Read lulogooli Kwidzulitsa 9 Bible Online

Kwidzulitsa 9 - lulogooli bible

Kwidzulitsa 9

¹Hulira, O Israeli: lero ndi u lambuka Yordani, na wingire kugumira tsihiri tsinene netsyetsingulu kuvita ive, madala manene agombakwa amadigi kuduka migulu,

²avandu vanene navatambi, avana va Vaanaki, ava wa manya, na va wa hulira ni va talwa, Ibwaha u nyala kusingira imbiri wavana va Anaki?

³Kunangwa u manye lidiku lya lero, Yahova Nyasaye wowo niye wimirira kwambuka imbiri wowo kuli muliru gu sambanga; a la va dividza, kandi a la va gehidza imbiri wowo: na ndiyo u la va kunga, na u la va dividza bwangu, kuli Yahova ya ku volera.

⁴U ta vola mmwoyo gugwo, lwa Yahova Nyasaye wowo a mala kuvakunga kutwula imbiri wowo, na u vole, Ga veye kigira bulungi bwange Yahova ya mbika kugumira kivala yiki; navutswa ga veye kigira ubudamano bwetsihiri yitsi Yahova ya va kunga va twule imbiri wowo.

⁵Si ga li kigira butakatifu bubwo, kinga bulungi bwomwoyo gugwo, ive wingira kugumira kivala kyavo; navutswa ga veye kigira ubudamano bwetsihiri yitsi Yahova Nyasaye wowo a va kunganga kutwula imbiri wowo, a duke kusingeridza makuva ga Yahova yisuhira vaguga vovo, Abrahamu, na Isaka, na Yakobo.

⁶Kunangwa u manye, Yahova Nyasaye wowo si ya ku ha kivala kilahi yiki kuva miyandu gyigyo kigira butakatifu bubwo; kigira u veye ihiri yomwoyo mudinyu.

⁷Widzulitse, u tivirira mba, kuli wa vihiriridza Yahova Nyasaye wowo mwigendanyama: kutwula ku lidiku lya wa twula mu kivala kya Egepeti, kuduka lwa mwingira hano, mwa tinguha ku Yahova.

⁸Kandi mu Horebu mwa vihiriridza Yahova, na Yahova ya vihirirwa mwinye kuduka ni yenya kumudividza.

⁹Lwa ndanegira mkigulu kuvugula vibao vyamagina, navyo vi veye vibao vyelilagana lya Yahova ya kola nemwinye, hene yaho nda menya mu kigulu madiku makumi gane, mbasu nobudiku; nda vula kulia vyokulia kinga kunwa madzi.

¹⁰Na Yahova ya mpa vibao viviri vyamagina vya ng'o dwa nekidete kya Nyasaye; na kuvyo ga ng'odwa kuli makuva gosi ga Yahova ya volerana nemwinye mu kigulu kutwula hagati ho muliru ku lidiku lyelivugana.

¹¹Na ga duka ku kiheri kyelidiku li kola makumi gane ubudiku nombasu, Yahova ya mba vibao viviri zana vyamagina, navyo vi veye vyelilagana.

¹²Na Yahova ya mbolera, Singira, wike bwangu; kigira avandu vovo va wa twulidza Egepeti veyononyi; va girunkani nonoho kuleka inzira ya nda va laga; velombeye kifwananyi kya longwa.

¹³Yahova ya volera inze kandi, na a vola, Ndoli ihiri yiyi, kandi, henza, i veye ihiri yomwoyo mudinyu:

¹⁴u ndeke, nduke kuvadividza, nokweya lieta lyavo isi weligulu; na nda kola ive kuva ihiri yetsiugulu nenene kuvita yava.

¹⁵Kunangwa nda girunkana nokusulunguta kutwula mkigulu, nekigulu kyaaka muliru: nevibao viviri vyelilagana vya li mmakono gange gombi.

¹⁶Na nda lola, henza, mwinye mu koli ubwoni ku Yahova Nyasaye wenyu; mu lombi kimoli kyalongwa: mu girunkana nonoho kutwula ku inzira ya Yahova ya mu laga.

¹⁷Na nda gumira vibao viviri, ni mbi ta kutwula mmakono gange gombi, ni mbiyatanyira imbiri wetsimoni tsyenyu.

¹⁸Ni ngwa hasi imbiri wa Yahova madiku makumi gane ubudiku nombasu, kuli matsyambiri; nda vula kulia vyokulia, kinga kunwa madzi; kigira mahyolo genyu gosi ga mwa hyola, ku likola lyobudamano mmoni mwa Yahova, kumuvihiriridza.

¹⁹Kigira nda tia livihirirwa nobutima bululu bwa Yahova, ya mu vihirirwa kuduka kumudividza. Navutswa Yahova ya mbulira inyinga zana yeyo kandi.

²⁰Kandi Yahova ya vihirirwa Haruni ni yenya kumudividza: kandi ni saalira Haruni inyinga zana.

²¹Ni mbugula ubwoni bwenyu, kimoli kya mwa lomba, ni nki samba nomuliru, ni nki duvaga ni nki sia ubunyuki, kuleng'ana nolugukyi: ni nta lugukyi lwakyo mmugera gwikanga kutwula mkigulu.

²²Kandi ha Tabera, na ha Massa, na ha Kibirothuhatava, mwa vihiridza Yahova.

²³Na lwa Yahova ya mu tuma kutwula Kadeshbarnea, ya mu volera, Mwanegire mu gumire kivala kya nda mu ha; hene yaho mwambakana lilaga lya Yahova Nyasaye wenyu, na Si mwa suuvira, kandi si mwa hulira mwoyo gwigwe.

²⁴Mwa li nobutingu ku Yahova kutwula lidiku lya nda tanga kumanya mwinye.

²⁵Hene yaho nda gwa hasi imbiri wa Yahova madiku makumi gane budiku nombasu madiku zana ga nda gwa hasi, kigira Yahova ya vola a la mu dividza.

²⁶Na nda saala Yahova, ni mbola, O Yahova Nyasaye, u ta dividza avandu vovo, miyandu gyigyo, ava wa boholola nobunene bubwo, ava wa twulidza Egepeti nomukono gwetsingulu.

²⁷Widzulitse avatumekiri vovo, Abrahamu, Isaka, na Yakobo; u ta henza ubukyamu bwavandu yava, kinga ubudamano bwavo, kinga ubwoni bwavo,

²⁸gase kivala kya wa ku twulidza mu, ki la vola, Ga veye kigira livula kunyala lya Yahova kuvaleta mu kivala kya ya va suuviridza, kandi kigira ya va vihirirwa, ya va twulidza kuduka kuviitira migendanyama.

²⁹Halala na yaga va veye ihiri yoyo, miyandu gyigyo, ava wa twulidza netsingulu tsitsyo tsinene nomukono gugwo gwa nyirika.