Read lulogooli Vikolwa 16 Bible Online

Vikolwa 16 - lulogooli bible

Vikolwa 16

¹Kandi ya duka Derbe na Lustra. Na henza, ya li ho mwegidwzi mulala, wa langwa Timoteo, mwana womukali Muyuda wa suuvira; navutswa ise ya li Mugreki.

²Naye, avamitu ava li mu Lustra na Ikonio, va mu lolekidza a veye mulahi.

³Paulo yenya uyu a tsie halala naye; kandi ya mu vugula na a mu keva kigira Avayuda va li ha zana, kigira vosi va manya ise wewe ya li Mugreki.

⁴Lwa va vodonkana mu madala, va va ha malago ga lagwa navatumwa navakulundu ava li mu Yerusalemi, va ga gumire.

⁵Kunangwa mavugana ga hebwa tsingulu mu lisuuvira, ni ga dasika kazozo.

⁶Va vita mu kivala kya Frigia nekya Galatia kigira Roho Mutakatifu ya va gaya kwilwadza likuva mu Asia;

⁷kandi lwa va duka himbi Misia, va geridza kutsia Bithinia; navutswa Roho wa Yesu si a va ha munwa;

⁸ma va vita Misia, ni va duka Troa.

⁹Liloto lya duka ku Paulo ubudiku: Mundu wa Makedonia u singiye na a mu goonya, na a vola, Wambuke udze mu Makedonia u ku konye.

¹⁰Lwa ya mala kulola liloto, nonoho kwa geridza kutsia Makedonia, kigira kwa vola ligali Nyasaye a ku langa kuvilwadzira ivangeli.

¹¹Kwa nina mu bwato mu Troa ni ku tsia bulungi kuduka Samothraki kandi mugamba kwa duka Neapoli;

¹²kandi ku a duka Filipi, li veye Iidala lya Makedonia, linene lyolusoma, kandi lya Varomi vadikira mu: kandi kwa menya mu lidala yili amadiku ga duki.

¹³Ku lidiku lyelisabato kwa vita kiribwa ku twula mu lidala kutsia ku luginga lwomugera, ha kwa vola ni hoku saala; ni kwikala ni ku volera avakali ava vugana.

¹⁴Mukali mulala wa langwa Ludia, mugulidzi we kiforosadi, welidala lya Tuatera, mundu wa sigamira Nyasaye, ya ku hulira: wo Mwami ya kunula mwoyo gwigwe kuhulira vindu vya Paulo ya vola.

¹⁵Kandi lwa ya batidzwa, halala navenyumba yeye, ya ku saala na a vola, Ni mu lola inze mbeye musuuviri ku Mwami, mwingiri mu inyumba yange mu menye. Kandi ya ku niga.

¹⁶Kandi lwa kwa tsia hokusaala, mukana mulala wa li nomwoyo gwokulagula, ya vugana na kwinye, wa letera avami veve vyambeti vinyingi ku bulaguli bwibwe.

¹⁷Naye ya londa Paulo na kwinye, na a hanzuka na a vola, Avandu yava navatumwa va Nyasaye U Veye Igulu Ligali, ava mwilwadzira inzira yobuhonnyi.

¹⁸Ya kola ndiyo madiku manyingi. Navutswa Paulo ya verera ligali, na a girunkana na a volera mwoyo yigwo, Nku laga ku lieta lya Yesu Kristo, u twule kuye. Kandi gwa twula isaa zana yeyo.

¹⁹Navutswa avami veve lwa va lola lisuuvira lyavo lyokunyola vyambeti li goti, va gumira Paulo na Sila ni va va kwesa ni va va hila mu kitu imbiri wavanene;

²⁰kandi lwa va mala kuvahila wa vanyampara, va vola, Avandu yava ava li Avayuda, va kwononnyira lidala lyetu ligali.

²¹Kandi vegidza miima gyi ta li milahi kwinye ku gyi londe kandi si bu li bulahi ku kole, kwinye Avaromi.

²²Kandi kiduma kya va twulira halala: kandi avanyampara va tandula tsingubo tsyavo tsi twula kuvo, ni va haana munwa va kuywe netsimpimbo.

²³Kandi lwa va mala kuvakuya nobukinduki bunyingi va va vika mu inyumba yavahambe ni va volera mulindi wavahambe kuvalinda ligali.

²⁴Naye ya hebwa munwa ndi ya va vika mu inyumba yomugati, kandi ya boha virenge vyavo mu mikatale.

²⁵Navutswa himbi ubudiku hagati Paulo na Sila va saala ni vimba tsinyimbu tsyo kwidzominya Nyasaye, kandi avahambe va va huliridza;

²⁶bwangu ha li nelidegera linene lyelirova nevikongo vyenyumba yavahambe vya dengeyidzwa: kandi nonoho miliango gyigulika, neminyororo gya vosi gya boholoka.

²⁷Kandi mulindi wavahambe ya vuka mu tsindolo na a lola miliango gyenyumba yavahambe gyalami, ya somola kivavi kikye ni yenya kwiita, kigira ya ganagana avahambe viruki.

²⁸Navutswa Psulo ya hanzuka na a vola, U tekola kindu kidamano mba, kigira kwinye ku veye hano kwosi.

²⁹Na ye yenya tsitaya ni yingira, na a degera nobutii bunene, na a gwa hasi imbiri wa Paulo na Sila,

³⁰na a va Ieta kyova, na a vola, Avami, ga ndukira nkole ki, nduke kuhonnywa?

³¹Va mu volera, U suuvire Mwami Yesu, na ive u la honnywa, ive navenyumba yoyo.

³²Va mwilwadzira likuva lyo Mwami halala nnvenyumba yeye vosi.

³³Ku isaa zana yobudiku ya va vugula, na a vogidza ubukinduki bwavo; kandi ya batidzwa, uyu navenyumba yeye vosi.

³⁴Kandi ya vanegiridza kuduka mu inyumba yeye, na a vihula vyokulia, na a yanza munonono halala navenyumba yeye, kigira u mali kusuuvira Nyasaye.

³⁵Navutswa lwa bwa kya, avanyampara va tuma avasikari, ni va vola, Mu boholole avandu yavo va tsie.

³⁶Kandi mulindi ya volera Paulo amakuva yaga, na a vola, Avanyampara va tumi avandu mu bohololwe: kunangwa kalunu mu twule, mu tsie nemirembe.

³⁷Navutswa Paulo ya va volera, Va mali kukukuya imbiri wavandu, ku kikiri kukalagirwa, kwinye Avaromi, kandi va ku viki mu inyumba yavahambe kandi kalunu va ku kunga makiriri? Auwa, ligali; navutswa vadze avene va ku twulidze.

³⁸Kandi avasikari yavo va hila amakuva yaga ku vanya mpara; navo va tia lwa va hulira va veye Avaromi;

³⁹ku, vadza ni va va goonya; kandi lwa va mala kuvatwulidza, va venya va twule mu lidala.

⁴⁰Kandi va twula mu inyumba yavahambe, ni vingira inyumba ya ludia: lwa va mala kulola ava mitu, va va leminya myoyo ni va tsia.