Read lulogooli Yohana 18 Bible Online

Yohana 18 - lulogooli bible

Yohana 18

¹Yesu lwa ya mala kuvola yaga ya twula halala navegidzwi veve na a tsia engereka womugera gwa Kidiron, ha li nomulimi, yingira mu mwene navegidzwi veve.

²Kandi Yuda, wa mu zama, naye ya manya ha zana: kigira Yesu ya tsia yo kanyingi navegidzwi veve.

³Maku, Yuda lwa ya mala kuvugula mugaanda gwavasikari navanyampara, ava twula ku vasalisi vanene na Vafarisayo, ya tsia yo netsitaya netsimuli nevyuma.

⁴Yesu ya li na a manya vindu vyosi vyenya kumugwira, ya singira hambiri, na a va teva, Mwenya bwaha?

⁵Va mu tivulira, Yesu Munazareti. Yesu ya va volera, Ni inze. Na kandi Yuda, wa mu zama, ya singira halala navo.

⁶Ku, lwa ya va volera, Ni inze, virana inyima ni va gwa hasi.

⁷Ku, ya va teva kandi, Mwenya bwaha? Va vola, Yesu Munazareti.

⁸Yesu ya tivula, Mmali kumuvolera, Ni inze; kunangwa na a va ninze wa mwenya, mu leke yava va tsie.

⁹Li duke kudukidzwa likuva lya ya vola, Kuvo va wa mpa si ha li nomulala u goti.

¹⁰Simoni Petro, ya li nekivavi, ya ki somola na a tema mutugwa womusalisi munene, na a mu kalaga gutu gwigwe gwomukono mulungi. Mutugwa uyu ya langwa Maliku.

¹¹Yesu ya volera Petro, U vike kivavi mu Iwula: kikombe kya Dada ya mpa mbule kunwa naho?

¹²Maku, mugaanda gwavasikari nomunyampara munene navanyampara va Vayuda, va gumira Yesu ni va mu boha.

¹³Ni va tanga kumuhila imbiri wa Annas; kigira ya li nazivala wa Kaiafa, ya li na a veye musalisi munene muhiga yigwo.

¹⁴Kaiafa niye wa volera Vayuda, Nu bulahi mundu mulala a kudzere avandu.

¹⁵Simoni Petro ya londa Yesu, kandi mwegidzwi wundi. Mwegidzwi uyu ya manyekana ku musalisi munene, naye yingira na Yesu hamgidzi homusalisi munene;

¹⁶navutswa Petro ya li na a singiye ha kiliango, kyova. Ku, mwegidzwi uyu wa manyekana ku musalisi munene, ya volerana no mukana wa linda kiliango, na a tsia kuleta Petro.

¹⁷Maku, mukana wa linda kiliango ya volera Petro, Kandi ive si u veye mulala ku vegidzwi vormundu uyu? Ya vola, Inze si mbeye ku.

¹⁸Avatugwa navanyampara va li ni va singira ho, va fwana muliru gwamanda; kigira ubukindu bwa li ho; ni vota muliru: kandi Petro ya li na a singira halala navo ni yota muliru.

¹⁹Ku, musalisi munene ya teva Yesu ku vegidzwi veve noku megidzo gege.

²⁰Yesu ya mu tivulira, Inze mmali kuvolera avomkivala amakuva gange habulavu; inze madiku gosi nzegidza mu masomero nomu litempeli, ha Vayuda vosi va vugana; si nda vola kindu makiriri.

²¹Kigira ki u teva inze? Yaga ga nda volera avandu u va teve aga va hulira: henza, yava va manya vya nda vola.

²²Lwa ya vola yaga, mulala ku vanyampara ya singira himbi yala Yesu uluhi, na a mu teva Ni ndiyo u tivulira musalisi munenei

²³Yesu ya mu tivulira, Inze ni mba ni mbola ubudamano, u lolekidze ubudamano yibu: navutswa ni mba ni mbola ubulahi, u nduyira ki?

²⁴Ku, Annas ya mu hila wa Kaiafa musalisi munene, na a boheywi.

²⁵Simoni Petro ya singira ni yota muliru. Ku, va mu teva, Ive kandi si u veye mulala ku vegidzwi veve? Yambakana, na a vola, Inze si mbeye ku.

²⁶Mulala ku vatugwa vomusalisi rnunene, mwiko womundu wa Petro ya kalaga gutu gwigwe, ya vola, Inze si nda ku lola halala naye mu mulimi?

²⁷Ku, Petro yambakana kandi: nonoho idaywa ya lagula.

²⁸Kunangwa va twulidza Yesu wa Kaiafa ni va mu hila mu inyumba ya Pretorio: gwa li mugamba tsuri. Navene si vingira mu Pretorio, va ta vikwa mu budamano, navutswa va duke kulia lipasaka.

²⁹Ku, Pilatu, ya tsia kuvo kyova, kandi ya vola, Mu veye naki kya mu yalira mundu uyu?

³⁰Va tivula, ni va mu volera, Mundu uyu a vula kuva mudamano, nkano si ku mu leti imbiri wowo.

³¹Pilatu ya va volera, Mu mu vugule mwinye avene mu mu yale kuli malaga genyu. Avayuda va mu volera, Kwinye si ku veye nomunwa gokwiita mundu.

³²Li duke kuduka likuva lya Yesu ya vola, na a mannya ni likudza ki lya a li kudza.

³³Kunangwa Pilatu yingira kandi mu Pretorio na a langa Yesu, na a mu volera, Hene ive niye Mwami wa Vayuda?

³⁴Yesu ya tivula, U vola yaga ive mwene, naho avandi va ku volera amakuva ku inze?

³⁵Pilatu ya tivula, Inze mbeye Muyuda? Ihiri yoyo navasalisi vanene va ku leti imbiri wange: u koli ki?

³⁶Yesu ya tivula, Ubwami bwange si bu veye bwomkivala yiki: ubwami bwange ni bu veye bwomkivala yiki, avatumekiri vange nkano va ka lwana kalunu, inze nda vula kuvikwa mu makono ga Vayuda: navutswa ubwami bwange si bu veye bwokutwula kalunu.

³⁷Kunangwa Pilatu ya mu volera, Nkani u veye mwami? Yesu ya tivula, Ive mwene u voye mbeye mwami. Yiki ni kigira ndivulwa, kandi yiki ni kigira nda duka mu lirova, nduke kulolekidza ageligali. Ku vosi u veye ku luvega lwa geligali a hulira mwoyo gwange.

³⁸Pilatu ya mu volera, Ageligali ni kindu ki? Kandi lwa ya mala kuvola yaga, ya tsia ku Vayuda kandi, na a va volera Inze si ndola kindu kuye.

³⁹Navutswa mu veye nomwima gwa inze mmu bohololera mulala inyinga yelipasaka: mwenya mmu bohololera Mwami wa Vayuda?

⁴⁰Kunangwa va kola liyoga kandi, ni va vola, U ta boholola mundu uyu, navutswa Baraba. Baraba ya li munuuli.