Read lulogooli Vikolwa 23 Bible Online

Vikolwa 23 - lulogooli bible

Vikolwa 23

¹Ma Paulo yumika kyina na a vola, Avamitu, ng'endi imbiri wa Nyasaye nomwoyo mulahi kuduka lero.

²Musalisi munene Anania ya laga, ava singiye himbi naye, va mu duye mmunwa.

³Hene yaho Paulo ya mu volera, Nyasaye a la ku duya, ive lidigi lya homwa nobudohi bulavu: ive wikala kunkalagira kuli lilaga, navutswa u haana munwa nduyirwe ku mwima gu ta li kuli lilaga?

⁴Na yava ava singira himbi va vola, U nyega musalisi munene wa Nyasaye?

⁵Paulo ya vola, Avamitu, si nda manya a veye musalisi munene: kigira ga ng'odwa, U ta vola ubuda mano ku munene wavandu vovo.

⁶Navutswa Paulo lwa ya lola kidieli kilala nekya Vasadukayo nekindi nekya Vafarisayo, ya hanzuka mu kyina na a vola, Avamitu, inze mbeye Mufarisayo, kandi mbeye mwana wa Vafarisayo: ku lisuuvira nelisimugu kidzwa lyavakudzi, yiki ni kigira ndetwa mu kyina.

⁷Lwa ya mala kuvola ndi, amahangali ga tanga ku Vafarisayo na Vasadukayo; kiduma kyavukana.

⁸Kigira Avasadukaya va vola si ha veye nokusimugukidzwa, kinga ingelosi, kinga roho; navutswa Avafsrisayo veyama gosi.

⁹Lya twula liyoga linene: avang'odi avalala ku Vafarisayo va singira ni va hing'ana, ni va vola, Si ku lola ubudamano ku mundu uyu: kandi na a va roho kinga ingelosi a volerana naye, ni kindu ki?

¹⁰Lwa ga twula ama hangali manene, munyampara mu nene ya tia gase va la tandula Paulo, na a ha avasikari munwa vike va tsie kumutwulidza netsingulu hagati havo nokumuleta mu lugaga lwavasikari.

¹¹Kandi ubudiku yibwo Mwami ya singira himbi naye, na a vola, U leme mwoyo: kidra kuli u lolekidzi ku inze mu Yerusalemi, u la lolekidza kandi ndiyo mu Romi.

¹²Lwa bwa kya Avayuda va hambana halala, ni visuha, ni va vola, si va nyala kulia, kandi si va nyala kunwa va kikiri kwiita Paulo.

¹³Avisuhirana va vita amakumi gane.

¹⁴Ni va tsia ku vasalisi vanene navakulundu, ni va vola, Ku mali kwisuha lisuha linene ku ta tsatsama kindu ni ku kikiri kwiita Paulo.

¹⁵Kunangwa mwinye, halala nekyina, mu volere munyampara munene, a mu lete hasi ku mwinye kuli mwenya kumanya ligali amakuva gege: na kwinye kwetegeki kumwiita na a kikiri kuduka himbi.

¹⁶Navutswa mwifwa wa Paulo ya hulira liseta lyavo, ni yadza ni yingira mu lugaga lwavasikari na a volera Paulo.

¹⁷Paulo ya langa mulala ku vanyampara na a mu volera, Hila muyai uyu ku munyampara munene; kigira a veye nelikuva kumuvolera.

¹⁸Kunangwa ya mu vugula na a mu hila ku munyampara munene, na a vola, Paulo muhambe ya nanga ni ya nyenya nku letere muyai uyu, a veye nelikuva kukuvolera.

¹⁹Mu nyampara munene ya mu gumira mukono, na a mu hila haluvega na a mu teva makiriri, I kindu ki kya we nya kumbolera?

²⁰Kandi ya vola Avayuda va mali kulagana va ku save u lete Paulo imbiri wekyina mugamba, kuli venya kwizoza amakuva gege.

²¹Navutswa u ta bugirira amakuva gavo: kigira avandu va vita amakumi gane va mu setera, va mali kwisuha va ta lia, kandi va ta nwa va kikiri kumwiita: kalunu vetegeki, va linda lisuuviridza lilyo.

²²Kunangwa munyampara munene ya leka muyai a tsie, na a mweganehidza, U ta volera mundu kali mulala, u mali kumbolera amakuva yaga.

²³Ya langa avanyampara vaviri na a vola, Mu lombe avasikari tsimia tsiviri va tsie kuduka Kaisaria, navasikari ava nina ku tsiparasi amakumi gatanu na gaviri, navasikari avamatimu tsimia tsiviri, va tsie ubudiku tsisaa tsivaka.

²⁴Kandi ya va voleva va lombe tsiparasi tsi ginge Paulo, ni va mu hila bulahi kuduka wa Felike govuna.

²⁵Na a ng'oda ibaruwa kuli lugano yilu.

²⁶Klaudio Lusia ku mwami mulahi, Felike govuna, mirembe.

²⁷Mu ndu uyu, Avayuda va gumira, ni venya kumwiita, hene yaho inze nda duka kuvo navasikari ni mhonnya lwa nda hulira a veye Muromi.

²⁸Ni nyenya kumanya kindu kya va mu yalira, nda mu leta imbiri wekyina kyavo:

²⁹wa nda lola va mu yalira ku makuva gelilaga lyavo, navutswa si a li nekindu kuye kyokumwiitira kinga kyokumuboha.

³⁰Kandi lwa nda hulira a la seterwa, nonoho nda mu leta ku ive, kandi nda volera avenya kumuyalira vadze kuvola amakuva imbiri wowo.

³¹Ku, avasikari va vugula Paulo, kuli va hebwa munwa, ni va muhila mu budiku kuduka Antipatiri.

³²Navutswa mugamba va leka ava nina ku tsiparasi kutsia naye, ni virana mu lugaga lwavasikari.

³³Navo lwa va duka Kaisaria va ha govuna ibaruwa ni va vika Paulo imbiri wewe.

³⁴Kandi lwa ya mala kugisoma, ya teva a veye mundu wekivala ki; kandi lwa ya manya a veye mundu wa Kilikia,

³⁵ya vola, Nda ku hulira ku gosi inyinga avenya kukuyalira vadza: na a haana munwa a lindwe mu inyumba ya Herodi.