Read lulogooli Yohana 3 Bible Online

Yohana 3 - lulogooli bible

Yohana 3

¹Ya li ho mundu ku Vafarisayo, lieta lilye Nikodemo, munene wa Vayuda:

²Ya tsia ku Yesu ubudiku na a mu volera, Rabi, ku manya ive u veye mwegidzi wa twula ku Nyasaye; kigira si ha li nomundu u nyala kukola vilolekidzu yivi vya u kolanga, Nyasaye na a ta li halala naye.

³Yesu ya tivula na a mu volera, Ligali, ligali, nku volera Mundu na a tivulwa livulwa lyomigulu, si a nyala kulola ubwami bwa Nyasaye.

⁴Nikodemo ya mu teva Mundu a nyala ndi kwivulwa na a veye mukulundu? A nyala kwingira munda mwa mama wewe hali kaviri yivulwe kandi?

⁵Yesu ya tivula, Ligali, ligali, nku volera, Mundu na a tivulwa livulwa lyamadzi nelya Roho si a nyala kwingira mu bwami bwa Nyasaye.

⁶Kyomubiri gwivula nu mubiri; kandi kya Roho yivula ni roho.

⁷U ta genya nku voleye, Mu niga kwivulwa livulua lyo migulu.

⁸Imbuudza i huudza ha i yanzanga, na ive u hulira lihuma lyayo, navutswa si u manya wa i twulanga, kinga wa i tsitsanga: ni ndiyo ku vandu vosi va Roho yivula.

⁹Nikodemo ya tivula na a mu volera, Vindu yivi vi nyala ndi kuva?

¹⁰Yesu ya tivula na a mu volera Ive u veye mwegidzi wa Israeli na vindu yivi si u hulira mba?

¹¹Ligali, ligali, nku volera, Ku vola ga ku manya, kandi ku lolekidza vya ku loli, navutswa lilolekidza lyetu si mu bugirira mba.

¹²Ni mmu volera vindu vyomu lirova na mwinye si mu vi suuvira mba, mu la suuvira ndi ni mmu volera vindu vyo migulu?

¹³Kandi si ha li nomundu wa tsia migulu, navutswa uyu wika ku twula migulu, niye Mwana wa Adamu, a veye migulu.

¹⁴Kandi kuli Musa ya ginga inzoka mwigendanyama, kandi Mwana wa Adamu a la gingwa ndiyo;

¹⁵ku vandu vosi u mu suuvira a ta diva mba, a duke kuva nelivamwoyo li ta hera muye.

¹⁶Nyasaye ya yanza avomkivala ndi, ya va ha Mwana wewe muderwa, ku vosi u mu suuvira a ta diva mba, navutswa a ve nelivamwoyo li ta hera mba.

¹⁷Kigira Nyasaye si ya tuma Mwana wewe kuudza mu kivala kukalagira avomkivala; navutswa kuhonnya avomkivala.

¹⁸U mu suuvira si a kalagirwa: u vula kumusuuvira u mali kukalagirwa kigira a vula kusuuvira lieta lya Mwana muderwa wa Nyasaye.

¹⁹Kandi likalaga ni yili, ubulavu bwingiye mu kivala, na vandu va yanza kisundi kuvita ubulavu; kigira miyinzi gyavo gyi veye midamano.

²⁰Kigira ku vosi u kola ubudamano a dunyira ubulavu, kandi si ya tsia ku bulavu, gase miyinzi gyigye gyi la kyaywa.

²¹Navutswa u kola ageligali a tsitsa ku bulavu, miyinzi gyigye gyi duke kuloleka gyi koleywi ku Nyasaye.

²²Inyima ya vindu yivi Yesu yadza navegidzwi veve mu kivala kye Buyuda; ni yikala ho halala navo na a batidza.

²³Kandi Yohana ya li na a batidza mu Ainon himbi Salimi, kigira ga li ho amadzi manyingi: kandi vadza ni va batidzwa.

²⁴Kigira Yohana ya li na a kikiri kubofwa mu inyumba yavahambe.

²⁵Ni ga duka amahangali gavegidzwi va Yohana no Muyuda ku makuva gokweyogidza.

²⁶Ni va tsia ku Yohana, ni va mu volera, Rabi, uyo wa li halala nive engereka ya Yordani, uyo wa u lolekidzeye henza, u batidzanga, navandu vosi va tsia kuye.

²⁷Yohana ya tivula na a vola, Mundu si a nyala kuvugula kindu na a ta hebwa ki twula migulu.

²⁸Mwinye avene mu ndolekidzira, nda vola, Inze si mbeye Kristo, navutswa, nda tumwa imbiri wewe.

²⁹U veye nomukana mwiha niye woserereywi: navutswa mulina woserereywi, u singira na a hulira mwoyo gwowoserereywi, a yanza muno kigira mwoyo gwowoserereywi: kunangwa ubuyanzi yibwo bwa mbeye nabwo bu duki.

³⁰Ga mu dukira kuneneha, navutswa inze ga ndukira kugeha.

³¹Uyu u twula migulu a veye igulu wa vosi: u twula mu kivala, uyu nu mundu wekivala, kandi a vola agomu kivala: u twula migulu a veye igulu wa vosi.

³²Aga a loli nokuhulira, nigo aga a lolekidza; kandi si ha veye nomundu u bugirira lilolekidza lilye.

³³Uyu u mali kubugirira lilolekidza lilye, u mali kukupa kyokulolera kyikye ku yaga, Nyasaye nu weligali.

³⁴Kigira uyo wa Nyasaye ya tuma a vola amakuva ga Nyasaye: kigira Nyasaye si a mu ha Roho nekigero.

³⁵Dada a yanza Mwana, kandi u mali kumuha vyosi mu makono gege.

³⁶U suuvira Mwana a veye nelivamwoyo li ta hera mba; navutswa uyu u ta tia Mwana si a li lola livamwoyo, navutswa ubutima bwa Nyasaye bu menya kuye.