Read lulogooli Kwidzulitsa 7 Bible Online

Kwidzulitsa 7 - lulogooli bible

Kwidzulitsa 7

¹Lwa Yahova Nyasaye wowo a ku leta mu kivala kya u tsitsanga kukigumira, nokukunga tsihiri tsinyingi imbiri wowo, Vahiti, na Vagirigashi, na Vaamori, na Vakanani, na Vaperizi, na Muhivi na Vajebusi, tsihiri tsitano na tsiviri tsinene tsyetsingulu kuvita ive;

²na lwa Yahova Nyasaye wowo a la va vika havulavu imbiri wowo, kuvaguuta; hene yaho u la va duya: na u la i vononya ligali: u ta kola lilagana navo, kinga ku va vererera;

³kinga u ta kwehidzana navo; u ta haana mukana wowo ku mwana wewe muyai, kinga u ta vugulira mwana wowo muyai, mwana mukana wewe.

⁴Kigira a la girunkanya mwana wowo muyai a vule kunonda, va luhe va tumekire avanyasaye vandi: hene yaho ubutima bwa Yahova bu laaka ku mwinye, na a la kwononya bwangu.

⁵Navutswa mu va kola ndi: mu tigule ubwali bwavo, na mu sambule minara gyavo gyi ve vidonye, muteme misala gyemisambwa gyavo, mu sambe vifwananyi vyavo nomuliru.

⁶Kigira ive u veye ihiri intakatifu ku Yahova Nyasaye wowo: Yahova i Nyasaye wowo ya ku tovola u ve ihiri yahulwa i ve yeye, kuvita avandu vosi ava veye ku lirova.

⁷Yahova si ya vika ubuyanzi bwibwe ku mwinye, kinga si ya mu tovola, kigira mwa vita ihiri yindi ku tsyosi nobunyingi; kigira mwa li vakekeke kuvita avandu vosi:

⁸navutswa kigira Yahova a mu yanza, na kigira yenya kudukidza lyesuha lya yesuhira avaguga venyu, kunangwa Yahova ya mu twulidza nomukono gwetsingulu, ya mboholola mu inyumba yo butugwa, mmukono gwa Farao mwami wa Egepeti.

⁹Kunangwa u manye Yahova Nyasaye wowo, niye Nyasaye, Nyasaye musuuvirifu, u dukidzanga lilagana netsimbabasi ku va mu yanzanga, ava gumiranga malago gege kuduka makula tsielfu,

¹⁰nokutunga mmoni mwavo ava mu dunyiranga a duke kuvononya: si yegadahalidza ku uyu u mu dunyiranga, a la mu tunga mmoni mwimwe.

¹¹Kunangwa u la gumira malago, nemiima namakalago, aga nku laganga lero, i kugakola.

¹²Na ga la duka, kigira mwa hulira makalago yaga, nokugumira nokugakola, Yahova Nyasaye wowo a la dukidza ku ive lilagana netsimbabasi tsya yesuhira avaguga vovo:

¹³na a la ku yanza, nokukugasidza, nokukumeda; kandi a la gasidza lwivulu lwenda yoyo, nelyama lyemilimi gyigyo, ubuswage bubwo, newaini yoyo, namaguta gogo, nelimedeka lyetsing'ombe tsitsyo, navana vamagondi gogo, mu kivala kya yesuhira avaguga vovo a la hu ha.

¹⁴U la gasidzwa kuvita avandu vosi: si ha la va nomundu musatsa kinga mukali u veyo mugumba hagati henyu, kinga hagati hemitugu gyenyu.

¹⁵Na Yahova a la twulidza ku ive ubulwaye bwosi; si a la vika ku ive ubudekere ku tsing'ano tsyosi, bwa wa manya mu Egepeti, navutswa a la bu vika ku yavo vosi ava dunyira ive.

¹⁶Na u la dividza tsihiri tsyosi tsya Yahova Nyasaye wowo a ku ha; imoni yoyo i ta va vererera: kinga u ta tumekira vanyasaye vavo: kigira i la va mutego ku ive inkuva yiyi.

¹⁷Nu u va nu u vola mmwoyo gugwo, Tsihiri yitsi tsi veye tisnyingi kuvita inze; nda tsi twulidza ndi mu miyandu gyatsyo?

¹⁸U ta va tia mba: widzulitse ligali Yahova Nyasaye wowo, kuli ya kola Farao, na Egepeti yosi;

¹⁹mageridzo manene getsimoni tsitsyo tsya lola, nevilolekidzu, nevyokugennya, nomukono gwetsingulu, nomukono gwanyirika, gwa Yahova Nyasaye wowo ya ku twulidzira: na ndiyo Yahova Nyasaye wowo a la kolera tsihiri tsyosi tsyo u tidzanga.

²⁰Kandi Yahova Nyasaye wowo a la tuma mahalamba hagati havo, kuduka yavo ava tigala avevisanga, va luhe va kame imbiri wowo.

²¹U ta va tia mba; kigira Yahova Nyasaye wowo a veye hagati hoho, Nyasaye munene welitihidza.

²²Na Yahova Nyasaye wowo a la ta tsihiri yitsyo imbiri wowo si hake si hake: si ga ku duhira kuvadividza inyinga indala, gase tsinyama tsyomigendenyama tsi la va tsinyingi ku ive.

²³Navutswa Yahova Nyasaye wowo a la va vika havulavu imbiri wowo, Yahova a la vika kuvo kivi, kivi kinene, kuduka va luhe va dive.

²⁴Na a la vika avami vavo mmukono gugwo, na u la gotidza lieta lyavo muse mweligulu: si ha ve nomundu u nyala kusingira imbiri wowo, kuduka lwa u vononya.

²⁵Vifwananyi vya vadzwa vya vanyasaye vavo u la samba nomuliru: u ta kayirwa ifetha kinga ithahabu i veye kuvyo, kinga u ta vi vugula vi ve vivyo, gase vi la ku hamba; kigira vi veye livihiriridza ku Yahova Nyasaye wowo.

²⁶Na u ta leta livihiriridza mu inyumba yoyo, gase u la leng'ana ne kya laamwa: u ki dunyire ligali, u ki sule ligali, kigira ki veye kindu kya laamwa.