Read lulogooli Yohana 21 Bible Online

Yohana 21 - lulogooli bible

Yohana 21

¹Inyima wa yaga Yesu ya loleka ku vegidzwi kandi ku inyanza ya Tiberia; na lilolekidza lilye lya li ndi.

²Va li halala Simoni Petro, na Tomasi u langwa Malongo, na Natanaeli wa Kana wa Galilaya, navana va Zebedayo, na vandi vaviri ku vegidzwi veve

³Simoni Petro ya va volera, Ntsia kuluva. Va mu volera, Kwinye kandi ku la tsia nive. Va twula ni vingira mu bwato; ubudiku yibwo si va nyola kindu.

⁴Navutswa lwa bwa kya, Yesu mwene ya singira ku luginga: navutswa avegidzwi si va manya uyu ni Yesu.

⁵Kigira yaga Yesu ya va volera, Avana, mu veye nevyokulia? Va mu tivulira, Auwa.

⁶Naye ya va volera, Mu vike muluvo ha luvega lwobwato lwomukono mulungi, mu la nyola Maku va gu vika, Bi va nyala kung'usa kandi kigira tsisudzi tsinyingi

⁷Kigira yaga mwegidzwi uyu wa Yesu ya yanza ya volera Petro, Niye Mwami. Ku, Simoni Petro lwa ya hulira nu Mwami, yeboha likoti lilye lyokuluva, (kigira ya li kyahonyo), na a tuuma mu inyanza

⁸Navutswa avegidzwi vandi, vadza mu bwato bukekeke, (kigira si ha veye hale noluginga, navutswa ha veye ha va gera amakono tsimia tsiviri), ni va ng'usa muluvo gwe tsisudzi.

⁹Ku, lwa va duka ku luginga va lola muliru gwamanda, netsisudzi tsi vikeywi ku nobukima.

¹⁰Yesu ya va volera, Leti ku tsisudzi tsya mu luvi kalunu.

¹¹Kigira yaga Simoni Petro ya nina na a ng'usa muluvo na a leta ku luginga, gwizula tsisudzi tsinene, mia indala namakumi gatanu na tsivaka: kandi kali tsisudzi tsya li tsinyingi ndiyo, muluvo si gwa tanduka mba

¹²Yesu ya va volera, Hambi mu lie. Navutswa si ha veye nomulala ku vegidzwi wa lema mwoyo kumuteva, Ive u veye bwaha? Va manya nu Mwami.

¹³Yesu yadza na a vugula ubukima na a va ha, netsisudzi kandi ndiyo.

¹⁴Yiyi ni inyinga i kola kavaka Yesu na a loleka ku vegidzwi, inyima lwa ya simuguka mu vakudzi.

¹⁵Lwa va mala kulia, Yesu ya teva Simoni Petro, Simoni wa Jona, u nyanza kuvita yivi? Ya mu volera, Yee, Mwami; ive u manya nku yanza. Naye ya mu volera, U lagiridze avana va magondi vange.

¹⁶Ya mu volera kandi hali kaviri, Simoni wa Jona, u nyanza? Ya mu volera, Yee, Mwami; ive u manya nku yanza. Ya mu volera, Waye magondi gange.

¹⁷Ya mu volera hali kavaka, Simoni wa Jona, U nyanza? Petro ya verera kigira ya mu teva hali kavaka, U nyanza? Ya mu volera, Mwami, ive u manya vindu vyosi; u manya nku yanza. Yesu ya mu volera, U lagiridze amagondi gange.

¹⁸Ligali, ligali, nku volera, Lwa wa li muyai, weboha nu u tsia wa u yanza: navutswa lwa u li duka musakulu, u la nyira makono, nowundi a la ku boha, a ku hile wa u ta yanza.

¹⁹Ya vola yaga kumannya ni likudza ki lya a li kuminyira Nyasaye. Lwa ya mala kuvola yaga, ya mu volera, U nonde.

²⁰Petro yekevuka na a lola mwegidzwi wa Yesu ya yanza, a va londa; naye yesedema ha kiritu kya Yesu inyinga yelilia, na a teva, Mwami, ibwaha u ku zama?

²¹Petro na a lola uyo, ya volera Yesu, Mwami, mundu uyu a la kola ki?

²²Yesu ya mu volera, Inze ni nyenya a linde nduhe nduke, ki veye kindu ki ku ive? U nonde.

²³Kigira yaga livola yili lya landa mu vamwavo, mwegidzwi uyu si a li kudza; navutswa Yesu si ya mu volera, Si a li kudza; navutswa, Ni nyenya a linde nduhe nduke, ki veye kindu ki ku ive?

²⁴Uyu niye mwegidzwi u lolekidza vindu yivi, kandi ya ng'oda vindu yivi: kandi ku manya lilolekidza lilye na geligali.

²⁵Kandi Yesu ya kola vindu vinyingi vindi, yivi ni vi ng'odwa vyosi si kilala, nganagana kali lirova lyene li la geha ha vi vikwa vitabu zana.