Read lulogooli Yohana 8 Bible Online

Yohana 8 - lulogooli bible

Yohana 8

¹Inyumba yeye: navutswa Yesu ya tsia mu kigulu kya Mizeituni.

²Ya kivira mugamba na a tsia mu litempeli, kandi avandu va tsia kuye vosi; naye yikala na a vegidza.

³Kandi avang'odi na Vafarisayo va leta mukali wa va nyola na a heya; kandi lwa va mu vika hagati,

⁴va mu volera, Mwegidzi, mukali uyu u nyo leywi na a heyanga.

⁵Musa, mu lilaga ya ku laga kwiita ku uyu ndi namagina: ive u vola ndi kuye?

⁶Yaga va vola kumugeridza, va duke kumuyala. Navutswa Yesu yinama hasi, na a ng'oda mu marova nekidete kikye.

⁷Navutswa lwa va kira kumuteva, ya diguluka, na a va volera, U ta kola ubwoni ku mwinye a tange kumulasa ligina.

⁸Kandi yinama hasi na a ng'oda mu marova nekidete kikye.

⁹Kandi yavo lwa va ga hulira, va tsia sa mulala sa mulala, va tanga avakulundu, kuduka ku vahereridzi: na Yesu ya tigala yeng'ine nomukali ha ya li hagati.

¹⁰Kandi Yesu ya diguluka na a mu volera, Mukali, va veye ha li ha? Si ha veye nomundu u ku kalagiye?

¹¹Kandi ya vola, Mwami, si ha li nomundu. Kandi Yesu ya vola Inze kandi si nku kalagira mba: u tsie; kutwula kalunu u ta kola bwoni kandi.]

¹²Kunangwa Yesu ya va volera kandi, na a vola, Inze nibwo ubulavu bwavomkivala: u nondanga si a li genda mu kisundi, navutswa a la va nobulavu bweliva mwoyo.

¹³Kigira yaga Vafarisayo va mu volera Ive welolekidza; lilolekidza lilyo si li veye lyeligali.

¹⁴Yesu ya tivula na a va volera, Kali ni mba ni ndolekidza, lilolekidza lyange li veye lyeligali; kigira nzemanya wa nda twula, nowa ntsitsa; navutswa mwinye si mu manya ha ntwula, na ha ntsitsanga.

¹⁵Mwinye mu kalaga kuli inyama yomubiri; inze si nkalagira mundu kali mulala.

¹⁶Kandi inze kali ni mba ni nkalaga, likalaga lyange li veye lyeligali; kigira inze si mbeye tsyeng'ine, navutswa inze na Dada wa ntuma.

¹⁷Kandi ga ng'odwa mu lilaga yenyu, lilolekidza lyavandu vaviri li veye lyeligali.

¹⁸Inze niye welolekidza, kandi Dada wa ntuma a ndolekidza.

¹⁹Kigira yaga va mu volera, Dada wowo a veye ha li ha? Yesu ya tivula, Si mu manya inze, kali Dada wange: ni mba ni mu manya inze, nkano mu manya Dada wange.

²⁰Amakuva yaga ya volera hetsishilling tsi vikangwa, lwa yegidza mu litempeli: kandi si ha li nomundu wa mu gumira, kigira isaa yeye ya li ni i kikiri kuduka.

²¹Ku, ya va volera kandi, Inze ntsitsa, na mwinye mu la nyenya, kandi mu la kudzera mu bwoni bwenyu: wa ntsia, mwinye si mu nyala kuduka.

²²Kigira yaga Avayuda va vola, A liita mwene, kigira a vola, wa ntsia mwinye si mu nyala kuduka?

²³Kandi ya va volera, Mwinye mu veye avahasi; Inze mbeye wigulu: Mwinye mu veye avomkivala yiki; inze si mbeye womkivala yiki.

²⁴Yiki ni kigira nda mu volera, Mu la kudzera mu bwoni bwenyu: ni i va mu vula kusuuvira inze niye, mu la kudzera mu bwoni bwenyu.

²⁵Kunangwa va mu teva, Ive u veye ibwaha? Yesu ya va volera, Mbeye ligali kuli wa nda mu volera kutwula mu litanga.

²⁶Mbeye nevindu vi nyingi vyokuvola ku mwinye nokukalaga ku mwinye: navutswa wa ntuma a veye weligali; na inze aga nda hulira kuye, nigo aga mbolera avomkivala.

²⁷Si va manya a va volera ku Dada.

²⁸Kigira yaga Yesu ya va volera, Lwa mu li ginga Mwana wa Adamu, nilwo lwa mu li manya inze niye, kandi si nkola kindu mwene, navutswa mbola vindu yivi kuli wa Dada ya nzegidza.

²⁹Kandi wa ntuma a veye halala ninze; si ya ndeka tsyeng'ine; kigira inze kazozo nkolanga vindu vya a yanza.

³⁰Lwa ya vola yaga vanyingi va mu suuvira.

³¹Maku, Yesu ya volera Avayuda ava mu suuvira, Mwinye ni mu menya mu likuva lyange, ligali mu veye avegidzwi vange;

³²kandi mu la manya ageligali, nago ageligali ga la mu boholola.

³³Va mu tivulira, Ku veye avana va Abrahamu, kandi ku kikiri kuva avatugwa vomundu kali mulala: ive u vola ndi, Mu la bohololwa?

³⁴Yesu ya va tivulira, Ligali, ligali, mmu volera, Ku vosi u kola ubwoni a veye mutugwa wobwoni.

³⁵Mutugwa si a menya mu inyumba madiku gosi: mwana niye u menya madiku gosi.

³⁶Kigira yiki Mwana na a va na a mu boholola mu la va avabohololwi veligali.

³⁷Mmanya mwinye mu veye avana va Abrahamu, navutswa mwenya kunziita, kigira likuva lyange si li veye nobwiyangu mu mwinye.

³⁸Mbolanga aga nda lola ku Dada wange: na mwinye kandi mu kola ga mwa hulira ku dada wenyu.

³⁹Va tivula ni va mu volera, Dada wetu ni Abrahamu. Yesu ya va Volera, Ni mu ve avana va Abrahamu, nkano mu kolanga miyinzi gya Abrahamu.

⁴⁰Navutswa mwinye mwenya kunziita, mundu wa mu volera ageligali aga nda hulira ku Nyasaye: yaga Abrahamu si ya kola.

⁴¹Mwinye mu kola miyinzi gya dada wenyu. Va mu volera, Kwinye si kwivulwa indasimba; ku veye na dada mulala yeng'ine, ni Nyasaye.

⁴²Yesu ya va volera, Nyasaye na a ve Dada wenyu, nkano mu yanza inze: kigira inze nda twula ku Nyasaye kuduka hano; kandi si nzidzi mwene, navutswa ya ntuma.

⁴³Kigira ki si mu manya livola lyange? Kigira si mu nyala kuhulira likuva lyange.

⁴⁴Mwinye mu veye wa dada wenyu setani, kandi likayirwa lya dada wenyu nilyo lya mu lalira kukola. A veye mulumindi kutwula mu litanga, si a singira mu geligali, kigira si a veye nageligali muye. Lwa a vola ubu behi, a vola ku vya a veye navyo: kigira a veye mubehi, kandi ise bubehi.

⁴⁵Navutswa, kigira mbola ageligali, si mu nsuuvira.

⁴⁶Ibwaha ku mwinye a ndolekidza mbeye nobwoni? Ni mbola ageligali kigira ki si mu nsuuvira?

⁴⁷U veye ku Nyasaye a hulira amakuva ga Nyasaye: mwinye si mu hulira kigira si mu veye ku Nyasaye.

⁴⁸Avayuda va tivula ni va mu volera, Si ku vola bulahi, Ive nu Musamaria, kandi u veye nelidemone?

⁴⁹Yesu ya ti vula, Inze si mbeye nelidemone; navutswa inze nzidzominya Dada wange, na mwinye mu nyega.

⁵⁰Navutswa inze si nyenya ubukumi bwange: ha veye no Mulala wenya kandi a kalaga.

⁵¹Ligali, ligali mmu volera, mundu na a gumira likuva lyange, si a li lola likudza mihiga nemihiga.

⁵²Avayuda va mu volera, Kalunu ku manya u veye nelidemone. Abrahamu ya kudza, kandi avaprofeti; nive u vola, Mundu na a gumira likuva lyange si a li tsatsama likudza mihiga nemihiga.

⁵³Ive u veye munene kuvita guga wetu Abrahamu wa kudza? Kandi avaprofeti va kudza: wekola u veye ibwaha?

⁵⁴Yesu ya tivula, Inze ni mba ni nziyidzominya, ubukumi bwange si bu veye kindu: ni Dada wange u nzidzominyanga, wa mu vola, ni Nyasaye wenyu;

⁵⁵na mwinye si mwa mu manya: navutswa inze mmanyi, na inze ni mba ni mbola, Si mu manya nda va mbehi kuli mwinye: navutswa inze mmanya kandi ngumira likuva lilye.

⁵⁶Guga wenyu Abrahamu ya sangala kulola lidiku lyange; ya li lola na a yanza.

⁵⁷Kunangwa Avayuda va mu volera, Ive u kikiri kuduka imihiga amakumi gatanu, ive wa lola Abrzhamu?

⁵⁸Yesu ya va volera, Ligali, ligali, mmu volera, Abrahamu na a tivulwa, inze mbeye.

⁵⁹Kigira yaga va dola magina ni venya kumulasa: navutswa Yesu yivisa na a twula mu litempeli.