Read lulogooli Yohana 12 Bible Online

Yohana 12 - lulogooli bible

Yohana 12

¹Kunangwa Yesu, madiku gatanu na lilala imbiri welipasaka ya tsia Betani, wa Lazaro ya li, uyu wa Yesu ya simugukidza kutwula mu vakudzi.

²Ni va mwihula yo vyokulia vyomgolova: Marita ya va megera; navutswa Lazaro ya li mulala kuvo avikala ku vyokulia naye.

³Mi Maria ya vugula maguta genardi yere, ga funya mwayu, ageratili indala, aga gulwa vindu vinyingi, na a vaka Yesu virenge, ni yeya virenge vivye nelisu lilye: inyumba yekolera mwayu.

⁴Navutswa Yuda Iskarioti, mulala ku vegidzwi veve, naye niye u li mu zama, ya vola,

⁵Kigira ki maguta yaga si ga gulwa tsishilling tsimia tsivaka, tsi hebwe avadaka?

⁶Si ya vola yaga kigira a verera avadaka; navutswa kigira ya li mwivi, kandi kigira ya ginga kilinga, na a hila vya vikwa mu.

⁷Kigira yiki Yesu ya va volera, Mu mu leke, a ga vikire lidiku lyelitebwa lyange.

⁸Kigira avadaka mu veye navo halala madiku gosi; navutswa si mu veye ninze halala madiku gosi.

⁹Kunangwa kiduma kya Vayuda va duka kumanya a veyo: ni vadza, navutswa si vadza kigira Yesu yeng'ine, navutswa kandi va duke kulola Lazaro wa ya simugukidza kutwula mu vakudzi.

¹⁰Navutswa avasalisi avanene va lomba kyina va duke kwiita Lazaro kandi;

¹¹kigira vanyingi ku Vayuda va twula ni va suuvira Yesu, kigira uyu.

¹²Mugamba kiduma kinene kya li ni kidza mu lilia, lwa va hulira Yesu yadza Yerusalemi,

¹³va leta amatu gamakindu ni va twula ni va tsia kumwaganira ni va kupa isango, Hozana: u gasidzeywi uyu udzanga mu lieta lyo Mwami, naye niye Mwami wa Israeli.

¹⁴Kandi Yesu ya nyola kimoli kyesukiri na a nina ku, kuli wa ga ng'odwa,

¹⁵U ta tia, Mkana wa Zioni: henza, Mwami wowo udzanga, wikaye ku kimoli kyesukiri.

¹⁶Vindu yivi avegidzwi veve si va hulira lwambiri: navutswa Yesu lwa ya mala kukuminywa, kunangwa vidzulitsa yaga ga ng'odwa kuye kale, kandi va mu kolera vindu yivi.

¹⁷Kigira yaga kiduma kya mu londa lwa ya langa Lazaro mu kilindwa, na a mu simugukidza kutwula mu vakudzi, kya lolekidza.

¹⁸Kandi kigira yiki kiduma kya mwaganira, kigira va hulira ya kola kilolekidzu yiki.

¹⁹Kunangwa Avafarisayo va volerana avene, Mu lole si mu nyala kukola kindu; henza, avomkivala va mu londa.

²⁰Kandi va li ho Avagreki valala, kuvo ava li ni vanegira kukola miluka mu lilia.

²¹Kunangwa yava va tsia ku Filipu, mundu wa Betsaida, lidala lye Galilaya, ni va mu teva, ni va vola, Mwami, kwenya kulola Yesu.

²²Filipu ya tsia na a volera Andreya: Andreya yadza na Filipu ni va volera Yesu.

²³Yesu ya va tivulira, na a vola, Isaa i duki, Mwana wa Adamu a kuminywe.

²⁴Ligali, ligali, mmu volera, inzoli yengano ni i vula kugwa mu marova ni i kudza i la tigala yeng'ine; navutswa ni i kudza i lama lyama linyingi.

²⁵Uyu u yanza livamwoyo lilye a li gotidza; kandi u dunyira livamwoyo lilye mu kivala yiki uyu a li li vika kuduka liva mwoyo ii ta hera mba.

²⁶Mundu ni ya ntumekira, a nonde; inze ha mbeye, kandi mutumekiri wange a la va ho: mundu ni ya ntumekira, Dada wange a la mu ha ubukumi.

²⁷Kalunu mwoyo gwange gu henda; nda vola ndi? Dada, u mbonnye ku isaa yiyi? Navutswa kigira yiki ndadza ku isaa yiyi.

²⁸Dada, kuminya lieta lilyo. Kunangwa mwoyo gwa twula migulu, gu vola, Nda mala kulikuminya, na nda li kuminya kandi.

²⁹Kunangwa kiduma kya li ni ki singiye, ni ki gu hulira, va vola, Li ligita: avandi va vola, Ingelosi u volerana naye.

³⁰Yesu ya tivula, na a vola, Mwoyo yigu si guudzi kigira inze, navutswa kigira mwinye.

³¹Kalunu ni likalaga lyavomkivala yiki: kalunu munene wekivala yiki a la tebwa.

³²Kandi inze, ni ngingwa igulu welirova, nda ng'usa avandu vosi vadze ku inze.

³³Navutswa ya vola yaga kuvuula ni likudza ki lya a li kudza.

³⁴Kigira yaga kiduma kya mu tivulira Kwa hulira mu lilaga, Kristo a hindira mihiga nemihiga: na ive u vola ndi, Ga dukira Mwana wa Adamu a gingwe? Ni bwaha Mwana wa Adamu uyu?

³⁵Kunangwa Yesu ya va volera, Ha tigaye hakekeke ubulavu bu veye ku mwinye. Gendi lwa mu veye nobulavu, kisundi ki ta mu nyola: kandi uyu u genda mu kisundi si a manya wa a tsitsa.

³⁶Lwa mu kikiri nobulavu, mu suuvire ubulavu, mu duke kuva avana vobulavu. Vindu yivi Yesu ya vola, kandi ya tsia ni yivisa.

³⁷Navutswa kali ya va kolera vilolekidzu vinyingi imbiri wavo, si va mu suuvira:

³⁸li duke likuva lya Isaya muprofeti ya vola Mwami, ibwaha u suuvira livola lyetu? Kandi ibwaha wa vuulirwa mukono gwo Mwami?

³⁹Yiki ni kigira si va nyala kusuuvira, kigira Isaya ya vola kandi.

⁴⁰Ya va fuma tsimoni tsyavo, kandi ya dinnya mwoyo gwavo; Gase va la lola netsimoni tsyavo, ni va manya nomwoyo gwavo, Ni veganira, Na inze mba honnye.

⁴¹Vindu yivi Isaya ya vola kigira ya lola ubukumi bwibwe; kandi ya vola kuye.

⁴²Halala na yaga, kali ku vanene vanyingi va mu suuvira; navutswa si va mwiyamira mba kigira Vafarisayo, gase va la kungwa mu livugana:

⁴³kigira va yanza ubukumi bu twula ku vandu kuvita ubukumi bu twula ku Nvasaye.

⁴⁴Yesu ya gamba na a vola, Uyu u suuvira inze, si a suuvira inze, navutswa uyu wa ntuma.

⁴⁵U lola inze, a lola uyu wa ntuma.

⁴⁶Inze ntsitsi kuva ubulavu bwavomkivala, ku vosi u suuvira inze a ta menya mu kisundi.

⁴⁷Kandi mundu u hulira amakuva gange, na a ta ga gumira, inze si mmu kalagira mba: kigira si ndadza kukalagira avomkivala, navutswa kuhonnya avomkivala.

⁴⁸Mundu u nyambakana, na a ta bugirira amakuva gange, a veye nomulala u mu kalagira: livola lya nda vola li la mu kalagira ku lidiku lyekiheri.

⁴⁹Kigira inze si nda vola aga twula ku inze mwene; navutswa Dada wa ntuma ya mpa lilaga, lya mbola nelya nzilwadza.

⁵⁰Inze mmanya lilaga lilye li veye livamwoyo li ta hera mba: kunangwa aga mbolanga, kuli Dada ya mbolera, mbola ndiyo.