Read lulogooli Yohana 6 Bible Online

Yohana 6 - lulogooli bible

Yohana 6

¹Inyima ya vindu yivi Yesu ya twula na a tsia engereka wenyanza ya Galilaya, nayo i veye inyanza ye Tiberia.

²Kiduma kinene kya mu londa, kigira va lola vilolekidzu vya ya kola kuvo avalwala.

³Kandi Yesu yanegira mu kigulu, ni yikala mu, halala navegidzwi veve.

⁴Lipasaka, lilia lya Vayuda, lya li himbi.

⁵Maku, Yesu ya ginga tsimoni tsitsye, na a lola kiduma kinene kidza kuye, ya volera Filipu, Ku la gula haliki ubukima, yava va duke kulagira?

⁶Navutswa ya vola yaga kumugeridza: kigira mwene ya manya ga a li kola.

⁷Filipu ya mu tivulira, Milango gye tsishilling tsimia tsiviri si bu duka sa mulala va vugula bukekeke.

⁸Mulala ku vegidzwi veve, Andreya, amwavo Simoni Petro, ya mu volera,

⁹A veye hano muyai a veye nemilango gyitanu gya shairi, netsisudzi tsiviri: navutswa yivi ni vindu ki vi duka vanyingi yava?

¹⁰Yesu ya vola, Mu lombe avandu vikale. Ha li nobunyasi bunyingi ha zana. Maku, vikala avandu avikula, livalidza lyavo lya duka tsielfu tsitanu.

¹¹Yesu ya vugula milango; kandi lwa ya mala kusantidza, ya gavulira ava li vikaye; kandi tsisudzi ndiyo, kuduka kuli wa venya.

¹²Kandi lwa viguta, ya volera avegidzwi veve, Mu vungidze madonye aga tigaye, kindu ki ta gota mba.

¹³Ku, va vungidza ni vizulitsa vihinda likumi na viviri, amadonye ga twula ku milango gyitanu gya shairi, aga tigala ku va lagira.

¹⁴Kigira yaga avandu lwa va lola kilolekidzu kya ya kola, va vola, Ligali uyu niye muprofeti zana udza mu lirova.

¹⁵Yesu lwa ya manya venya kuudza kumugumira netsingulu va mu kole mwami, ya tsia kandi mu kigulu mwene yeng'ine.

¹⁶Kandi lwa gwa duka mgolova avegidzwi veve viika ni va tsia ku luginga lwenyanza;

¹⁷ni va nina mu bwato ni vambuka inyanza kutsia Kapernaume. Inyinga zana kya gwa kisundi, kandi Yesu ya kikiri kuduka kuvo.

¹⁸Kandi inya nza ya tanga kukola viguvuli kigira imbuudza inene ya huudza.

¹⁹Kigira yaga lwa va mala kugenda tsimaili tsivaka kinga tsine va lola Yesu na a genda ku inyanza, naye ya li himbi nobwato: ni va tia.

²⁰Navutswa ya va volera, Ni inze; mu ta tia mba.

²¹Kigira yaga va yanza kumuvugula kumuvika mu bwato: nonoho bwato bwa duka ku kivala kya va tsitsa yo.

²²Mugamba kiduma kinene kya singira hangereka henyanza, kya lola si ha veye nobwato bundi, navutswa bulala, kandi Yesu si yingira navegidzwi mu bwato, navutswa avegidzwi veve va tsia veng'ine

²³(navutswa amato gandi ga twula Tiberia, gadza himbi na ha va lagirira ubukima inyima ya Mwami ya santidza):

²⁴ku, kiduma lwa kya lola Yesu si a veye ho, kandi avegidzwi veve vingira avene mu mato, ni vadza Ka pernaume, kwenya Yesu.

²⁵Lwa va mu nyola hangereka henyanza, va mu volera, Rabi, wadza inyinga ki hano?

²⁶Yesu ya va tivulira na a vola, Ligali ligali, mmu volera, Si mu nyenyi kigira mwa lola vilolekidzu, navutswa kigira mwa lagira milango, ni mwiguta.

²⁷Mu ta yinzira ku vugula vyokulia vyoneka, navutswa mu yinzire kuvugula vyokulia vi menya kuduka ku livamwoyo li ta hera mba, vyo Mwana wa Adamu a la mu ha: kigira Dada, Nyasaye, u mali kukupa kuye kyokulolera.

²⁸Kigira yaga va mu volera, Ku la i kola ndi, ku duke kukola miyinzi gya Nyasaye?

²⁹Yesu ya tivula na a va volera, Miyinzi gya Nyasaye ni yigyi, mwinye mu suuvire uyu wa ya tuma.

³⁰Kigira yaga va mu volera, U kola lilolekidza ki, ku lole, kandi ku suuvire ive? Miyinzi ki gya u kola?

³¹Vaguga vetu va lagira mana mwigendanyama; kuli ga ng'o dwa, Ya va ha ubukima bwomigulu kulagira.

³²Kigira yaga Yesu ya va volera, Ligali, ligali, mmu volera, Si ya li Musa wa mu ha ubukima bwomigulu; navutswa Dada wange a mu hedzanga ubukima bweligali bwo migulu.

³³Kigira ubukima bwa Nyasaye ni yibwo bu twula migulu, kandi u hedzanga avomkivala liva mwoyo.

³⁴Kunangwa va mu volera, Mwami, madiku gosi u ku he ubukima yibu.

³⁵Yesu ya va vo lera, Inze nibwo ubukima bweliva mwoyo: uyu udza ku inze si a li lola inzala mba, kandi u suuvira inze si a li lola ubuluhu mihiga nemihiga.

³⁶Navutswa nda mu volera, mu mali kundola navutswa si mu suuvira.

³⁷Vyosi vya Dada a mbedza vi ladza ku inze; naye udza ku inze si nda mu kunga mba.

³⁸Kigira si nda twula migulu kukola ubulaliri bwange, navutswa ubulaliri bwa uyu wa ntuma.

³⁹Yibwo nibwo ubulaliri bwa uyu wa ntuma, ku vyosi vya ya mpa kindu kali kilala ki ta gota, navutswa nda ki simugukidza ku lidiku lyekiheri.

⁴⁰Yibwo nibwo ubulaliri bwa Dada wange, ku vosi u lola Mwana kandi a mu suuvira, a ve nelivamwoyo li ta hera; na inze nda mu simugukidza ku lidiku lyekiheri.

⁴¹Ku Avayuda va mu monya, kigira ya vola, Inze nibwo ubukima bwa twula migulu.

⁴²Kandi va vola, Uyu si a li Yesu mwana wa Yosefa, wa ku manya dada wewe na mama wewe? Kigira ki kalunu a vola, Ndula migulu?

⁴³Yesu ya tivula na a va volera, Mwinye mu ta monya.

⁴⁴Si ha veye nomundu u nyala kuudza ku inze vutswa, wa Dada wa ntuma a ta ng'usa: kandi inze nda mu simugukidza ku lidiku lyekiheri.

⁴⁵Ga ng'odwa mu vi tabu vya vaprofeti, Vosi va legidzwa na Nyasaye. Sa mulala u hulira Dada wange, ni yega, yadza ku inze.

⁴⁶Si ha veye nomundu wa lola Dada, navutswa uyu wa twula wa Nyasaye, uyu niye wa lola Dada.

⁴⁷Ligali, ligali, mmu volera, Uyu u suuvira a veye nelivamwoyo li ta hera mba.

⁴⁸Inze nibwo ubukima bwelivamwoyo.

⁴⁹Avaguga venyu va lagira mana mwigendanyama kandi va kudza.

⁵⁰Yibwo nibwo ubukima bu twula migulu, bwo mundu a nyala kulagira ku, a vule kukudza.

⁵¹Inze nibwo ubukima bwelivamwoyo bwa twula migulu: mundu na a lagira ku bukima yibu, a la va mwoyo mihiga nemihiga: yee kandi ubukima bwa ndi haanira livamwoyo lyavomukivala ni nyama yomubiri gwange.

⁵²Kigira yaga Avayuda va hangalidzana, ni va vola, Mundu uyu a nyala ndi kukuha inyama yomubiri gwigwe ku lie?

⁵³Kigira yaga Yesu ya va volera, Ligali, ligali, mmu volera he, Ni mu ta lia inyama yomubiri yo Mwana wa Adamu nokunwa masahi gege si mu veye nelivamwoyo mu mwinye.

⁵⁴Uyu u lia inyama yomubiri gwange nokunwa masahi gange a veye nelivamwoyo li ta hera mba; kandi inze nda mu simugukidza ku lidiku lyekiheri.

⁵⁵Kigira inyama yomubiri gwange nikyo kyokulia kyeligali, namasahi gange nilyo linwa lyeligali.

⁵⁶Uyu u lia inyama yomubiri gwange nokunwa masahi gange a menya mu inze, kandi inze muye.

⁵⁷Kuli Dada welivamwoyo ya ntuma, na inze mbeye mwoyo kigira Dada; kandi ndiyo uyu u ndia a la va mwoyo kigira inze.

⁵⁸Yibwo ni'owo ubukima bwa twula migulu: si bu veye kuli vaguga va lagira, kandi va kudza; u lagira ubukima yibu a la va mwoyo mihiga nemihiga.

⁵⁹Vindu yivi ya volera mu lisomero lwa ya li ni yegidza avandu mu Kapernaume.

⁶⁰Kigira yaga vanyingi ku vegidzwi veve lwa va hulira, va vola, Yili ni livola lidinyu; ibwaha a nyala kulihulira?

⁶¹Navutswa Yesu ya manya mwene, avegidzwi veve va monya ku livola yili, na a va teva, Yili li mwikigitalidza?

⁶²Ga li va ndi ni mu lola Mwana wa Adamu yanegira kutsia ha ya li lwambiri?

⁶³Ni roho gu haana livamwoyo; inyama yomubiri si i konya kindu: amakuva ga mmu voleye ga veye roho, kandi livamwoyo.

⁶⁴Navu tswa ha veye navalala ku mwinye ava ta suuvira. Kigira Yesu ya manya lwambiri nivaha ava ta suuvira, kandi ni bwaha u li mu zama.

⁶⁵Kandi ya vola, Kigira yaga nda mu volera, Si ha veye nomundu u nyala kuudza ku inze, bugira Dada wange na a ta mu haani.

⁶⁶Ku yaga avanyingi ku vegidzwi veve virana inyima, si va genda halala naye kandi.

⁶⁷Kigira yaga Yesu ya volera ava li likumi na vaviri, Nkani mwinye kandi mwenya kutwula?

⁶⁸Simoni Petro ya mu tivulira, Mwami, ku tsia ku bwaha? Ive u veye namakuva gelivamwoyo li ta hera mba.

⁶⁹Kandi kwinye ku suuviye, na ku manyi, ive u veye Mutakatifu wa Nyasaye.

⁷⁰Yesu ya va tivulira, Si nda tovola mwinye likumi na vaviri, na mulala ku mwinye ni setani?

⁷¹Uyu wa ya tala ni Yuda wa Simoni Iskarioti, kigira uyu niye u li mu zama, naye noku va li likumi na vaviri.