Read lulogooli Vikolwa 18 Bible Online

Vikolwa 18 - lulogooli bible

Vikolwa 18

¹Inyima wevindu yivi, ya twula Athene na a duka Korintho.

²Ya nyola yo Muyuda mulala wa langwa Akula, wivulwa mu Ponto, a duki kutwula Italia, halala nomukali wewe Prisila kigira Klaudio ya laga Avayuda vosi va twule mu kivala kya Romi: ya tsia kuvo.

³Kandi kigira va li nomuyinzi mulala ya menya navo, ni va kola miyinzi; kigira miyinzi gyavo va li avasidza vamahema.

⁴Ya vola mu lisomero masabato gosi na a girunkannya myoyo gya Vayuda na Vagreki.

⁵Navutswa Sila na Timoteo lwa va duka kutwula Makedonia, Paulo ya tsuvwa mu mwoyo nelikuva na a lolekidzira Avayuda, Yesu a veye Kristo.

⁶Lwa va hangalidzana naye ni va nyega, ya sung'usa ingubo yeye na a va volera, Masahi genyu ga ve ku mitwe gyenyu avene; inze ntigaye museredze: kutwula kalunu ntsitsa ku Tsihiri.

⁷Ya twula ho ni yingira mu inyumba yomundu mulala wa langwa Tito Yusito, mundu wa sigamira Nyasaye; we nyumba yeye ya hambana nelisomero.

⁸Kandi Krispo, munene welisomero, ya suuvira Mwami, halala navenyumba yeye vosi; kandi avanyingi ku Vakorintho va hulira ni va suuvira, ni va batidzwa.

⁹Kandi Mwami ya volera Paulo mu maloto mu budiku, U ta tia, navutswa u vole u ta kiring'ana mba:

¹⁰kigira mbeye nive halala, si ha veye nomundu u lidza ku ive kukwononnya: kigira mbeye navandu vanyingi mu lidala yili.

¹¹Kandi ya menva ho muhiga mulala nemyeli gyitanu na mulala, ni yegidza likuva lya Nyasaye kuvo.

¹²Navutswa lwa Galio ya li mwamehi wa Akaiya, Avayuda va twulira Paulo nomwoyo mulala ni va mu leta imbiri wekisako kyekyina,

¹³ni va vola, Mundu uyu a goonya avandu va sigamire Nyasaye ku lugano lu ta li kuli lilaga.

¹⁴Na vutswa Paulo lwa yenya kukunula munwa gwigwe, Galio ya volera Avayuda, Ni ga va amakuva gekirage kinga ubwoni budamano, mwinye Avayuda, nkano nda ka mu hulira:

¹⁵navutswa ni ga va amahangali gamakuva ku ameta noku malago genyu, mwinye avene mu henze ku; inze si nyenya kuva mukalagi wamakuva ku yaga.

¹⁶Na a va kunga va twule ku kisako kyekyina.

¹⁷Kandi vosi va gumira Sosithene munene welivugana, ni va mu kuya imbiri wekisako kyekyina. Kandi Galio si ya lola vindu yivi kuva vinene.

¹⁸Inyima wa yaga, Paulo ya menya madiku manyingi, na a siivula avamitu, na a nina mu bwato kutsia Siria, kandi Prisila na Akula ra tsia halala naye. Ya vegera mutwe mu Kenkerea; kigira ya li na a mali kweyama.

¹⁹Va duka Efeso, na a va leka ho: navutswa mwene yingira mu lisomero, na a volerana na Vayuda.

²⁰Kandi lwa va mwenya a menye madiku gandi, si ya bugirira mba;

²¹navutswa ya siivulana navo, na a vola, Ndirana ku mwinye kandi, Nyasaye na a va na a yanza. Ya nina mu bwato na a twula Efeso.

²²Kandi lwa ya mala kwika Kaisaria, yanegira na a chelidza livugana, na a tsia Antiokia.

²³Lwa ya mala yo inyinga i duki, ya twula na a vita kivala kya Galatia na Frigia madala namadala, na a dinyeridza avegidzwi vosi mwoyo.

²⁴Muyuda mulala wa langwa Apolo, wivulwa Alekisanderia, kandi mulongoli, ya duka Efeso; kandi mgulu ku mang'oda.

²⁵Mundu uyu ya li na a mali kwegidzwa inzira yo Mwami; ya li nomwoyo muholo, ya vola ni yegidza bulungi amakuva ga Yesu, navutswa ya li ni ya manya libatidza Iva Yohana lyeng'ine.

²⁶Kandi ya tanga kuvola mu lisomero nobuluviriri. Navutswa Prisila na Akula lwa va mu hulira, va mu vugula ni va mu vuulira bulahi kuvita inzira ya Nyasaye.

²⁷Kandi lwa yenya kutsia Akaiya, avamitu va mu tsuva, ni va ng'odera avegidzwi va mu bugirire. Kandi lwa ya duka, va va konya ligali ava suuvira netsimbahasi;

²⁸kigira va guuta Vayuda ligali imbiri wavandu, na a va mannya namang'oda, Yesu a veye Kristo.