Read lulogooli Vikolwa 26 Bible Online

Vikolwa 26 - lulogooli bible

Vikolwa 26

¹Agiripa ya volera Paulo, U veye nomunwa kuvola amakuva gogo mwene. Hene yaho Paulo ya nyira mukono gwigwe na a vola amakuva gege.

²Mbola mbeye nobugasu, mwami Agiripa, kigira lero nyala kutwulidza tsinkingiru tsyange imbiri wowo ku vindu vyosi vya Vayuda va nzalira:

³ligali kigira ive u manya miima gyosi namateva gosi ga Vayuda va veye nago: yiki ni kigira nku goonya wizodze u mbulire.

⁴Miima gyange kutwula inyinga nda li muyai ku matsyambiri gya li mu ihiri yange nomu Yerusalemi, Avayuda vosi va manya;

⁵ni va mmanya ku matsyambiri, ni venya kulolekidza, va nyala kuvola inze ku lyahuka lidinyu lyemiluka gyetu nda li Mufarisayo

⁶Kandi kalunu nsingira hano kukalagirwa ku lisuuvira lya Nyasaye ya suuviridza avaguga vetu;

⁷ku yili tsihiri tsyetu likumi na tsiviri, tsi tumekira Nyasaye netsingulu ubudiku nombasu, va geridza kuduka. Ku lisuuvira yili Avayuda va nzalira, O mwami

⁸Nyasaye na a va na a simugukidza avakudzi, kigira ki mu vola ni kindu ki ta nyala kubu girirwa?

⁹Inze ligali nda ganagana mwene, nobulahi nda kola vindu vinyingi vya hing'ana nelieta lya Yesu wa Nazareti.

¹⁰Na yaga kandi nda kola mu Yerusalemi: nda boha vanyingi ku vatakatifu tsinyumba tsyavahambe, nda nyola tsingulu ku vasalisi vanene, kandi inyinga viitwa nda bugirira.

¹¹Nda va ha amageli tsinyinga tsinyingi mu masomero gosi, ni ngeridza kuvakola va nyege; kandi ndizula ubutima ligali, nda va dambidza kali kuduka mu madala ga vandi.

¹²Ku makuva yaga nda li ni ntsitsa Damasko netsingulu nebaruwa yavasalisi vanene.

¹³Mbasu hagati, O mwami, nda lola ubulavu bwa twula mu ligulu, bwa vita ubulavu bweliuva, bwa ng'ereng'ana ku tsimbega tsyange tsyosi navo ava genda halala ninze.

¹⁴Lwa kwa gwa hasi kwosi, nda hulira mwoyo gu mbolera mu lulimi lwa Vahebraina; Saulo, Saulo kigira ki u ndambidza? Nu budinyu ku ive kulasa luvasi ku kivambo.

¹⁵Kandi inze nda vola, U veye ibwaha, Mwami? Kandi Mwami ya vola, Inze ni Yesu wa u dambidza.

¹⁶Navutswa vuka, u singire nevirenge vivyo: kigira inze mmali ku loleka ku ive ku yaga, nku kole mutumekiri wange nomulolekidzi wevindu vya u loli ku inze, nevya u li manywa ninze;

¹⁷ni nku honnya ku vandu noku Tsihiri, ava nku tuma kuvo,

¹⁸kuvakunula tsimoni tsyavo va twule mu kisundi va yeke ku buiavu, kandi va twule ku tsingulu tsya Setani va yeke ku Nyasaye, ni va nyola lisamefwa lyobwoni va vugule miyandu halala navo ava takaswa nelisuuvira li veye mu inze.

¹⁹Hene yaho, O mwami Agiripa, si nda sula kulonda kiloleki kyegulu:

²⁰navutswa ku matsyambiri ndilwadza ku va Damasko, kandi mu Yerusalemi nomu kivala kyosi kya Buyuda kyosi, kandi ku vandu ve Tsihiri, veganire, va yeke ku Nyasaye nokukola miyinzi gyi dukana nobweganiri.

²¹Kigira yaga Avayuda va ngumira mu litempeli ni venya kunziita.

²²Navutswa kigira nda nyola ubuhonnyi bwa twula ku Nyasaye, nsingira hano kuduka kali lero nokulolekidzira avakekeke navanene, kandi si mbola kindu, geng'ine ga vyavaprofeti na Musa va vola vi ladza;

²³kuli ga dukira Kristo a saliridzwe, kandi kuli mwene a la tanga kusimugukidzwa mu vakudzi, nokwilwadza ubulavu ku vandu noku Tsihiri.

²⁴Lwa ya li ni ikinga ndiyo, Festo ya vola nomwoyo munene, Paulo, u laluki, lisoma lilyo linyingi li ku lalukidza.

²⁵Navutswa Paulo ya vola, Si mbeye nobulalu, Festo mulahi; navutswa mbola amakuva geligali na gobugeeri.

²⁶Kigira mwami wa mbolera nobuluviriri, a manya amakuva gevindu yivi; kigira mbola, vindu yivi si vi viswa kuye kali kilala, kigira yivi si vya kolwa mu king'oze mba.

²⁷Mwami Agiripa, u suuvira avaprofeti ? Mmanya u suuvira.

²⁸Agiripa ya volera Paulo, Nobugoonyi bukekeke vutswa u ganagana kunkola Mukristayo.

²⁹Paulo ya vola, Nsaala Nyasaye, ni bu va bukekeke kinga ubunene, si a li ive weng'ine navutswa vosi ava mbulira lero, va ve kuli inze ligali, ni li ta li libofwa yili.

³⁰Mwami ya singira, nomwami mukekeke, na Berinike navo avikala navo:

³¹lwa va twula va volerana ni va vola, Mundu uyu si a veye nekindu ki duka a kudze kinga a bofwe.

³²Naye Agiripa ya volera Festo, Mundu uyu a vula kwanira ku Kaisari nkano u boholeywi.