Read lulogooli Yohana 20 Bible Online

Yohana 20 - lulogooli bible

Yohana 20

¹Ku lidiku lyokutanga lisidza Maria Magdalene ya tsia mabwebwe, isi ni i kikiri mwamu, ku kilindwa, na a lola ligina li twulidzeywi ku kilindwa.

²Ya nyagula ku Simoni Petro, nowundi mwegi dzwi, wa Yesu ya yanza, na a va volera, Va twulidzi Mwami mu kilindwa va mu hili, si ku manya ha va mu viki.

³Kigira yaga Petro ya twula nomwegidzwi wundi, ni va tsia ku kilindwa.

⁴Navo va nyagula vombi: mwegidzwi wundi ya vita Petro kunyagula na a tanga kuduka ku kilindwa;

⁵yinama na a henza mu, na a lola tsingubo tsya katani tsi vikeywi; navutswa si yingira.

⁶Maku Simoni Petro naye yadza na a londa kandi yingira mu kilindwa; na a iola tsingubo tsya katani tsi vikeywi,

⁷kandi kagubo ka li ku mutwe si ka vikwa halala netsingubo tsya katani, navutswa ka lingwa ni ka vikwa ha luvega keng'ine.

⁸Kunangwa mwegidzwi wundi wa tanga kuduka ku kilindwa, yingira, na a lola na a suuvira.

⁹Kigira va li ni va kikiri kumanya mang'oda, ga mu dukira a simuguke kutwula mu vakudzi.

¹⁰Ku, avegidzwi va twula ni va tsia wavo.

¹¹Navutswa Maria ya singira ha kilindwa kyova na a lira: ku, lwa ya lira yinama na a henza mu kilindwa;

¹²na a lola tsingelosi vaviri ni va veye netsingubo tsindavu, ni vikaye, mulala ha mutwe nowundi ha virenge, homubiri gwa Yesu gwa vikwa.

¹³Va mu volera, Mukali, u lirira ki? Ya va volera, Kigira va hili Mwami wange, na inze si mmanya ha va mu viki.

¹⁴Lwa ya mala kuvola yaga, ya girunkana inyima, na a lola Yesu na a singiye, navutswa si ya manya uyu ni Yesu.

¹⁵Yesu ya mu volera, Mukali, u lirira ki? Wenya bwaha? Naye ya ganagana uyu nomulimi womulimi, ya mu volera, Mwami, Nu u va nive u mu hili, u mbolere ha u mu viki, na inze nda mu hila.

¹⁶Yesu ya mu volera, Maria. Ya girunkana, na a mu volera mu Luhebraina, Raboni livola lyago li vola, Mwegidzi.

¹⁷Yesu ya mu volera, U ta ngumira, kigira nkikiri kwanegira kutsia wa Dada wange: navutswa u tsie ku vamwavo vange, u va volere, Inze nzanegira kutsia wa Dada wange, kandi Dada wenyu, kandi wa Nyasaye wange, kandi Nyhsaye wenyu.

¹⁸Maria Magdalene ya tsia na a volera avegidzwi, Mmali kulola Mwami; kandi Mwami ya mbolera vindu yivi.

¹⁹Kunangwa lwa gwa li mgolova gwelidiku yilyo, li veye lyokutanga lisidza, kandi viliango lwa vi mali kuhanwa ha vegidzwi va li ni va veye, kigira va tia Vayuda, Yesu yadza na a singira hagati, na a va volera, Mirembe ku mwinye.

²⁰Lwa ya mala kuvola yaga, ya va mannya makono gege nomu tsimbalu mwimwe. Kunangwa avegidzwi lwa va lola Mwami, va yanza.

²¹Ku. Yesu ya va volera kandi, Mirembe ku mwinye: kuli wa Dada ya ntuma, inze kandi mmu tuma ndiyo.

²²Lwa ya vola yaga, ya va heerera mwika, na a va volera, Mu vugule Roho Mutakatifu.

²³Ku vosi wa mu sameha ubwoni bwibwe, bu samefwa; ku vosi wa mu mu bohera ubwoni bwibwe, bu boheywi.

²⁴Navutswa Tomasi, mulala ku va li likumi na vaviri, wa langwa Malongo, si ya li ho halala navo inyinga ya Yesu yadza.

²⁵Kigira yaga avegidzwi vandi va mu volera, Ku mali kulola Mwami. Navutswa ya va volera, Ni nta lola tsimbala tsyemisumari mu makono gege, ni nta vika kidete kyange mu tsimbala tsyemisumari, kandi ni nta vika mukono gwange mu tsimbalu tsitsye, si nyala kusuuvira.

²⁶Inyima ya madiku gatanu na gavaka, kandi avegidzwi veve va li mu inyumba, kandi Tomasi ya li halala navo. Viliango ni vi mali kuhanwa, Yesu yadza na a singira hagati, na a vola, Mirembe ku mwinye.

²⁷Maku ya volera Tomasi, Leta kidete kikyo u lole makono gange, kandi u lete mukono u hambe mu tsimbalu tsyange: u ta vula kusuuvira, navutswa u suuvire.

²⁸Tomasi ya mu tivula, na a mu volera, Mwami wange, kandi Nyasaye wange.

²⁹Yesu ya mu volera, Kigira u ndoli u suuviye: va veye nobugasu avasuuviye ni va kikiri kulola.

³⁰Vi veye ho vilolekidzu vinyingi kandi vya Yesu ya kola imbiri wavegidzwi veve, vi ta ng'odwa mu kitabu yiki:

³¹navutswa yivi vi ng'odwa mu duke kusuuvira Yesu a veye Kristo, Mwana wa Nyasaye; kandi ku lisuuvira lyenyu mu ve nelivamwoyo mu lieta lilye.