Read lulogooli Yohana 16 Bible Online

Yohana 16 - lulogooli bible

Yohana 16

¹Yaga mmboleye, mu tikigitalidzwa.

²Va la mu kunga mu mavugana: kandi isaa yidza ya vosi ava mwiita va levolera va kolera Nyasaye ubutumwa.

³Kandi yaga va la kola kigira si va manya Dada, kandi inze.

⁴Navutswa yaga mmali kumuvolera, lwa isaa yago i mali kuduka, mu gidzulitse, kuli wa nda mu volera. Na yaga si nda mu volera kutwula mu litanga, kigira nda li na mwinye halala.

⁵Navutswa kalunu ntsitsa kuye wa ntuma; kandi si ha veye nomulala ku mwinye u nteva, U tsia ha li ha?

⁶Navutswa kigira mmu volera yaga, ubuvereri bwizuye mu myoyo gyenyu.

⁷Nawtswa mmu volera ageligali: Nu bulahi ku mwinye inze ntsie; kigira ni nta tsia, Mukonyi si a lidza ku mwinye; navutswa ni ntsia, nda mu tuma ku mwinye.

⁸Naye lwa a li duka, a la lungika avomkivala ku bwoni, noku bulungi, noku likalaga:

⁹ku bwoni, kigira va vula kusuuvira ku inze;

¹⁰ku bulungi, kigira ntsia ku Dada na mwinye si mu ndola kandi;

¹¹ku likalaga, kigira munene womkivala yiki, u mali kukalagirwa.

¹²Nkikiri namakuva manyingi gokumuvolera, navutswa si mu nyala kugagumira kalunu.

¹³Navutswa lwa a li duka Roho wa geligali, a la mwimirira na a mu hile mu ageligali gosi: kigira si a li vola ku vyomwene; navutswa aga a li hulira a la vola: kandi vindu vi lidza a la mu vuulira.

¹⁴Kandi u li mbuminya inze: kigira a la vugula ku vyange yilwadze ku mwinye.

¹⁵Vindu vyosi vya Dada a veye navyo vi veye vyange: yiki ni kigira nda vola a vugula ku vyange yilwadze ku mwinye.

¹⁶Ha tigaye hakekeke si mu la ndola kandi; na kandi ha tigaye hakekeke kandi, na mwinye mu la ndola.

¹⁷Avalala ku vegidzwi veve va volerana, Ni likuva ki lya a ku volera? Ha tigaye hakekeke si mu la ndola; kandi Ha tigaye hakekeke mu la ndola: na kandi, Kigira ntsitsa wa Dada.

¹⁸Ku, va vola, Ni likuva ki lya a vola, Inyinga inkekeke? Si ku manya aga a vola.

¹⁹Yesu ya manya venya kumuteva, naye ya va volera, Mu tevana mwinye ku yilyo lya mmu volera, Ha tigaye hakekeke, si mu la ndola, kandi ha tigaye hakekeke, mu la ndola?

²⁰Ligali, ligali, mmu volera, mwinye mu la lira ni mu syoma, navutswa avomkivala va la sangala: mwinye mu la verera, navutswa ubuvereri bwenyu bu la girunkanywa bu ve ubuyanzi.

²¹Mukali lwa a lumangwa a vedza neliverera, kigira isaa yeye i duki: navutswa ni ya ka mala kwivula mwana, si yidzulitsa kandi ubusaliri, kigira a yanza mundu wivuywi mu kivala.

²²Kandi mwinye kalunu mu veye nobuvereri: navutswa nda mu lola kandi, ne myoyo gyenyu gyi la yanza, nobuyanzi bwenyu mundu si a nyala kumunyaga.

²³Kandi ku lidiku yilyo si mu li teva inze likuva. Ligali, ligali, mmu volera, ni mu saala kindu ku Dada, a la mu ha ku lieta lyange.

²⁴Kuduka kalunu mu kikiri kusaala kindu ku lieta lyange: mu saale, mu la hebwa, ubuyanzi bwenyu bu duke kudukidzwa.

²⁵Mmali kumuvolera vindu yivi mu tsing'ano: isaa yidza ya nta mu volera kandi mu tsing'ano, navutswa nda mu volera habulavu arnakuva ga Dada.

²⁶Ku lidiku yilyo mu li saala ku lieta lyange: kandi si mmu volera, nda teva Dada kigira mwinye;

²⁷kigira Dada mwene a mu yanza, kigira mu nyanzi, kandi mu suuviye inze nda twula ku Dada.

²⁸Nda twula ku Dada ntsitsa mu kivala: kandi, nda leka kivala, ntsia wa Dada.

²⁹Avegidzwi veve va vola, Nkani kalunu u vola habulavu si u kupa tsing'ano.

³⁰Kalunu ku manya ive u manya vindu vyosi, si u veye nobudaka bwomundu u ku teva: ku yaga ku suuvira ive wa twula ku Nyasaye.

³¹Yesu ya va tivulira, Kalunu mu suuviye?

³²Henza, isaa yidza, yee, i mali kuduka, ya mwinye mu lavukanira avandu sa mulala ku vindu vivye, mu leke inze tsyeng'ine: navutswa inze si mbeye tsyeng'ine, kigira Dada a veye halala ninze.

³³Yaga mmali kumuvolera, mu duke kuva nemirembe ku inze. Mu lirova mu la va nekivi: navutswa mwidinyiridze; inze mmali kuguuta avomkivala.