Read lulogooli Yohana 19 Bible Online

Yohana 19 - lulogooli bible

Yohana 19

¹Ku, Pilatu ya vugula Yesu na a mu kuya nolukova.

²Kandi avasikari va luka itaji yamafwa, ni va gi vika ku mutwe gwigwe, ni va mu vika ingubo yekiforosadi;

³ni va tsia kuye, ni va mu volera Mirembe, Mwami wa Vayuda ni va mwala tsimpi.

⁴Pilatu ya tsia kyova kandi, na a va volera, Henzi, uyu iye mmu letera kyova, mu duke kumanya si ndola kindu kuye.

⁵Ku, Yesu ya twula na a vikeywi itaji vamafwa nengubo yekiforosadi. Kandi Pilatu ya va volera, Henzi mundu uyu

⁶Maku avasalisi vanene navanyampara lwa va mu lola, va kola liyoga, ni va vola, Mbambe, mbambe Pilatu ya va volera, Mu mbugule mwinye avene, mu mbambe: kigira inze si ndola kindu kuye.

⁷Avayuda va mu tivulira, Kwinye ku veye nelilaga, kandi ku lilaga zana nu bulahi a kudze, kigira yekola Mwana wa Nyasaye.

⁸Ku, Pilatu lwa ya hulira makuva yaga ya kira ubutii;

⁹yingira kandi mu Pretorio na a volera Yesu, Wa twula ha li ha? Navutswa Yesu si ya mu tivulira mba.

¹⁰Ku, Pilatu ya mu volera Si u volerana ninze? Ive si u manya mbeye netsingulu kukuboholola, kandi mbeye netsingulu kukubamba?

¹¹Yesu ya mu tivulira, Ive si u nyala kuva netsingulu ku inze kali hakuzu, nu u ta hebwa tsi twula migulu: kigira yaga u veye nobwoni bunene nu uyo wa mbika mu makono gogo.

¹²Kigira yaga Pilatu ya geridza kumuboholola: navutswa Avayuda va kola liyoga, ni va vola, Nu u boholola mundu uyu si u veye mulina wa Kaisari: mundu yekola mwami a lega Kaisari.

¹³Pilatu lwa ya hulira amakuva yaga ya twulidza Yesu, ni yikala ku kisako kyokuyala, ha zana ha langwa Ha vaala magina, navutswa mu Luhe braina Gabatha.

¹⁴Nalyo lya li lidiku Lyokulomba lilia lyelipasaka: kuli tsisaa tsitanu na ndala. Kandi ya volera Avayuda, Henzi Mwami wenyu

¹⁵Maku, va kola liyoga, Mhile, mhile, mbambe Pilatu ya va volera, Mbambe Mwami wenyu? Avasalisi vanene va tivula, Kwinye si ku veye nomwami navutswa Kaisari.

¹⁶Kunangwa ya va mu ha a duke kubambwa.

¹⁷Ku, va gumira Yesu: mwene ya ginga musalaba gwigwe na a twula, na a tsia ha langwa kihanga, ha zana mu Luhebraina, ha langwa Golgota.

¹⁸Va mu bambira ho, kandi halala naye avandi vaviri, mulala ha luvega yilu no wundi ha luvega yilu, na Yesu hagati.

¹⁹Kandi Pilatu ya ng'oda ibaruwa na a gi vika ku musalaba igulu. Ga ng'odwa, YESU MUNAZARETI, MWAMI WA VAYUDA.

²⁰Kunangwa ibaruwa yiyi avanyingi ku Vayuda va soma kigira ha Yesu ya bambirwa ha li ahimbi nelidala; nayo ya ng'odwa mu Luhebraina na Lurumi, na Lugreki.

²¹Ku avasalisi vanene va Vayuda va volera Pilatu, U ta n'goda, Mwami wa Vayuda; navutswa ng'oda, Ya vola, Inze mbeye Mwami wa Vayuda.

²²Pilatu ya tivula, Aga ng'odi mali kung'oda.

²³Maku avasikari lwa va mala kubamba Yesu va vugula tsingubo tsitsye ni va tsyavukannya tsi twula mu tsine, musikari sa mulala indala; nekanzu yeye: nayo ikanzu si ya li nobunaviru, ya lukwa yosi kutwula halugulu.

²⁴Ku, va volerana, Ku ta gi tandula, navutswa ku kole ikura ku lole i la va ya bwaha. Ga duke kuduka mang'oda ga vola, Va gavana tsingubo tsyange, Ni va kola ikura ku ingubo yange.

²⁵Kunangwa vindu yivi avasikari va kola. Navutswa yaho ha musalaba gwa Yesu, va singira mama wewe namwavo wewe na, Maria mka Kileopa, na Maria Magdalene

²⁶Ku, Yesu lwa ya lola mama wewe, nomwegidzwi wa ya yanza va singira himbi, ya volera mama wewe, Mkali, ive u henze mwana wowo

²⁷Kandi ya volera mwegidzwi U henze mama wowo Kandi kutwuia inyinga yeyo mwegidzw uyu ya mu vugula na a mu hila mu inyumba yeye.

²⁸Inyima wa yaga, Yesu ya li na a manya vindu vyosi vi fweye ga duke kuduka mang'oda, ya vola Mbeye nobuluhu.

²⁹Ha li ho nenyingu yizula isiki: ku, va vugula kikaminyo ni kizuye isiki ni va vika ku kidundu ni va mu sundira ha munwa.

³⁰Ma Yesu lwa ya mala kuvugula isiki, ya vola, Ga fweye ni yinaminya mutwe gwigwe na Iakula mwoyo.

³¹Kunangwa Avayuda, kigira lya li lidiku Lyokulomba, avakudzu va ta va ku misalaba ku lisabato (kigira lidiku lyelisabato yilyo lya li linene) va saava Pilatu virenge vyayo vi vunanywe, va twulidzwe.

³²Ku, avasikari va tsia kuvunannyz virenge vyo wa hambiri, kandi vyowundi wa bambwa naye:

³³navutswa lwa va duka ku Yesu ni va lola u mali kukudza, si va mu vunannya virenge vivye mba.

³⁴Navutswa mulala ku vasikari ya mu tumita mu tsi mbalu tsitsye nelitimu, nonoho masahi ga twula na madzi.

³⁵Naye wa lola u mali kulolekidza, kandi lilolekidza lilye li veye lyeligali: naye a manya aga a vola ga veye geligali, mwinye mu duke kusuuvira.

³⁶Kigira vindu yivi vya kolwa ndi, mang'oda ga duke kuduka, Kigumba kikye si ki li vunika.

³⁷Kandi mang'oda gandi ga vola, Va la mu henza uyo wa va tumita.

³⁸Inyima ya yaga Yosefa wa Arimathia, wa li na a veye mwegidzwi wa Yesu, navutswa yevisa, kigira ya tia Vayuda, ya saava Pilatu munwa kuhila mubiri gwa Yesu: Pilatu ya mu ha munwa. Kunangwa yadza na a hila mubiri gwigwe.

³⁹Nikodemo wadza kuye ubudiku lwambiri, yadza halala naye na a leta vindu vya tsukanywa manemane na subiri, vya duka himbi tsiratili mia.

⁴⁰Ku, va vugula mubiri gwa Yesu ni va gu boha mu tsingubo tsyakatani halala nevindu vya funya mwayu, kuli miima gya Vayuda gyokuta.

⁴¹Ha ya bambwa ha li nomulimi; na hagati homulimi kya li ho kilindwa kihya kyomundu ya li na a kikiri kuvikwa mu.

⁴²Kunangwa va ta Yesu mu, (kigira kilindwa kya li himbi) kigira lidiku Lyelilomba lya Vayuda.