Read lulogooli Kwidzulitsa 4 Bible Online

Kwidzulitsa 4 - lulogooli bible

Kwidzulitsa 4

¹Kalunu, O Israeli, hulira malago nelikalaga, lya nzegidzanga mwinye kugakola; mu duke kuva mwoyo, nokwingira nokugumira kivala kya Yahova, Nyasaye wavaguga venyu, a mu ha.

²Ku makuva ga mmu laganga mu vule kumeda ku, kinga kugehidza ku, mu duke kugumira malago ga Yahova Nyasaye wenyu aga inze nda mu laga.

³Tsimoni tsyenyu tsi loli ga Yahova ya kola kigira Baalpeoru; kigira avandu vosi ava londa Baalpeoru, Yahova Nyasaye wowo ya va dividza kutwula hagati hoho.

⁴Navutswa mwinye mwa dinya ku Yahova Nyasaye wenyu, lero mu veye mwoyo vosi sa mulala.

⁵Henza, nda mwegidza amalago nelikalaga, kuli Yahova Nyasaye wange ya ndaga, mu ga kole hagati hekivala kya mwingira mu, kuva miyandu.

⁶Kunangwa mu ga gumire nokugakola; kigira yaga ga la va ubugeeri bwenyu nelimanya lyenyu mu tsimoni tsyavandu, va hulira malago yago gosi, va la vola, Ligali ihiri inene yiyi va veye avandu vobugeeri nelimanya.

⁷Kigira ha veye nehiri ki yindi i veye inene, ava veye na Nyasaye u veye himbi navo, kuli Yahova Nyasaye wetu a veye lwa ku mwaniranga hosi?

⁸Kandi ha veye nehiri inene ki, i veye namalago nelikalaga lyobulungi kuli lilaga yili lyosi, lya mbikanga imbiri wenyu lero?

⁹Navutswa welinde ive mwene, nokulinda ligali roho gugwo, gase u iivirira agetsimoni tsitsyo tsya lola, na gase ga la twula mu mwoyo gugwo madiku gelivamwoyo lilyo lyosi; navutswa wegidze avana vovo aga wa lola, navisukulu vovo;

¹⁰ku lidiku lya wa singira imbiri wa Yahova Nyasaye wowo ha Horebu, inyinga Yahova ya mbolera, U vungidzire avandu, na nda leta kuvo makuva gange va ga hulire, va duke kweyegidza kutia inze madiku gosi gelimenya yavo ku lirova, kandi va duke kwegidza avana vavo.

¹¹Na mwinye mwisunda himbi ni mu singira isi wekigulu; nekigulu kyaaka muliru ku hagati ho migulu, nekisundi, namalesi, nekisundi kinene

¹²Na Yahova ya volera mwinye nomuoyo gwa twula hagati ho muliru: mwa hulira mwoyo gwa makuva, navutswa si mwa lola lifwana: mua hulira mwoyo gweng'ine.

¹³Na ya mu gambira malago gege, aga ya mu laga mu ga kole, nago ga veye amalago likumi; na ya ga ng'oda ku vibao viviri vya magina.

¹⁴Na Yahova ya ndaga inyinga yeyo nzegidze mwinye amalago nelikalaga, mu duke kugakola mu kivala ha mwambukanga yo kukigumira.

¹⁵Kunangwa mwelinde ligali; kigira si mwa lola lifwana lidiku lya Yahova y a volera mwinye ha Horebu nomiroyo gwa twula hagati ho muliru;

¹⁶gase mu lyeyononya, nokwelombera vifwananyi vya vadzwa, nelifwana neligondo ku gosi, ku lifwana lyoweliisatsa kinga lyowekikali,

¹⁷ku lifwana genyama ku tsyosi i veye ku lirova, ku lifwana lyelinyonyi ku gosi getsimbaha li bulukanga migulu,

¹⁸ku lifwana lyekindu ku vyosi vi molanga ku marova, ku lifwana lyesudzi ku tsyosi tsi veye mmadzi isi welirova;

¹⁹kandi gase u la ginga tsimoni tsitsyo migulu, na inyinga u lola liuva nomweli netsing'ereng'ani, kali lihe lyosi lyomigulu u la gotidzwa na u la vi sigamira, nokuvitumekira, yivi vya Yahova Nyasaye wowo ya gavanya ku tsihiri tsyosi tsi veye isi weligulu lyosi.

²⁰Navutswa Yahova va vugula mwinye, na a mu twilidza mu mahinga gekivya, kutwula Egepeti, mu ve kuye avandu vemiyandu gyigye, kuli mu veye lero.

²¹Kandi Yahova ya vihirirwa inze kigira mwinye, na yisuha si ndambuka Yordani, kandi si ndingira mu kivala kilahi yikyo, lya Yahova Nyasaye wowo ya ku ha kuva miyandu:

²²navutswa inze ga ndukira nda kudzira mu kivala yiki, si nda duka kwambuka Yordani; navutswa mwinye mu lambuka, nokugumira kivala kilahiyikyo.

²³Mwelinde avene, gase mu livirira lilagana lya Yahova Nyasaye wenyu, lya ya lagana na mwinye, nokulomba kifwananyi kya vadzwa nelifwana lyekindu ku vyosi kya Yahova Nyasaye wenyu ya ku gaya.

²⁴Kigira Yahova Nyasaye wowo a veye muliru gu litsanga, a veye Nyasaye welikendeka.

²⁵Lwa u livula avana, navisukulu na lwa mu mala kuva mu kivala madiku manyingi, mu la duka kweyononya, nokulomba kifwananyi kya vadzwa neligondo lyekindu ku vyosi, nokukola ga veye madamano mu imoni mwa Yahova Nyasaye wowo, kumuvihiriridza,

²⁶nda langa ligulu nelirova kulolekidza ku mwinye lero, mu la duka kudividzwa ligali bwangu ku kivala ha mwambuka Yordani kukigumira; si mu la nyola madiku genyu kuva manyingi kukyo, mu lononywa ligali.

²⁷Na Yahova a la mu salannya hagati ha avandu, na mu la tigala vakekeke livalidzwa lyenyu hagati hetsihiri, ha Yahova a la mu hila.

²⁸Na ha zana mu la tumekira avanyasaye vandi, miyinzi gya makono gavandu, misala namagina, a va vula kulola, kinga kuhulira, kinga kulia, kinga kufunyeridza.

²⁹Navutswa kutwula ha zana u lenya Yahova, Nyasaye wowo, u la mu nyola, inyinga u mwenya nomwoyo gugwo gwosi na roho gugwo gwosi.

³⁰Inyinga u veye mu kivi, nevindu yivi vyosi vi duka ku ive, mmadiku gekiheri u lirana ku Yahova Nyasaye wowo, nokuhulira mwoyo gwigwe:

³¹kigira Yahova Nyasaye wowo a veye Nyasaye wetsimbabasi; si u la daka kuye kindu, si a la kwononya, kandi si a livirira lilagana lyavaguga vovo lya ya visuhira.

³²Kunangwa kalunu teva makura ga madiku ga vita imbiri, kutwula lidiku lya Nyasaye ya lomba mundu ku lirova, nokutwula ku luvega lulala lwo migulu kuduka ku luvega lundi, u teve ha li nelifwana lyenkuva inene yiyi, kinga lifwana lyamakuva yaga lya hulirwa ku?

³³Madiku gosi ha ve ho navandu ava hulira mwoyo gwa Nyasaye a volanga hagati homuliru, kuli ive wa hulira, nokuvula kukudza?

³⁴Kinga inyinga ki Nyasaye ya tsia kwevugulira ihiri hagati hehiri yindi, neligeridza, nelilolekidza, nevyokugennya, nobulwani, nomukono gwetsingulu, nomukono gwanyirika, nelitihidza linene, kuleng'ana navyosi vya Yahova Nyasaye wenyu ya mu kolera Egepeti imbiri wetsimoni tsyenyu?

³⁵Ga lang'aminywa ku ive, u duke kumanya Yahova niye Nyasaye; si ha veye nowundi na a ta li uyu.

³⁶Ya ku kola u hulire mwoyo gwigwe kutwula migulu, a duke kukwegidza: kandi ya ku kola u lole umuliru gwigwe munene ku lirova; nive wa hulira makuva gege ga twula hagati homuliru.

³⁷Na kigira ya yanza vaguga vovo, kunangwa ya tovola visukululwi vyavo inyima wavo, ya ku twulidza Egepeti, halala neliva lyomwene, netsingulu tsitsye tsinene;

³⁸nokukunga tsihiri imbiri wowo tsinene netsyetsingulu kuvita ive, kukwingiridza, kukuha kivala kyavo ki ve miyandu, kuli u veye lidiku yili lya lero.

³⁹Kunangwa u manye lero, na u vike mmwoyo gugwo Yahova a veye Nyasaye migulu nomu lirova hasi; si ha veye nowundi.

⁴⁰Na u gumire amalago gege, nelilagana lilye, lya nku laganga lero, bu ve bulahi ku ive, noku avana vovo inyima wowo, u nyole madiku gogo ga ve manyingi ku kivala, kya Yahova Nyasaye wowo a ku ha, mihiga nemihiga.

⁴¹Kunangwa Musa ya tovola madala gavaka engereka wa Yordani ku luvega lwa butwuliru bweliuva;

⁴²uyu wiita wakye bugira kumanya kandi si a mu dunyira tsinyinga tsi viti: a duke kuva mwoyo, lwa yirukira mu lilala ku madala yaga:

⁴³namaadla zana ni yaga, Bezeru migendanyama, lyomu kivala kereremu, kigira Varubeni; na Ramothu mu Gileadi, kigira Vagadi; na Golan mu Bashan, kigira Vamanase.

⁴⁴Kandi lilaga lya Musa ya vika imbiri ava avana va Israeli ni yili:

⁴⁵yili nilyo lilolekidza, na malago, nelikalaga, lya Musa ya volera avana va Israeli, inyinga va twula Egepeti,

⁴⁶engereka wa Yordani, mu livona li veye ku luvega lwa Bethpeoru, mu kivala kya Sihon mwami wa Vaamori, wa menya Heshibon, wa Musa navana va Israeli va kuya, lwa va twula Egepeti.

⁴⁷Navo va vugula kivala kikye ni ki va miyandu gyavo, nekivala kya Ogu mwami wa Bashan, va veye avami vaviri va Vaamori, ava li engereka wa Yordani ku luvega lwobutwuliru bweliuva;

⁴⁸kutwula Aroeri, li veye ku lwako lwelivona lya Arnon, kuduka ku lwako lwekigulu kya Sioni (nakyo ki veye Herimon),

⁴⁹ne Kereremu yikyo kyosi ki veye engereka wa Yordani ku luvega lwevugwi, kuduka ku lwako lwenyanza yekereremu zana, isi wevisulungutu vya Pisiga.