Read lulogooli Vikolwa 6 Bible Online

Vikolwa 6 - lulogooli bible

Vikolwa 6

¹Mu madiku yaga lwa vegidzwi va dasika, Avayuda va vola Lugreki va monya Vahebraina kigira avakunzakali vavo si va lindwa ku butumiki bwavo bwa kazozo.

²Ava li likumi na vaviri va langa kiduma kya vegidzwi, ni va vola Si bu li bulahi kwinye ku leke likuva lya Nyasaye ku tumekire mu miima gyetsimeza.

³Avamitu, henzi avandu vatanu na vaviri ku mwinye va mu manya va veye valahi, avizula Roho nobugeeri, ava ku nyala kuvika mu muyinzi yigu.

⁴Navutswa kwinye ku la hongera mu lisaala nomu butumekiri bwelikuva.

⁵Na livola yili lya yanzidza kiduma kyosi: ni va tovola Stefano, mundu wizula lisuuvira na Roho Mutakatifu, na Filipu, na Porokoro, na Nikanora, na Timona, na Paramena, na Nikola wa li mwizamiri wa twula Antiokia;

⁶ni va va vika imbiri wa vatumwa, navo lwa va mala kusaala Nyasaye va vika mikono gyavo kuvo.

⁷Likuva lya Nyasaye lya landa; navegidzwi va dasika ligali mu Yerusalemi; nekiduma kinene kyavasalisi kya londa lisuuvira yili.

⁸Stefano ya li ni yizula netsimbabasi netsingulu, ya kola vyokugenya nevilolekidzu vinene mu vandu.

⁹Navutswa avalala velivugana lya Valiberitino, na Vama kurene, na Vaisikanderi, navo va twula Kilikia na Asia, va twula ni va hangalidzana na Stefano.

¹⁰Navutswa si va nyala kuguuta ubugeeri na Roho wa a vola naye.

¹¹Ku, va leta avandu galaha ava vola, Kwa li ku hulira uyu na a vola amakuva gokunyega Musa na Nyasaye.

¹²Ni va gema avandu, na vakulundu, navang'odi, ni va mu nyola ni va mu gumira, ni va mu hila imbiri wekyina.

¹³Kandi va singeridza avaloli vobubehi ava vola, Mundu uyu si a leka kuvola linyega ku hatakatifu hano, noku lilaga:

¹⁴kigira kwa li ku mu hulira na a vola, Yesu uyu wa Nazareti a lononnya hano, kandi a la girunkannya miima gya Musa ya ku ha.

¹⁵Navo vosi vikala mu kyina va mwumika, ni va mu lola mmoni mwimwe mu fwanana mmoni mwengelosi.