Read lulogooli Vikolwa 24 Bible Online

Vikolwa 24 - lulogooli bible

Vikolwa 24

¹Inyima yamadiku gatanu musalisi munene, Anania ya sulunguta halala navakulundu valala nomwilwadzi mulala wa langwa Tertulo; ni va lungika govuna ku amakuva ga Paulo.

²Kandi Tertulo lwa ya langwa ya tanga kumuyalira, na a vola. Kigira kwinye kwa nyola mirembe minene ku ive, kandi ku lihenza lilyo ubudamano bunyingi bu ta kolwa mu ihiri yiyi,

³kwinye ku ga bugirira mudiku gosi nomu tsimbega tsyosi nelisantidza lyosi, Felike mulahi.

⁴Navutswa nta ku sinya kandi, nku saala, u ku hulire amakuva makekeke ku buhoma bubwo.

⁵Kigira kwinye ku mali kulola mundu uyu kuva mundu mudamano ligali, nu mugemehidzi mu Vayuda vosi mu vivala vyosi mu lirova, kandi nu munene ku lyahuka lya Vanazareti:

⁶kandi ya geridza kwononnya litempeli: wa kwa gumira: nokwenya kumukalagira kuli amalago getu.

⁷Navutswa Lusia, munyapala munene, yaduka, na a ku nyaga mu mikono gyetu netsingulu tsinene,

⁸na a laga ava mu yala kuudza ku ive. Lwa u mu teva u la nyala kumanya kuye amakuva gosi ga ku mu yalira.

⁹Kandi Avayuda va bugirira, ni va vola vindu yivi ni ndiyo vya li.

¹⁰Govuna lwa ya mu sima a vole amakuva, Paulo ya tivula. Kigira mmanya ive u veye mukalagi wehiri yiyi imihiga minyingi, ntivula nobuyanzi:

¹¹kandi kigira ive u nyala kumanya ligali madiku si ga viti likumi na gaviri kutwula inyinga ndanegira Yerusalemi kusigama:

¹²kandi si va nyola ni mbangalidza mundu kali mulala mu litempeli, kandi si va nyola ni ngemehidza kiduma kinga mu masomero kinga mu lidala.

¹³Kandi si va nyala kulungikidza ku ive amakuva ga va nzalira.

¹⁴Navutswa yaga nziyama ku ive, ku Inzira ya va langa lyahuka nsigamira Nyasaye wa vaguga vetu, nsuuvira vindu vyosi vya hambana nelilaga, kandi vya ng'odwa mu vaprofeti;

¹⁵mbeye nelisuuvira ku Nyasaye lya yava kandi va linda, li la va lisimugukidzwa lyavalungi navo ava ta li valungi.

¹⁶Ku yaga nzidinyiridza kazozo nduke kuva nomwoyo gu ta li nekindu kidamano imbiri wa Nyasaye kandi imbiri wavandu.

¹⁷Kalunu inyima yemihiga minyingi nda duka kuletera ihiri yange tsisadaka nevihaanwa:

¹⁸ku yivi va nyola ni ntakaswa mu litempeli, si nda li nekiduma kandi si nda li neliyoga: navutswa va li ho Avayuda valala va Asia

¹⁹ava ga dukira va ve hano kunzalira imbiri wowo, ni va veye namakuva ku inze.

²⁰Kinga avandu yava avene va vole ubwoni bwa va lola lwa nda singira imbiri wekyina,

²¹navutswa kigira likuva lilala yili lya nda gamba imbiri wavo, Nzalirwa iinbiri wenyu lero kigira lisimugukidzwa lyavakudzi.

²²Navutswa Felike, inyinga ya manya bulahi miima gye Nzira yiyi, ya va lindidza na a va volera, Lusia munyampara munene lwa a duka nda kalaga likuva lyenyu.

²³Ya ha munyampara munwa Paulo a lindwe, navutswa a ve nobwiyangu; kandi a tigalira avalina veve kali mulala va mu tumekire.

²⁴Navutswa inyima yamadiku makekeke Felike yadza halala nomukali wewe, Dirusila wa li Muyuda, na a langa Paulo, na a mu hulira ku makuva gelisuuvira Yesu Kristo.

²⁵Paulo lwa yilwadza ku bulungi, kandi ku kwelinda bulahi, nelikalaga lidzanga, ubutii bunyingi bwa gumira Felike, kandi ya tivula na a vola, Kalunu u tsie; na inze lwa na ndole ubwiyangu na nku lange.

²⁶Ya lindirira Paulo a mu he tsishilling: kigira yiki ya hongera kumulanga na a volerana naye.

²⁷Navutswa lwa gya vita imihiga gyiviri Porikio Festo ya hila ubwami bwa Felike; na Felike kigira yenya kukolera Avayuda kindu kya va mu yanzira, ya leka Paulo mu libofwa.