Read lulogooli Vikolwa 3 Bible Online

Vikolwa 3 - lulogooli bible

Vikolwa 3

¹Petro na Yohana va li ni vanegira kutsia mu litempeli inyinga yokusaala, isaa i kola tsitanu na tsine.

²Ha li nomundu mulala muleema kutwula munda mwa mama, ya gingwa, wa va vika kazozo ha kili ango kya litempeli kya langwa Kilahi, a saave isadaka ku avingira mu litempeli.

³Lwa ya lola Petro na Yohana venya kwingira mu litempeli, ya saava a hebwe isadaka.

⁴Petro ya mwumika, halala na Yohana, na a vola, U ku henze.

⁵Na a va hulira, na a suuvira a la nyola isadaka kuvo.

⁶Navutswa Petro ya mu volera, Inze si mbeye nefetha kandi thahabu; navutswa kya mbeye nakyo, yikyo nda ku ha. Ku lieta lya Yesu Kristo wa Nazareti, genda.

⁷Ya mu gumira mukono mulungi, na a mu singeridza: nonoho tsinduvatiru tsitsye nevigumba vye milugu vya nyola tsingulu.

⁸Kandi ya vuka bwangu na a singira na a genda; ni yingira halala navo mu litempeli na a genda na a tuumatuuma ni yidzominya Nyasaye.

⁹Kandi avandu vosi va mu lola na a genda ni yidzominya Nyasaye:

¹⁰ni va manya uyu niye wikala na a saava isadaka ha kiliango kya langwa Kilahi kyelitempeli; kandi vizula ubutii neligenya kigira aga mu gwira.

¹¹Lwa ya gumira Petro na Yohana, avandu vosi va va vuganira tsimbiru mu lusimbu lwa langwa lwa Solomoni, ni va genya ligali.

¹²Petro lwa ya lola ya tivulira avandu, Mwinye avandu va Israeli, kigira ki mu genyira ku mundu uyu? Kandi kigira ki mu kwumika, kuli kwinye, netsingulu tsyetu naho nobutakatifu bwetu kwa mu kola a gende?

¹³Nyasaye wa Abrahamu, nowa Isaka, nowa Yakobo, Nyasaye wavaguga vetu, u kuminyi Mutumekiri wewe Yesu; wa mwa zama nowa mwambakana imbiri wa Pilatu, lwa ya saavira kumuboholola.

¹⁴Navutswa mwinye mwambakana uyu Mutakatifu no Mulungi, kandi mwinye mwenya mu hebwe mulumindi,

¹⁵kandi mwiita Munene welivamwoyo; wa Nyasaye ya simugukidza mu vakudzi; kwinye ku veye avaloli ku yaga.

¹⁶Kandi lieta lilye, ku lisuuvira ku lieta lilye, li mali kuha mundu uyu tsingulu, wa misuuvira lola nowa mu manya: ligali, lsuuvira li veye ku lieta lilye li mali kumuha ubulamu yibu ubwere imbiri wenyu mwosi.

¹⁷Kalunu, Avamitu, inze mmanya mwa kola ni mu ta manya, na vanene venyu kandi ndiyo.

¹⁸Navutswa vindu vya Nyasaye ya tanga kumannya mu minwa gyavaprofeti vosi, Kristo wewe a la saliridzwa, u mali kuviduliidza ndi.

¹⁹Kigira yiki Mwe ganire, mwirane, ubwoni bwenyu bu twu'idzwe, tsi nyole kudza tsinyinga tsyokusosidza tsi twula imbiri wo Mwami;

²⁰kandi a duke kutuma Kristo uyu wa vikwa kigira mwinye, naye niye Yesu:

²¹wa ga dukira ligulu kumuvugula kuduka ku tsinyinga tsyokwirannya vindu vyosi, vya Nyasaye ya volera mu minwa gyavaprofeti veve vatakatifu kutwula kale.

²²Musa ligali ya vola, Mwami Nyasaye a la mu twulidzira muprofeti mulala ku vamwavo venyu u fwanana inze; mu la mu hulira uyu ku makuva gosi ga a li mu volera.

²³Kandi ga la va, ku vandu vosi u li vula kuhulira muprofeti uyo a lononywa ligali a twulidzwe mu vandu.

²⁴Ligali, avaprofeti vosi kutwula ku Samweli, navo vosi ava mu londa, vosi va mali kuvola, yava kandi va profeta ku madiku yaga.

²⁵Mwinye mu veye avana vavaprofeti, navuna vamalagano ga Nyasaye ya lagana navaguga venyu, na a volera Abrahamu, Ku visukululwe vivyo tsihiri tsyosi tsyelirova tsi la nyola ku ubugasu.

²⁶Ku mwinye Nyasaye ya tanga kusingeridza Mutumekiri wewe na a mu tuma kumuha ubugasu, kuhunzula mwinye vosi mu twule mu budamano bwenyu.