Read lulogooli Yohana 9 Bible Online

Yohana 9 - lulogooli bible

Yohana 9

¹Lwa ya li na a vita ya lola mundu ni ya vakula kutwula livulwa lilye.

²Kandi avegidzwi veve va mu teva ni va vola, Rabi, wa kola ubwoni nibwaha, mundu uyu naho avivuli veve, yivulwe mboku?

³Yesu ya tivula, Uyu si ya kola ubwoni, kali avivuli veve: navutswa kigira gyi duke kukolwa habulavu miyinzi gya Nyasaye kuye.

⁴Ga ku dukira kukola miyinzi gya uyu wa ntuma, gu kiri mbasu: ubudiku buudza, inyinga yomundu a ta nyala ku kola miyinzi.

⁵Lwa mbeye mu kivala, mbeye ubulavu bwavomkivala.

⁶Lwa ya mala kuvola ndiyo, ya tudza amate mu marova, na a lomba ubudohi namate, na a mu vaka mu tsimoni tsitsye nobudohi,

⁷kandi ya mu volera, Tsia, wisaave mu lidavalia lya Siloam (litivula li veye kuvola, Wa tumwa). Ya tsia ni yisava ni yadza na a lola.

⁸Kunangwa avatende veve navo ava mu lola lwambiri na a veye mudaka musaavi, va vola, Uyu si a li wikala na a saava?

⁹Avalala va vola, Niye: navandi va vola, Auwa, navu tswa a fwanana naye. Mwene ya vola, Ni inze.

¹⁰Kunangwa va mu teva, U nyoye ndi kukunulwa tsimoni tsitsyo?

¹¹Ya tivula, Mundu uyu u langwa Yesu ya lomba ubudohi ni ya mbaka mu tsimoni tsyange, na a mbolera, tsia Siloam wisave: ku, nda tsia ni nzisava, maku nda nyola lilola.

¹²Kandi va mu volera, A veye ha li ha uyu? Ya vola, Si mmanya ha a veye.

¹³Va hila ku Vafarisayo uyu wa li mboku lwambiri.

¹⁴Nalyo lya li lisabato lidiku lya ya lombera ku ubudohi na a mu kunula tsimoni tsitsye.

¹⁵Kunangwa kandi Avafarisayo va mu teva, U nyoye ndi kulola. Naye ya va volera, Ya li ku mbaka ubudohi mu tsimoni tsyange, kandi ni nzisava, ni nyola lilola.

¹⁶Kunangwa avalala ku Vafarisayo va vola, Mundu uyu si a veye wa twula ku Nyasaye, kigira si a gumira lisabato. Navutswa avandi va vola, Mundu mwoni a nyala ndi kukola vilolekidzu kuli yivi? Ku, lya li lyavukana kuvo.

¹⁷Kunangwa va vo lera mboku kandi, U vola ndi kuye, kigira u ku kunuye tsimoni tsitsyo? Naye ya vola, Uyu nu muprofeti.

¹⁸Kunangwa Vayuda va vula kusuuvira kuye hene ya li mboku, ma a duki kulola, va luha va langa avivuli va uyu wa nyola lilola,

¹⁹kandi va va teva, ni va vola, Hene uyu nu mwana wenyu, wa mu vola yivulwa mboku? Kahmu a nyoye ndi kulola?

²⁰Avivuli veve va tivula ni va vola, Uyu ku mu manya a veye mwana wetu, kandi yivulwa mboku:

²¹navutswa kuli wa a lola ndi kalunu si ku manya; kinga wa mu kunula tsimoni tsitsye, kwinye si ku manya: mu teve mwene; a veye mundu u duki: a la vola mwene.

²²Vindu yivi avivuli veve va vola kigira va tia Avayuda: kigira Avayuda va li ni va mali kulagana, mundu ni yeyama uyu ni Kristo, a kungwe mu livugana.

²³Yiki ni kigira avivuli veve va vola, Nu mundu u duki: mu mu teve.

²⁴Kunangwa va langa hali kaviri mundu wa li mboku, ni va mu volera, U he Nyasaye ubukumi: kwinye ku manya mundu uyu a veye mwoni.

²⁵Ku, ya tivula, Kali na a veye mwoni, si mmanya: kindu kilala mmanya, nda i mboku, kalunu ndolanga.

²⁶Kunangwa va mu teva, A ku koleye ndi? A kunuye ndi tsimoni tsitsyo?

²⁷Ya va tivulira, Mmali kumuvolera kalunu, kandi mwinye si mwa hulira; kigira ki mwenya kuhulira kandi? Mwinye kandi mwenya kugwa avegidzwi veve?

²⁸Kandi va mu nyega, ni va vola, Ive nu mwegidzwi wewe; navutswa kwinye ku veye avegidzwi va Musa.

²⁹Ku manya Nyasaye ya volera Musa amakuva: navutswa mundu uyu si ku manya wa a twula.

³⁰Mundu ya tivula na a va volera, Nkani yili nilyo ligenya mwinye si mu manya wa a twula, navutswa u kunuye tsimoni tsyange.

³¹Ku manya Nyasaye si ya hulira avoni: navutswa mundu na a va na a veye u sigamira Nyasaye na a kola ubulaliri bwibwe, a mu hulira.

³²Kutwula inyinga lirova lya lombwa si ga hulirwa mundu wa kunula tsimoni tsyomundu wivulwa mboku.

³³Uyu na a ta li mundu wa twula ku Nyasaye si ya nyala kukola kindu.

³⁴Va tiwla ni va mu volera, Ive wivulwa mu bwoni ligali, kandi ive wegidza kwinye? Ni va mu kunga.

³⁵Yesu ya hulira va mu kungi; na a mu nyola na a vola, Ive u suuvira Mwana wa Nyasaye?

³⁶Ya tivula na a vola, Naye nibwaha, Mwami, nduke kumusuuvira?

³⁷Yesu ya mu volera, Ive u mu loli, kandi niye wa mbolerana naye.

³⁸Kandi ya vola, Mwami, nsuuviye. Na a mu sigamira.

³⁹Kandi Yesu ya vola, Inze nzidzi mu kivala yiki ku likalaga, ava ta lola va duke kulola; navo ava lola va vakule.

⁴⁰Avalala ku Vafarisayo ava li halala naye va hulira amakuva yaga, ni va mu volera, Kwinye kandi ku veye avaboku?

⁴¹Yesu ya va volera, Mwinye ni mu ve avaboku, nkano si mu veye nobwoni: navutswa kalunu mu vola, ku lola: ubwoni bwenyu bu menya.