁵Noku vindu vilahi kuvita vyevigulu vyakale, Noku vindu vyobuguli budinyu vyotugulu twemihiga nemihiga,

¹⁶Noku vindu vyobuguli budinyu vyelirova nelidzulira lyakyo, Noku liyanza lya uyu u menya mu kasala: Ubugasu bu duke ku mutwe gwa Yosefa, Ku lwote lwomutwe gwa uyu wahulwa mu vamwavo veve.

¹⁷Watanga-kwivulwa ku likula lilye ubukumi bu veye bwibwe; Netsinziga tsyayo tsi veye kuli tsinziga tsyembogo: A la mina avetsihiri tsyosi natsyo, kuduka ku kiheri kyelirova: Navo va veye tsielfu likumi tsya Efiraim, Navo va veye tsielfu tsya Manase.

¹⁸Noku Zebuloni ya vola U sangale, Zebuloni, mu litwula lilyo; Na Isakari, mu mahema gogo.

¹⁹Va la langa tsihiri tsyosi tsi duke ku kigulu Va haane yo vihaanwa vyobulungi: Kigira va la nuna ubunyingi bwetsinyanza, Na akiba ya viswa mmuyeke.

²⁰Noku Gadi ya vola A gasidzwe u medanga Gadi: Uyu a menya kuli king'ang'a kikali, A tandulanga mukono, yee, nolwote kandi.

²¹Atovolakidielikyokutangamwene, Kigira kidieli kyomuhaani welilaga kya vikwa yo Yadza halala na avemitwe gyavandu Na ya kola ubulungi bwa Yahova Miima gyigye halala na Israeli.

²²Noku Dan ya vola, Dan a veye mwana weking'ang'a, Ki tuumanga kyova mu Bashan.

²³Noku Nafitali ya vola O Nafitali, wiguti ubuyanzi, Na wizuye ubugasu bwa Yahova, U gumire madioli nekusini.

²⁴Noku Asheri ya vola, Asheri ya gasidzwa ku avana A bugirirwe ku avamwavo veve, Yine kirenge kikye mmaguta.

²⁵Vilatu vivyo vi veye kivya nomugasa; Na kuli madiku gogo tsingulu tsitsyo tsi la va ndiyo.

²⁶Si ha veye nofwanana na Nyasaye, O Jeshurun, Udzanga u nini igulu migulu ku likonywa lilyo, Noku malesi mu ubukumi bwibwe.

²⁷Nyasaye wemihiga nemihiga niye ubumenyo bubzoo, Namakono gemihiga nemihiga ga veye isi wowo. Naye ya twulidza musigu imbiri li wowo, Na a vola, Wononye.

²⁸Israeli va menyanga bulahi, Kisinukiru kya mazdzi kya Yakobo ki veye kiderwa, Mu kivala kyobuswage newaini ihya; Yee, ligulu lilye li tonyatonyanga lime.

²⁹U veye nobwelemeridzi, ive Israeli: Ibwaha u leng'ana na ive, avandu va Yahova ya honya, Ingavo yobukonyi bubwo, Kandi kivavi kyobukumi bubwo Avasigu vovo va legehidza ku ive; Na u la duvaga ha diguluku havo.